អង់គ្លេស-កូវីដ១៩៖ អ្វីៗប្រហែលមិនអាចត្រលប់មករកសភាពដើមវិញមុន៦ខែ
រដ្ឋាភិបាលអង់គ្លេស បានចេញបញ្ជាបិទខ្ទប់ប្រទេសទាំងស្រុង រយៈពេល៣សប្តាហ៍ចាប់ពីថ្ងៃទី៣០មីនា ដោយប្រជាជនត្រូវសំងំក្នុងផ្ទះ ក្រុមហ៊ុនសហគ្រាសទាំងអស់ ត្រូវបិទទ្វារ លើកលែងតែហាងលក់ទំនិញគ្រឿងឧបភោគបរិភោគ។ យោងតាមអាជ្ញាធរសុខភាពសាធារណៈអង់គ្លេស បំរាមនិងវិធានការហាមឃាត់ទាំងអស់ អាចនឹងអូសបន្លាយរហូតដល់៦ខែ មុននឹងអ្វីៗ អាចត្រលប់មករកភាពដើមវិញបាន។
ចុះផ្សាយនៅថ្ងៃ៖
ស្តាប់ - ០២:៤០
ចាប់ពីថ្ងៃចន្ទ ទី៣០មីនា ប្រជាជនអង់គ្លេសត្រូវសំងំនៅក្នុងផ្ទះ រក្សាចំងាយ មិនជួបជុំគ្នា។ រោងចក្រ ក្រុមហ៊ុន ហាងទំនិញដែលមិនចាំបាច់ត្រូវបិទទ្វារ រយៈពេល៣សប្តាហ៍ ដើម្បីទប់ស្កាត់ ការឆ្លងរាលដាល នូវមេរោគកូវីដ១៩។ ក៏ប៉ុន្តែ កាលពីថ្ងៃអាទិត្យ លោកស្រី Jenny Harries អគ្គនាយករង នៃអាជ្ញាធរសុខភាពសាធារណៈអង់គ្លេស បាននិយាយទុកមុនថា វិធានការនេះ អាចត្រូវអូសបន្លាយ រហូត៦ខែ ឬក៏អាចលើសនេះផង។
លោកស្រីបញ្ជាក់ថា វិធានការបិទខ្ទប់ប្រទេសទាំងស្រុង ដើម្បីប្រយុទ្ធប្រឆាំង នឹងការឆ្លងរាលដាលកូវីដ១៩នេះ រដ្ឋាភិបាលនឹងធ្វើការតាមដានបូកសរុបលទ្ធផល រៀងរាល់៣សប្តាហ៍ម្តង។ លោកស្រីបន្ថែមថា បើទោះបីជាស្ថានការណ៍អាចធូរស្រាល ក៏គេមិនអាចដកចេញនូវបំរាមនានា លឿនរហ័សពេកដែរ ព្រោះការឆ្លងរាលដាលមេរោគកូវីដ១៩ អាចនឹងងើបឡើងវិញ ដែលធ្វើឲ្យយើងមិនអាចទប់ជាប់។ ដូច្នេះ ការដកវិធានការហាមឃាត់ អាចត្រូវធ្វើសន្សឹមៗ បន្តិចម្តងបន្តិចម្តង។
ដូចគ្នាដែរ លោក Michael Gove ទេសរដ្ឋមន្ត្រីទទួលបន្ទុកគណរដ្ឋមន្ត្រីអង់គ្លេស បានលើកឡើងថា ប្រជាជនអង់គ្លេស ត្រូវត្រៀមខ្លួន ព្រោះវិធានការបិទខ្ទប់ អាចនឹងអូសបន្លាយយូរ ទំរាំអាចយកឈ្នះមេរោគកូវីដ១៩។ មន្ត្រីរូបនេះ បន្ថែមថា អាជ្ញាធរសុខាភិបាលអង់គ្លេស នឹងព្យាយាមធ្វើតេស្តរកមករោគឲ្យបានច្រើន ពោលគឺប្រមាណ២៥០០០តេស្តយ៉ាងហោច ជារៀងរាល់ថ្ងៃ ក្នុងអំឡុងសប្តាហ៍ខាងមុខ។ លោកក៏បានឆ្លៀតបន្ទោសប្រទេសចិនផងដែរ ថា ចិនបានផ្តល់ព័ត៌មានមិនច្បាស់ ទាក់ទិននឹងកម្លាំងនៃការឆ្លងរាលដាល របស់មេរោគកូវីដ១៩។
សូមបញ្ជាក់ថា អង់គ្លេស ជាប្រទេសដែលបានចេញវិធានការបិទខ្ទប់ ហាមឃាត់ប្រជាជនមិនឲ្យចេញពីផ្ទះ យឺតជាងគេ បើប្រៀបធៀបទៅនឹងប្រទេសអឺរ៉ុបផ្សេងទៀត ដូចជាអ៊ីតាលី អេស្ប៉ាញ បារាំង។ លោកបូរីស ចនសុន ដែលបច្ចុប្បន្នមានផ្ទុកមេរោគកូវីដ១៩ដែរនោះ ធ្លាប់បានលើកឡើងថា កាលណាមានមនុស្សឆ្លងកាន់តែច្រើនគ្នាក្នុងសង្គម រាងកាយមនុស្សនឹងបង្កើតជាប្រព័ន្ធការពារទប់ទល់មេរោគ ហើយកម្រិតនៃការឆ្លងទៅអ្នកផ្សេង និងកាន់តែថយចុះទៅតាមនោះ ដូច្នេះមិនចាំបាច់ហាមប្រជាជនមិនឲ្យចេញពីផ្ទះនោះទេ។
តែយ៉ាងណា ជាមួយនឹងការកើនឡើងយ៉ាងឆាប់រហ័ស នៃចំនួនអ្នកឆ្លង និងករណីគ្រោះថ្នាក់ដល់ស្លាប់ លោកបូរីស ចនសុន បានប្តូរការយល់ឃើញ មកចាត់វិធានការតឹងតែង ក្រុងប្រជាជនឲ្យសំងំក្នុងផ្ទះ។ លោក Stephan Powis នាយកផ្នែកវិជ្ជសាស្ត្រអង់គ្លេស បានលើកឡើងថា បើអង់គ្លេស អាចទប់អ្នកស្លាប់កុំឲ្យ មានចំនួនលើសពី២ម៉ឺននាក់ នោះអាចចាត់ទុកថាជាលទ្ធផលគាប់ប្រសើរណាស់ទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ