តួកគីប្រកាសបើកប្រតិបត្តិការយោធា “ខែលនិទាឃរដូវ” នៅស៊ីរី
នៅថ្ងៃអាទិត្យទី ១ មីនា ២០២០ តួកគី បានប្រកាសបើកប្រតិបត្តិការយោធា នៅក្រុងអ៊ីដលិប (Idlib) ភាគពាយ័ព្យប្រទេសស៊ីរី ដើម្បីសងសឹកនឹងរបបដឹកនាំស៊ីរី របស់លោកបាស្ហារ អាល់ អាសាដ Bachar al-Assad។ សម្រាប់អង់ការ៉ា ការវាយប្រហារដែលបានធ្វើឱ្យទាហានតួកគី ៣៣នាក់ ស្លាប់បាត់បង់ជីវិតកាលពីថ្ងៃព្រហស្បតិ៍ទី ២៧កុម្ភៈ ជាស្នាដៃរបស់ក្រុងដាម៉ាស។ នៅក្នុងក្របខ័ណ្ឌនៃប្រតិបត្តិការសងសឹក ដែលតួកគីប្រសិទ្ធនាមថា "ខែលនិទាឃរដូវ” ស៊ីរីរងការខូតខាតយ៉ាងដំណំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
យន្តហោះចម្បាំងស៊ីរីពីរគ្រឿង ជាផ្ទាំងស៊ីបរបស់កងកម្លាំងតួកគី នៅតំបន់អ៊ីដលិប។ នេះបើតាមការគូសបញ្ជាក់របស់ប្រព័ន្ធឃោសនាព័ត៌មានរដ្ឋស៊ីរី។ ប៉ុន្តែបើតាមអង្គការសង្កេតការណ៍សិទ្ធិមនុស្សស៊ីរី យន្តហោះទាំងពីរគ្រឿងនោះត្រូវគេបាញ់ធ្លាក់ហើយ។
ចំណែករដ្ឋមន្ត្រីក្រសួងការពារជាតិតួកគី លោក Hulusi Akarវិញ បានប្រកាសថា ប្រតិបត្តិការយោធា “ខែលនិទាឃរដូវ” កំពុងបន្តទទួលជោគជ័យ”។ នេះគឺជាលើកទីមួយហើយដែលអង់ការ៉ា បានធ្វើសេចក្តីប្រកាសជាផ្លូវការ អំពីប្រតិបត្តិការយោធាតួកគី នៅលើទឹកដីស៊ីរី។ លោករដ្ឋមន្ត្រីការពារជាតិ បានអះអាងទៀតថា ប្រតិបត្តិការយោធាតួកគី បានចាប់ផ្តើមថ្ងៃទី ២៧កុម្ភៈ ពោលគឺក្នុងថ្ងៃតែមួយដែលមានការវាយប្រហារ បណ្តាលឱ្យទាហានតួកគី៣៣នាក់ស្លាប់ នៅក្រុងអ៊ីដលិប។ ការវាយប្រហារដែលតួកគីយល់ថាជាស្នាដៃរបស់ស៊ីរី។
នៅក្នុងប្រតិបត្តិការសងសឹក តួកគីបានផ្តល់តុល្យការ (ដែលគ្មានអ្វីអាចផ្ទៀងផ្ទាត់បាន)នៃជោគជ័យថា មានទាហានរបស់រដ្ឋាភិបាលស៊ីរី ចំនួន ២២១២នាក់បានស្លាប់។ ប្រតិបត្តិការតួកគី បានកម្ទេច រថពាសដែក ១០៣គ្រឿង កាំភ្លើងត្បាល់-រុកកែត ៧២គ្រឿង ឧទ្ធម្ភាគចក្រ ៨គ្រឿង ដ្រូនមួយគ្រឿង និងប្រព័ន្ធខែលប្រឆាំងមីស៊ីលអាកាសបីគ្រឿង។
តួកគីចេញមុខធ្វើសេចក្តីប្រកាសក្នុងទម្រង់ជាការផ្តល់តួលេខនៅពេលនេះ ក៏មកពី កាលពីដើមខែកុម្ភៈ តួកគីបានដាក់ឱសានវាទលើរបបក្រុងដាម៉ាសរបស់លោក បាស្ហារ អាល់សាដ ថានឹងប្រើពេលមួយខែធ្វើប្រតិបត្តិការយោធានៅអ៊ីដលិប រួចនឹងដកទ័ពចេញវិញ។ ឱសានវាទ ត្រូវផុតនៅយប់ថ្ងៃសៅរ៍ទី ២៩កុម្ភៈ តែការវាយប្រហាររបស់ស៊ីរីកាលពីថ្ងៃទី ២៧កុម្ភៈ បានបំផ្លាញពាក្យសន្យានោះ។ ដូច្នេះ តួកគីបានលេស មិនដកទ័ពចេញពីអ៊ីដលិបទេ ហើយនឹងបន្តវាយប្រហារលើរបបក្រុងដាម៉ាសទៀត។
នៅក្នុងសុន្ទរកថាតាមកញ្ចក់ទូរទស្សន៍ រដ្ឋមន្ត្រីក្រសួងការពារជាតិតួកគី បានគូសបញ្ជាក់ទៀតថា បំណងនៃការបើកប្រតិបត្តិការ “ខែលនិទាឃរដូវ” គឺបិទបញ្ចប់ទង្វើសម្លាប់រង្គាលរបស់ក្រុងដាម៉ាស និងខ្ទប់រលកអន្តោប្រវេសន៍។ តែតួកគី គ្មានឆន្ទៈនិងគ្មានចេតនាប្រឈមមុខជាមួយរុស្ស៊ី ដែលគាំទ្រលោក បាស្ហារ អាល់អាសាដទេ។ នេះជាពាក្យអះអាងបន្ថែមរបស់មេទ័ពតួកគីដដែល។ ប្រធានាធិបតីតួកគី ត្រូវជួបលោកពូទីន នៅថ្ងៃទី ៥ មីនា។ មុនដល់ថ្ងៃជំនួប តួកគីប្រឹងធ្វើយ៉ាងណាឱ្យមានប្រៀបខ្លាំងលើសមរភូមិដើម្បីស្រួលតថ្លៃជាមួយរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ