រដ្ឋាភិបាលបារាំងព្រមានប្រឆាំងនឹងអ្នកដែលកេងចំណេញសេដ្ឋកិច្ចពីមេរោគកូរ៉ូណាថ្មី
នៅក្នុងប្រទេសបារាំង រដ្ឋមន្រ្តីក្រសួងសុខាភិបាលលោកអូលីវីយេ វេរ៉ង់បានប្រកាសឲ្យដឹងនៅថ្ងៃអង្គារ ទី៣ មីនាថា ចំនួនមនុស្សស្លាប់ដោយមេរោគកូរ៉ូណាថ្មីមាន ៤នាក់ និងអ្នកឆ្លងជាង ២០០នាក់។ ចំណែកប្រធានាធិបតីលោកអេម៉ានុយអែល ម៉ាក្រុងបានលុបចោលកម្មវិធីគ្រោងទុកមួយចំនួនក្នុងសប្តាហ៍នេះដើម្បីផ្តោតលើការគ្រប់គ្រងវិបត្តិមេរោគកូរ៉ូណាថ្មី។ លោកម៉ាក្រុងបានសរសេរនៅក្នុងទំព័របណ្តាញសង្គម Tweeter របស់លោកក្នុងថ្ងៃអង្គារ ទី៣ មីនាថា រដ្ឋនឹងប្រមូលបរិមាណស្តុក និងគ្រប់គ្រងលើការផលិតម៉ាសការពារ។ លោកម៉ាក្រុងបានបញ្ជាក់ថា វិធានការមួយនេះមានគោលដៅធានា និងឆ្លើយតបនឹងតម្រូវការរបស់ពលរដ្ឋប្រឈមនឹងកំណើនឥទ្ធិពលរបស់មេរោគកូរ៉ូណាថ្មីដែលមិនអាចព្យាករបាន។ បច្ចុប្បន្ន បារាំងមានស្តុកម៉ាសការពារប្រមាណជា ១៦០លានម៉ាស ក្នុងនោះ រដ្ឋាភិបាលទើបបានបញ្ចេញចំនួន ១០%។ តាមរដ្ឋមន្រ្តីក្រសួងសុខាភិបាលលោកវេរ៉ង់ មាន ១០លានម៉ាសការពារបានបញ្ជូនទៅកាន់មន្ទីរពេទ្យ និងទៅកាន់គ្រប់ឧសថស្ថាននៅទូទាំងប្រទេសបារាំង ហើយនឹងត្រូវបញ្ជូនពី ១៥លានទៅ ២០លានថែមទៀតនាពេលខាងមុខ។ ដោយឡែក រដ្ឋមន្រ្តីក្រសួងសេដ្ឋកិច្ចលោកប៊្រុយណូ ឡឺម៊ែរបានព្រមានប្រឆាំងនឹងឈ្មួញដែលឆ្លៀតកេងចំណេញពីមេរោគកូរ៉ូណាថ្មីដោយដំឡើងថ្លៃម៉ាសការពារ និងទឹកអាល់កុលលាងដៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
« តម្លៃទឹកអាល់កុលលាងដៃអាចឡើងថ្លៃមួយជាពីរ ឬមួយជាបីនៅតាមហាងលក់ទំនិញមួយចំនួន ឬការលក់ទំនិញតាមអនឡាញ។ វាពិតជារឿងមិនអាចទទួលបានជាដាច់ខាតដែលត្រូវមានការឆ្លៀតកេងចំណេញសេដ្ឋកិច្ចពីមេរោគកូរ៉ូណាថ្មី។
អីចឹងហើយបានជាខ្ញុំស្នើឲ្យស្ថាប័នប្រយុទ្ធប្រឆាំងនឹងការកេងបន្លំផ្តើមការស៊ើបអង្កេតលើតម្លៃទឹកអាល់កុលលាងដៃ ឬតម្លៃម៉ាសការពារដែលលក់នៅតាមអនឡាញ និងនៅតាមហាងទំនិញ។ ប្រសិនបើរកឃើញថា មានហាងទំនិញ ឬការលក់អនឡាញក្នុងទឹកដីបារាំងបានដំឡើងថ្លៃទឹកអាល់កុលលាងដៃ ឬតម្លៃម៉ាសការពារមិនសមហេតុផលដែលមិនអាចទទួលយកបាន ខ្ញុំត្រៀមរួចហើយក្នុងការដាក់ចេញនូវសេចក្តីព្រាងក្រឹត្យមួយដើម្បីកំណត់តម្លៃទឹកអាល់កុលលាងដៃ និងតម្លៃម៉ាសការពារ។
ទន្ទឹមគ្នានេះ ខ្ញុំក៏មិនញញើតនឹងចាត់វិធានការផ្សេងទៀត ប្រសិនបើរកឃើញថា ទង្វើបំពានរបៀបនេះមានច្រើននៅក្នុងប្រទេសបារាំងនោះ។ ខ្ញុំចង់និយាយម្តងទៀតថា យើងនឹងយល់ព្រមឲ្យមានជាដាច់ខាត ការកេងចំណេញពីជំងឺឆ្លងរាតត្បាតនៃមេរោគកូរ៉ូណាថ្មី »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ