ក្រុមប្រឹក្សាសន្តិសុខនិយាយមិនចុះសម្រុងគ្នាក្នុងការបន្តបេសកកម្មរយៈពេល ១ឆ្នាំរបស់ អ.ស.ប. នៅលីប៊ី
ចុះផ្សាយនៅថ្ងៃ៖
ស្តាប់ - ០២:២១
តាំងពីការលាឈប់របស់ប្រេសិតពិសេសជាជនជាតិស្លូវ៉ាគីលោកហ្សង់ គូប៊ីសក្នុងខែវិច្ឆិកា ឆ្នាំ ២០២១ ជម្រើសប្រេសិតពិសេសថ្មីបាន និងកំពុងអូសបន្លាយមកដល់សព្វថ្ងៃ។ នេះជាហេតុផលដែលប្រទេសរុស្ស៊ីកំពុងបន្តប្រើដើម្បីរារាំងមិនឲ្យក្រុមប្រឹក្សាសន្តិសុខបន្តអាណត្តិរបស់បេសកម្ម Manul រយៈពេលវែង។ បន្ទាប់ពីបានបន្តចំនួន ៤ខែក្នុងខែកញ្ញា ឆ្នាំ ២០២១ និងបន្តចំនួន ៣ខែបន្ថែមនាខែមករា ឆ្នាំ ២០២២ រុស្ស៊ីបានយល់ព្រមឲ្យបន្តបន្ថែមតែចំនួន ៣ខែរហូតដល់ថ្ងៃទី៣១ ខែកក្កដាខាងមុខ។ ប្រទេសជាច្រើន ក្នុងនោះមានបារាំង ប្រេស៊ីល ឬហ្កាបុងបានសម្តែងការខកចិត្ត និងនាំគ្នាបរិហារលើជំហររបស់រុស្ស៊ីនៅចំពោះមុខសមាជិក ១៤ប្រទេសទៀតនៃក្រុមប្រឹក្សាសន្តិសុខដែលចង់បន្តអាណត្តិរបស់បេសកកម្ម Manul រយៈពេល ១ឆ្នាំ។
ឯកអគ្គរដ្ឋទូតរងអាមេរិកប្រចាំអង្គការសហប្រជាជាតិបានចាត់ទុកទង្វើរបស់រុស្ស៊ីជាសារដ៏អាក្រក់ដែលរុស្ស៊ីបានបញ្ជូនទៅឲ្យពលរដ្ឋលីប៊ី។ « ជាថ្មីម្តងទៀត រុស្ស៊ីបានដាក់ខ្លួនឲ្យឯកោខ្លួនឯងនៅចំពោះមុខសមាជិក ១៤ប្រទេសទៀតនៃក្រុមប្រឹក្សាសន្តិសុខ » នេះជាប្រតិកម្មរបស់ឯកអគ្គរដ្ឋទូតអង់គ្លេសប្រចាំអង្គការសហប្រជាជាតិ។ ចំណែករុស្ស៊ីបានបន្តជំរុញឲ្យអគ្គលេខាធិការអង្គការសហប្រជាជាតិឲ្យតែងតាំងប្រេសិតពិសេសថ្មីសម្រាប់លីប៊ីឲ្យបានលឿនបំផុត។ គួរបញ្ជាក់ថា ក្នុងពេលមិនទាន់មានប្រេសិតពិសេសថ្មី តួនាទីនេះត្រូវបានធានាក្រៅផ្លូវការដោយលោកស្រី Stephanie Williams ទីប្រឹក្សាពិសេសរបស់អាមេរិកសម្រាប់លីប៊ី។
ហេតុអ្វីបានជាមានការយឺតយ៉ាវក្នុងការតែងតាំងប្រេសិតពិសេសថ្មីសម្រាប់លីប៊ី?។ គឺប្រហែលមកពីជម្រើសបេក្ខជន។ ប្រទេសហ្កាបុងចង់ឃើញអាហ្រ្វិកទទួលតំណែងប្រេសិតពិសេសសម្រាប់លីប៊ីដោយបានស្នើឈ្មោះឥស្សរជនពីរនាក់ គឺជនជាតិហ្កាណា និងជនជាតិស៊ូដង់។ ចំណែករុស្ស៊ី និងចិនក៏បានគាំទ្របេក្ខជនមកពីអាហ្រ្វិកដែរ។ រុស្ស៊ីបានព្រមានទុកជាមុនថា បើការជ្រើសរូបប្រេសិតពិសេសថ្មីបន្តអូសបន្លាយ ខ្លួននឹងពិចារណាមើលពីបេសកកម្មរបស់ Manul នៅលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ