កូវីដ១៩ ៖ សេដ្ឋវិទូ ប្រាប់ឱ្យរដ្ឋាភិបាលកុំបន្ធូរពន្ធអ្នកមាននិងក្រុមហ៊ុនខ្នាតអន្តរជាតិ
ប្រឈមនឹងវិបត្តិសេដ្ឋកិច្ចដ៏ធ្ងន់ធ្ងរ បង្កឡើងដោយវិបត្តិកូរ៉ូណាវីរុស រដ្ឋាភិបាលមិនត្រូវបន្ធូរបន្ថយពន្ធ និងមិនត្រូវគិតប្រឹងតែជួយស្រោចស្រង់ក្រុមហ៊ុនសហគា្រសទេ។ អ្នកមានខ្លាំងត្រូវតែចូលរួមចំណែកជួយស្តារសេដ្ឋកិច្ច។ នេះបើតាមការយល់ឃើញរបស់សេដ្ឋវិទូជាច្រើន ខ្លះជាជ័យលាភីរង្វាន់ណូបែលសេដ្ឋកិច្ចផង ដែលកំពុងធ្វើការជាមួយសម្ព័ន្ធអង្គការក្រៅរដ្ឋាភិបាល និងសហជីពផ្សេងៗ។
ចុះផ្សាយនៅថ្ងៃ៖
ស្តាប់ - ០២:០២
ការរាតត្បាតរបស់កូវីដ១៩ បានធ្វើឱ្យចំណាយសាធារណៈកើនឡើងយ៉ាងខ្លាំង សម្រាប់ទ្រទ្រង់ប្រព័ន្ធសុខភាព ដើម្បីរក្សាប្រាក់ចំណូលរបស់ប្រជាពលរដ្ឋ និងដើម្បីទ្រទ្រង់ទីផ្សារការងារ។ នេះជាបន្ទុកសេដ្ឋកិច្ចដ៏ធ្ងន់នេះដែលត្រូវចែករំលែកប្រកបដោយសមមាត្រ និង មិនត្រូវជាបន្ទុករបស់ ក្រុមបុគ្គលណា និងប្រទេសណាមួយទេ។ នេះបើតាមការណែនាំរបស់ក្រុមសេដ្ឋវិទូដែលជាសមាជិកគណៈកម្មការឯករាជ្យដើម្បីកំណែទម្រង់ពន្ធដារអន្តរជាតិលើក្រុមហ៊ុនសហគ្រាស (ICRICT)។
ក្នុងទស្សនវិស័យបែបនេះ បើតាមគណៈកម្មការ ការកាត់បន្ថយការយកពន្ធពីក្រុមហ៊ុនសហគ្រាស ដើម្បីបំប៉ននិងស្តារការវិនិយោគ គ្មានប្រសិទ្ធភាពទេ។ គ្មានប្រសិទ្ធភាពទាំងខាងផ្នែកសេដ្ឋកិច្ច និងសង្គម។ មិនត្រូវដេញជើងគ្នា បញ្ចុះពន្ធដារដើម្បីទាក់ទាញវិនិយោគមកពីបរទេសទេ តែផ្ទុយទៅវិញត្រូវពង្រឹងកិច្ចសហប្រតិបត្តិការក្នុងវិស័យពន្ធដារ ដោយកំណត់អត្រាយកពន្ធលើប្រាក់ចំណេញរបស់ក្រុមហ៊ុនសហគ្រាសខ្នាតពហុជាតិនៅលើពិភពលោក ក្នុងកំរិតយ៉ាងតិចបំផុត២៥%។ នេះបើការទទូចរបស់គណៈកម្មការឯករាជ្យដើម្បីកែទម្រង់ពន្ធដារអន្តរជាតិលើក្រុមហ៊ុនសហគ្រាស។
ចំពោះក្រុមហ៊ុនបានចំណេញពីវិបត្តិកូវីដ១៩ ដូចជាក្រុមហ៊ុនក្នុងវិស័យឱសថ វិស័យពាណិជ្ជកម្មអេឡិចត្រូនិក ... វិញ ត្រូវតែយកពន្ធពីប្រាក់ចំណេញដ៏ហួសហេតុរបស់ក្រុមហ៊ុនទាំងអស់នោះ និងទៅតាមទំហំនៃក្រុមហ៊ុន។
គណៈកម្មការបានព្រមានថា ផែនការសង្គ្រោះរបស់រដ្ឋ អាចបំផ្លាញវិសមភាពនៅក្នុងទីផ្សារនិងអាក្រក់ខ្លាំងណាសសម្រាប់ប្រទេសកំពុងអភិវឌ្ឍន៍ ដែលពុំមានធនធានចាំបាច់សម្រាប់ដាក់ឱ្យដំណើរការផែនការនោះ។ ដាច់ខាតរដ្ឋមិនត្រូវជួយក្រុមហ៊ុនណាដែលមានទីស្នាក់ការ ឬសាខានៅក្នុងក្រៅប្រទេស ដើម្បីគេចពន្ធទេ ព្រោះក្រុមហ៊ុននោះមិនបាននាំហិរញ្ញវត្ថុមកជួយសង្គម។
ក្រៅអំពីនោះ គណៈកម្មការបានស្នើសុំឱ្យក្រុមអ្នកមានខ្លាំងជួយសម្រាលបន្ទុកប្រទេស តាមរយៈការបង់ពន្ធលើបេតិកភណ្ឌរបស់ខ្លួន ជាពិសេសលើបេតិភណ្ឌដែលនាំទៅលាក់នៅក្រៅប្រទេស។ ក្រុមអ្នកជំនាញសេដ្ឋកិច្ចចង់បានទិន្នន័យនៃទ្រព្យសម្បត្តិគេចពន្ធ របស់ក្រុមអ្នកមាន និងមានច្បាប់ត្រួតពិនិត្យខ្លាំងទ្រព្យធនទាំងនោះដើម្បីកំណត់ការបង់ពន្ធលើទ្រព្យសម្បត្តិបានត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ