សន្និសីទអន្តរជាតិ ដើម្បីស្រោចស្រង់លីប៊ី បើកធ្វើនៅអាល្លឺម៉ង់
ចុះផ្សាយនៅថ្ងៃ៖
ស្តាប់ - ០៦:៣៦
តើជាសន្និសីទអន្តរជាតិស្តីពីលីប៊ីលើកទីប៉ុន្មានហើយ ? នៅថ្ងៃនេះ អាល្លឺម៉ង់ បានធ្វើជាម្ចាស់ផ្ទះទទួលរៀបចំសន្និសីទអន្តរជាតិថ្មីមួយទៀត ស្តីពីវិបត្តិនៅលីប៊ី ក្នុងបរិបទដ៏តានតឹងបង្កប់ទៅដោយភាពបន្ទាន់ផង និងមន្ទិលផង។ អន្តរជាតិដែលមានពាក់ព័ន្ធនឹងវិបត្តិលីប៊ីបានបង្ហាញវត្តមានគ្រប់គ្នានៅប៊ែរឡាំង។ ប៉ុន្តែលើកនេះក៏ ដូចលើកមុន លទ្ធផលនៃជំនួបទំនងជាមានស្តួចស្តើងណាស់។
សន្និសីទអន្តរជាតិស្តីពីលីប៊ី ត្រូវបើកធ្វើនៅថ្ងៃនេះ ក្នុងបរិបទដ៏តានតឹង និង កាន់តែបន្ទាន់ ព្រោះ ជម្លោះនៅលីប៊ី បានរាលដាលជាការប្រយុទ្ធគ្នាមកដល់មាត់ច្រករដ្ឋធានី ហើយការជ្រៀតជ្រែករបស់បរទេស ក៏មានកាន់តែខ្លាំងជ្រៅ តាំងពីចូលខែមករាមក។
វិបត្តិលីប៊ី ដែលកំពុងផុយស្រួលខ្លាំង អាចនឹងប៉ះពាល់ដល់លំនឹងនៃសមភាពភូមិសាស្ត្រនយោបាយ ហេតុដូច្នេះហើយទើបគេឃើញប្រមុខដឹកនាំធំៗ ដូចជាប្រធានាធិបតីរុស្ស៊ី ពូទីន ប្រមុខការទូតអាមេរិក បានប្រកាសមកចូលរួមក្នុងសន្និសីទអង្គការសហប្រជាជាតិ នៅប៊ែរឡាំងនេះ ជាមួយថ្នាក់ដឹកនាំក្រុមប្រទេសដែលពាក់ព័ន្ធមួយចំនួនធំទៀត ព្រមទាំងអង្គការស្ថាប័នធំៗដូចជា សហភាពអឺរ៉ុប សម្ព័ន្ធអារ៉ាប សហភាពអាហ្វ្រិក ដើម្បីវែករកផ្លូវនាំលីប៊ីឱ្យរកដំណោះស្រាយតាមច្រកនយោបាយ។
ពាក្យថាដំណោះស្រាយតាមផ្លូវនយោបាយ គឺត្រូវឱ្យភាគីជម្លោះប្រដាប់អាវុធ ព្រមចុះកិច្ចព្រមព្រៀងឈប់បាញ់។ សន្និសីទដែលរៀបចំឡើងដោយប៊ែរឡាំងក្រោមម្លប់អង្គការសហប្រជាជាតិនេះ មានកម្មវត្ថុច្បាស់លាស់ គឺពង្រឹង ឱ្យបានកាន់តែពេញលក្ខណៈនូវ បទឈប់បាញ់ ដែលចូលជាធរមានតាំងពីថ្ងៃ១២មករាមក តែមានទម្រង់ត្រឹមជាការផ្អាកការបាញ់គ្នាច្រើនជាង ព្រោះ លោក ហាវតារ ដែលគ្រប់គ្រងលីប៊ីភាគខាងកើតពុំបានចុះហត្ថលេខាលើបទឈប់បាញ់ទេ។
អង្គការសហប្រជាជាតិ ចង់ធ្វើឱ្យបទឈប់បាញ់មានតម្លៃកាន់តែស៊ីជម្រៅទៀត ដោយចែកឱ្យដាច់ភាគីបក្សដិបក្សលីប៊ី ប្រមូលអាវុធធុនធ្ងន់ បង្រួមបង្រួមស្ថាប័នជាតិ និងការបែងចែកធនធាន។
ហើយកម្មវត្ថុដ៏សំខាន់មួយទៀត នៃជំនួបកំពូលនេះ គឺការបិទបញ្ចប់ការជ្រៀតជ្រែករបស់បរទេស និងការដាក់ឱ្យដំណើរការឡើងវិញ កិច្ចសន្យាមិនបញ្ជូនអាវុធទៅលីប៊ី។
ធនធានប្រេងក្លាយជាចំណាប់ថ្នូរនយោបាយ ?
មកទល់នឹងពេលនេះ សេនាប្រមុខហាវតារ បដិសេធមិនដកទ័ពថយពីទីតាំងឈរជើងនៅមាត់ច្រកក្រុងទ្រីប៉ូលីទេ ចំណែកប្រមុខរដ្ឋាភិបាលសហភាពលីប៊ីវិញ ទាមទារចង់ឱ្យការពង្រាយកម្លាំងអន្តរជាតិ ដើម្បីការពារប្រជាពលរដ្ឋស៊ីវិល។
មុនសន្និសីទបើកនៅប៊ែរឡាំង ភាគីជម្លោះទាំងពីរ បានដំឡើងយុទ្ធសាស្ត្រដាក់គ្នាកាន់តែខ្លាំង ក្នុងគំនិតថាបើនរណាខ្លាំងជាង អ្នកនោះនឹងមានប្រៀបក្នុងពេលចូលតុចរចា។
បើតាមអង្គការសង្កេតការណ៍សិទ្ធិមនុស្ស រដ្ឋាភិបាលសហភាពលីប៊ីដែលទទួលស្គាល់ដោយអន្តរជាតិ បានទទួលទាហានស៊ីរីចំនួន៣៦៦០នាក់ ព្រមទាំងគ្រាប់រំសេវ អាវុធយុទ្ធភណ្ឌ រថពាសដែកជាច្រើនគ្រឿងពីតួកគី ទើបបញ្ជូនមកដល់នៅថ្ងៃសៅរ៍ម្សិលមិញ។ ខាងសេនាប្រមុខហាវតារ គាំទ្រដោយអេមីរ៉ាត អេហ្ស៊ីប និងរុស្ស៊ីវិញ បានបិទខ្ទប់កំពង់ផែនិងស្ថានីយ៍បូមប្រេងនៅភាគខាងកើតប្រទេស។ ការផលិតប្រេង ដែលជាធនធាន និងជាប្រភពចំណូលជាតិស្ទើរតែមួយគត់ ត្រូវបញ្ឈប់។
ប្រេងដែលភាគីបក្សដិបក្សលីប៊ីធ្លាប់បែងចែកផលគ្នា ក៏បានក្លាយជាចំណាប់ថ្នូរនៃជម្លោះនយោបាយ។ ល្បែងបែបនេះ អាចបំផ្លាញការខិតខំប្រឹងប្រែងរបស់អាល្លឺម៉ង់ តាំងពីជាច្រើនខែមក ដោយត្រូវលើកយកបញ្ហាបែងចែងធនធានមួយទៀតមកចរចា។
ប៊ែរឡាំង ក្រុងនៃវិបត្តិលីប៊ី
ការចូលរួមរបស់អាល្លឺម៉ង់ បានធ្វើសន្និសីទអន្តរជាតិ ស្តីពី លីប៊ី លើកនេះ មានតម្លៃនិងចំណាប់អារម្មណ៍ជាពិសេស។ ហើយមូលហេតុដែលនាំអាល្លឺម៉ង់ប្រឹងចូកចែវជួយលីប៊ីខ្លាំង ក៏ព្រោះតែកាលពីឆ្នាំ២០១១ អាល្លឺម៉ង់ បានធ្វើខុសទម្លាប់ បោះឆ្នោតអនុប្បវាទប្រឆាំងនឹងអន្តរាគមន៍យោធានៅលីប៊ី។ មិនចូលធ្វើអន្តរាគមន៍យោធា មិនធ្លាប់ទៅត្រួតត្រាធ្វើអាណានិគមន៍នៅលីប៊ី និងមិនគាំទ្រភាគីណាមួយក្នុងជម្លោះបច្ចុប្បន្នទេ ដូច្នេះ ប៊ែរឡាំងអាចដើរតួជាអន្តរការីបានយ៉ាងប្រពៃជាងគេ ក្នុងនាមអ្នកអព្យាក្រិត្យ។
ម្យ៉ាងទៀត អាល្លឺម៉ង់ចង់ប្រើឱកាសនេះដើម្បីបង្ហាញថា ពហុជាតិនៅតែអាចដំណើរការបាន កិច្ចព្រមព្រៀងអន្តរជាតិនៅតែអាចចេញរួច មិនដូចអ្វីដែលលោកត្រាំគិតឡើយ។ កាលពីសប្តាហ៍មុនលោកស្រីមែរកិលបានធ្វើដំណើរទៅម៉ូស្គូ ជួបពិភាក្សាផ្ទាល់ជាមួយលោក ពូទីន ដែលជាតួអង្គដ៏សំខាន់មួយក្នុងវិបត្តិលីប៊ី។
នៅក្នុងវិបត្តិលីប៊ីនេះ តួកគី និង រុស្ស៊ី លូកដៃខ្លាំងណាស់។ តួកគីគាំទ្រដោយចេញមុខរដ្ឋាភិបាលក្រុងទ្រីប៉ូលី ដែលទទួលស្គាល់ដោយអន្តរជាតិ ឯរុស្ស៊ីវិញ គាំទ្រខាងសេនាប្រមុខហាវតារ នៅភាគខាងកើតប្រទេស។ ឯអឺរ៉ុបហាក់លិបបាត់ គ្មានបានដើរតួនាទីការទូតអ្វីសោះ តែវត្តមាននិងកិច្ចខំប្រឹងប្រែងរបស់អាល្លឺម៉ង់ ជាតំណាងឱ្យសហភាព និងលើកមុខមាត់ឱ្យអឺរ៉ុបវិញ ព្រមទាំងជាការទប់ទល់នឹងសន្ទុះអំណាចប្រជែងគ្នារបស់រុស្ស៊ី-តួកគី នៅលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ