រុស្ស៊ី និងតួកគីបានឯកភាពគ្នាលើបទឈប់បាញ់មួយនៅស៊ីរី តែជាបទឈប់បាញ់ផុយស្រួយ?
ចុះផ្សាយនៅថ្ងៃ៖
ស្តាប់ - ០៥:២៧
បទឈប់បាញ់មួយនៅតំបន់អ៊ីដឡិប ក្នុងប្រទេសស៊ីរីបានចូលជាធរមានចាប់ពីថ្ងៃសុក្រ ទី៦ មីនា។ នេះជាលទ្ធផលនៃជំនួបកំពូលទ្វេភាគីរវាងប្រធានាធិបតីតួកគីលោកអ៊ែរដូហ្កាន និងសមភាគីរុស្ស៊ីលោកពូទីនក្នុងទីក្រុងមូស្គូ ប្រទេសរុស្ស៊ីនាថ្ងៃព្រហស្បតិ៍ ទី៥ មីនា។ កិច្ចព្រមព្រៀងឈប់បាញ់នៅអ៊ីដឡិបដែលជាជម្រកចុងក្រោយរបស់ក្រុមប្រឆាំងរដ្ឋាភិបាលស៊ីរីពេលនេះបានធ្វើឡើង បន្ទាប់ពីមានការប្រឈមផ្លូវអាវុធខ្លាំងក្លារវាងទ័ពតួកគីដែលគាំទ្រក្រុមប្រឆាំង និងទ័ពរដ្ឋាភិបាលស៊ីរីដែលគាំទ្រដោយទ័ពរុស្ស៊ី។ អគ្គលេខាធិការអង្គការសហប្រជាជាតិលោក Antonio Guterres បានសង្ឃឹមថា កិច្ចព្រមព្រៀងនៃបទឈប់បាញ់មួយនេះនឹងឈានទៅបញ្ឈប់ការប្រឈមមុខដាក់គ្នាយូរអង្វែង។ ដោយឡែក និងតាមសំណើរបស់រុស្ស៊ី ក្រុមប្រឹក្សាសន្តិសុខរួមប្រជុំគ្នាក្នុងថ្ងៃសុក្រ ទី៦ មីនា។
មុននឹងសម្រេចបានកិច្ចព្រមព្រៀងបទឈប់បាញ់មួយនៅក្នុងតំបន់អ៊ីដឡិប ប្រទេសស៊ីរី ប្រធានាធិបតីតួកគីលោកអ៊ែរដូហ្កាន និងសមភាគីរុស្ស៊ីលោកពូទីនបានប្រើពេលជជែកគ្នា ១ទល់១ ដល់ទៅ ៦ម៉ោង។ ការប្រើពេលយូរនេះជាសក្ខីកម្មមួយដែលបញ្ជាក់ពីការលំបាកក្នុងការស្វែងរកកុងសង់ស៊ុសរួមមួយដែលអាចទទួលបានទាំងអស់គ្នា។ ផ្អែកតាមកិច្ចព្រមព្រៀង រុស្ស៊ី និងតួកគីបានយល់ព្រមបង្កើតឲ្យមានតំបន់សន្តិសុខមួយដែលមានទទឹងប្រវែង ១២គីឡូម៉ែត្រនៅតាមបណ្តោយផ្លូវល្បឿនលឿង M៤ ដែលឆ្លងកាត់ខេត្តអ៊ីដឡិបប៉ែកខាងជើង។ តំបន់សន្តិសុខដែលមានទទឹង ១២គីឡូម៉ែត្រត្រូវគ្រប់គ្រងរួមគ្នាដោយរុស្ស៊ី និងតួកគីទទួលបានចំណែក ៦គីឡូម៉ែត្រក្នុងម្នាក់ៗ។
ទ័ពរុស្ស៊ី និងទ័ពតួកគីនឹងដើរល្បាតរួមគ្នានៅក្នុងតំបន់សន្តិសុខនោះចាប់ពីថ្ងៃទី១៥ មីនាទៅ។ តែរចនាសម្ព័ន្ធ និងរបៀបវារៈលំអិតនៃតំបន់សន្តិសុខនឹងត្រូវកំណត់ច្បាស់លាស់នៅក្នុងកិច្ចប្រជុំថ្នាក់រដ្ឋមន្រ្តីក្រសួងការពារជាតិរុស្ស៊ី និងតួកគីដែលគ្រោងរៀបចំនៅមួយសប្តាហ៍ទៀត។ ក្រៅពីឯកភាពបង្កើតឲ្យមានតំបន់សន្តិសុខមួយ កិច្ចព្រមព្រៀងរវាងរុស្ស៊ី និងតួកគីក៏មានចែងលើប្រធានរឿងផ្សេងទៀត។ តែមានប្រធានរឿងខ្លះបានចែងមិនសូវច្បាស់លាស់ ដូចយ៉ាងការរៀបចំឲ្យមានការវិលត្រឡប់របស់ជនបន្លាស់ទីដែលអាចធ្វើទៅបាន ឬមួយការអនុញ្ញាតឲ្យមានការនាំជំនួយមនុស្សធម៌ទៅកាន់តំបន់អ៊ីដឡិបជាដើម។
ទោះជាយ៉ាងនេះក្តី លោកអ៊ែរដូហ្កាន និងលោកពូទីនបានបញ្ជាក់ជាថ្មីម្តងទៀតពីការយកចិត្តទុកដាក់នឹងបូរណភាពទឹកដីរបស់ប្រទេសស៊ីរី។ គួររម្លឹកថាក្នុងរយៈពេលចុងក្រោយនេះ មានការប៉ះទង្គិចផ្លូវយោធាយ៉ាងខ្លាំងរវាងទ័ពរដ្ឋាភិបាលស៊ីរីដែលគាំទ្រដោយទ័ពរុស្ស៊ី និងទ័ពតួកគីដែលគាំទ្រក្រុមប្រឆាំងនឹងរដ្ឋាភិបាលស៊ីរី។ អ្វីដែលគ្រប់គ្នាបារម្ភ គឺសោកនាដកម្មមនុស្សធម៌នៅអ៊ីដឡិប ព្រោះការប៉ះទង្គិចផ្លូវយោធាកន្លងមកបានបណ្តាលឲ្យមានជនស៊ីវិលស្លាប់ជិត ៥០០នាក់ និងជនបន្លាស់ទីប្រមាណ ១លាននាក់។
លោកពូទីនមានប្រៀបលើលោកអ៊ែរដូហ្កាន?
បើពិនិត្យមើលជារួម លោកពូទីនប្រហែលជាមានប្រៀបលើលោកអ៊ែរដូហ្កាន។ មានប្រៀប ព្រោះមានចំណុចទាមទារខ្លះរបស់លោកអ៊ែរដូហ្កានមិនបានចែងនៅក្នុងកិច្ចព្រមព្រៀងឈប់បាញ់ទេ ដូចយ៉ាងផ្លូវល្បឿនលឿន M៥ ដែលត ភ្ជាប់រវាងខេត្តអ៊ីដឡិប និងទីក្រុងដាម៉ាស ឬមួយក៏ប៉ុស្តិ៍ឃ្លាំមើលរបស់ទាហានតួកគីដែលកំពុងឡោមព័ទ្ធដោយទ័ពរដ្ឋាភិបាលស៊ីរី។ បន្ទាប់មក មានចំណុចទាមទារខ្លះទៀតរបស់លោកអ៊ែរដូហ្កានកំពុងបន្តស្រពិចស្រពិល ដូចយ៉ាងការរៀបចំឲ្យមានការវិលត្រឡប់របស់ជនបន្លាស់ទីដែលរត់គេចពីសង្រ្គាម ឬមួយទុកឲ្យរដ្ឋាភិបាលស៊ីរីបន្តគ្រប់គ្រងដែនដីដែលវាយបានវិញពីក្រុមប្រឆាំង និងដែលតួកគីធ្លាប់បានទាមទារឲ្យទ័ពរដ្ឋាភិបាលស៊ីរីដកចេញពីដែនដីនោះវិញ។
ចំណែកការដែលលោកពូទីនអាចជំនះលោកអ៊ែរដូហ្កានឲ្យជិះយន្តហោះទៅជួបលោកផ្ទាល់ក្នុងទឹកដីរុស្ស៊ីក៏ជាកាយវិការមានប្រៀបមួយដែរ។
គួររម្លឹកថាក្នុងរយៈពេលចុងក្រោយនេះ ការប្រឈមមុខផ្លូវអាវុធរវាងទ័ពតួកគី និងទ័ពរដ្ឋាភិបាលស៊ីរីបានបណ្តាលឲ្យស្លាប់ទាហានតួកគីដល់ទៅ ៥៩នាក់នៅលើសមរភូមិអ៊ីដឡិបក្នុងប្រទេសស៊ីរី។ ពិតណាស់ តួកគី និងរុស្ស៊ីសុទ្ធតែបានអះអាងរៀងខ្លួនពីការមិនចង់ប្រឈមមុខដាក់គ្នាផ្ទាល់នៅស៊ីរី។ តែតួកគីយល់មិនច្រឡំទេថា ការបាត់បង់ទាហានខ្លួនជិត ៦០នាក់នៅលើសមរភូមិអ៊ីដឡិបមិនមែនគ្មានការលូកដៃពីទ័ពរុស្ស៊ីឡើយ។ ចំណែករុស្ស៊ីក៏ធ្លាប់បានបញ្ជាក់ច្បាស់ៗថា គ្មានថ្ងៃណាដែលខ្លួនត្រូវបោះបង់ចោលរដ្ឋាភិបាលស៊ីរីរបស់លោកអាសាដនោះទេ ទោះត្រូវបង់តម្លៃប៉ុន្មានក៏ដោយ។
ការបញ្ជាក់ដោយព្រមានរបស់រុស្ស៊ីនេះមិនមែនមានតែសម្តីទេ ព្រោះក្នុងរយៈពេលតែ ៦ថ្ងៃ ក្រោយពីការស្លាប់ទាហានតួកគី ៣៣នាក់ក្នុងសប្តាហ៍កន្លងទៅមក រុស្ស៊ីបានបញ្ជូននាវាចម្បាំងដល់ទៅ ៥គ្រឿងឆ្ពោះទៅស៊ីរី ព្រមទាំងរថក្រោះ រថពាសដែក និងយន្តហោះចម្បាំងជាច្រើនគ្រឿងបន្ថែមទៀត។ តែគេអាចនិយាយបានជារួមថា ភាគីទាំងអស់សុទ្ធជាអ្នកឈ្នះ ព្រោះទី១ កិច្ចព្រមព្រៀងឈប់បាញ់មួយនេះបានបញ្ចៀសការប្រឈមដាក់គ្នាផ្ទាល់រវាងរុស្ស៊ី និងតួកគី ហើយទី២ កិច្ចព្រមព្រៀងឈប់បាញ់មួយនេះបានបញ្ចៀសការស្លាប់ជនស៊ីវិល និងបង្កឲ្យមានជនបន្លាស់ទីបន្ថែមទៀត។ តើកិច្ចព្រមព្រៀងឈប់បាញ់មួយនេះនឹងបន្តរហូតដល់ពេលណា និងមានប្រសិទ្ធភាពដែរឬទេ? នេះជាសំណួរមួយដែលគេត្រូវរង់ចាំចម្លើយនាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ