បារាំងប្តូរនាយករដ្ឋមន្រ្តីដែលមានកូដប្រជាប្រិយខ្ពស់ជាង ប្រធានាធិបតី
ចុះផ្សាយនៅថ្ងៃ៖
ស្តាប់ - ០៦:៣៧
នាយករដ្ឋមន្រ្តីបារាំងលោកអេឌ័រ ហ្វីលីព ដែលកំពុងឡើងកូដប្រជាប្រិយភាពខ្លាំង នៅក្នុងប្រទេស បានដាក់ពាក្យសុំលាលែងចេញពីមុខតំណែង នៅព្រឹកថ្ងៃសុក្រទី៣កក្កដា។ វិមានប្រធានាធិបតីបារាំង បានទទួលយកសំណើសុំលាលែងតំណែងរបស់លោកអេឌ័រ ហ្វីលីព និងបានតែងតាំង មន្រ្តីម្នាក់ ទទួលបន្ទុក ផែនការបើកទីក្រុង ឡើងវិញ នៅក្រោយ កូវីដ ឲ្យចូលកាន់តំណែងបន្ទាប់ពីលោកអេឌ័រ ហ្វីលីព។
នៅប្រទេសបារាំង វិមានប្រធានាធិបតីបានប្រកាសនៅថ្ងៃសុក្រនេះថា លោកអេឌ័រ ហ្វីលីព នាយករដ្ឋមន្រ្តីបារាំង ដ៏មានប្រជាប្រិយភាព បានដាក់ពាក្យសុំលាលែងពីមុខតំណែង។ លោកអេឌ័រ ហ្វីលីព បានដាក់ពាក្យ សុំលាលែងពីមុខតំណែងនាយករដ្ឋមន្រ្តី នៅមួយថ្ងៃក្រោយ ដែលប្រធានាធិបតីបារាំង លោកអេម៉ានុយអែលម៉ាក្រុងបានបង្ហើបឲ្យដឹងពីក្រុមការងារថ្មី ដែលលោកចង់បាន សម្រាប់ផ្លូវនយោបាយ ថ្មី នៅរយៈពេល ២ឆ្នាំចុងក្រោយនៃអាណត្តិរបស់លោក។
លោកអេឌ័រ ហ្វីលីព ដែលធ្លាប់កាន់តែ តំណែងជាចៅហ្វាយក្រុង អាវ្រ រហូតដល់ឆ្នាំ ២០១៧ ត្រូវបានលោកប្រធានាធិបតី ម៉ាក្រុង ជ្រើសរើសឲ្យកាន់តំនែងនាយករដ្ឋមន្រ្តី ៣ឆ្នាំមកហើយ។ កាលពីថ្ងៃទី ២៨មិថុនា លោកអេឌ័រ ហ្វីលីពទើបតែឈ្នះឆ្នោត ធ្វើជាចៅហ្វាយក្រុង អាវ្រ។ លោកធ្លាប់និយាយប្រាប់កាសែតថ្នាក់តំបន់មួយ ថា លោកនឹងត្រលប់ទៅ កាន់ការងារជាចៅហ្វាយក្រុង អាវ្រឲ្យបានឆាប់បំផុត បើសិនជាអាចទៅរួច។ មួយវិញ លោកនាយករដ្ឋមន្រ្តីអេឌ័រ ហ្វីលីព សុំលាលែងពីមុខតំណែងនៅពេលនេះ គឺ នៅចំពេលដែលលោកប្រធានាធិបតីបារាំង កំពុងត្រៀមរុះរើរដ្ឋាភិបាល នៅពាក់កណ្តាលអាណត្តិ។ គេអាចថា លោកអេឌ័រ ហ្វីលីព លាលែងពីមុខតំណែងនាយករដ្ឋមន្រ្តី នៅពេលនេះ ដើម្បី ត្រៀមឲ្យលោកប្រធានាធិបតី ជ្រើសរើសសាជាថ្មី សម្រាប់ដឹកនាំរដ្ឋាភិបាលថ្មី ដូចកាលពេលរុះរើរដ្ឋាភិបាលកាលពី២ឆ្នាំមុន។
សូមរំលឹកថា ចាប់តាំងពីចូលកាន់តំណែង នៅឆ្នាំ ២០១៧ លោកប្រធានាធិបតី ម៉ាក្រុង បានរុះរើរដ្ឋាភិបាល ២ដងមកហើយ។ នៅពេល រដ្ឋមន្រ្តី ១៧ រូប ត្រូវបានផ្លាស់ប្តូរ ចាកចេញពីរដ្ឋាភិបាល ដោយសារការរុះរើរដ្ឋាភិបាល កន្លងមក លោកអេឌ័រ ហ្វីលីព ត្រូវបានលោកម៉ាក្រុង រក្សា ឲ្យដឹកនាំក្បាលម៉ាស៊ីន នៅរយៈពេល៣ឆ្នាំ។ នៅក្នុងបទសម្ភាសន៍ កាលពីពាក់កណ្តាលខែមិថុនា លោកអេឌ័រ ហ្វីលីពបាននិយាយថា លោកចង់បន្តការងារ ក្នុងជួរដ្ឋាភិបាល ជាមួយលោកប្រធានាធិបតីម៉ាក្រុងរហូតដល់ចប់អាណត្តិ បើទោះជាលោកជាប់ឆ្នោត ជាចៅហ្វាយក្រុង។
តាមការស្ទង់មតិ កាលពីថ្ងៃអាទិត្យ ប្រជាជនបារាំង ៥៥%អះអាងថា ពួកគេ ចង់លោកEdouard Philippe នៅបន្តធ្វើជានាយករដ្ឋមន្រ្តី។ ប្រជាជនបារាំង ប្រហែលជាខកចិត្ត ព្រោះថា បើតាមកាសែតបារាំង លោកអេឌ័រ ហ្វីលីពអេឌ័រ ដែលសុំលាលែងពីមុខតំណែង នាយករដ្ឋមន្រ្តី នៅពេលនេះ ទំនងជានឹងមិនត្រូវលោកម៉ាក្រុង តែងតាំង ឲ្យដឹកនាំរដ្ឋាភិបាលថ្មី សាជាថ្មីនោះទេ។
នៅពេលនាយករដ្ឋមន្រ្តីមានប្រជាប្រិយភាពជាងប្រធានាធិបតី
លោកអេឌ័រ ហ្វីលីព ស្រឡាញ់ទីក្រុងអាវ្រ ដែលលោកសម្រេចឈរឈ្មោះ ទាំងនៅក្នុងពេលមានតំណែងនាយករដ្ឋមន្រ្តីក្តី ក៏គេពិបាកនឹងជឿថា លោកអេឌ័រ ហ្វីលីព សុខចិត្តបោះបង់ចោលតំណែង នាយករដ្ឋមន្រ្តី ដើម្បីត្រលប់ទៅយកតំណែងចៅហ្វាយក្រុងដ៏តូចមួយនោះដែរ។ លោកអេឌ័រ ហ្វីលីពដាក់ពាក្យសុំលាលែងពីមុខតំណែង នៅពេលនះ គឺអាចមកពីការចង់បានរបស់លោកប្រធានាធិបតីម៉ាក្រុងច្រើនជាង។
នៅថ្ងៃម្សិលមិញ លោកម៉ាក្រុង បាននិយាយសរសើរ ទំនាក់ទំនងដ៏ល្អ ប្រកបដោយការជឿទុកចិត្ត រវាងលោក ហើយនិងលោកនាយករដ្ឋមន្រ្តី អេឌ័រ ហ្វីលីព ក្នុងការងារចាត់ចែងវិបត្តិលើកនេះ ប៉ុន្តែ លោកអេឌ័រ ហ្វីលីព សុំលាលែងពីមុខតំណែងនាយករដ្ឋមន្រ្តីនេះ ក៏ជាការចង់បានរបស់លោកម៉ាក្រុងដែរ ព្រោះថា លោកម៉ាក្រុង ប្រាកដជាមិនចង់ទុក នាយករដ្ឋមន្រ្តីដែលមានកូដប្រជាប្រិយភាព ខ្ពស់ជាងលោក ឲ្យបន្តធ្វើការក្បែរលោកដែរ។
លោកអេឌ័រ ហ្វីលីព ទទួលបានប្រជាប្រិយភាពខ្លាំង ចាប់តាំងពីកើតមានវិបត្តិកូវីដ។ ជានាយករដ្ឋមន្រ្តីដែលមានចិត្តត្រជាក់ សុភាពរាបសារ ស្មោះត្រង់ និងហ៊ាន និយាយការពិត ទាក់ទងនឹងបញ្ហាសុខភាពរបស់ប្រជាជនបារាំង នៅក្នុងអំឡុងកូវីដ លោកអេឌ័រ ហ្វីលីព បានទទួលការកោតសរសើរ មិនថា ទាំងប្រជាជន និង គណបក្សប្រឆាំង។ កន្លងមកធ្លាប់មានពាក្យចចាមអារ៉ាមថា លោកអេឌ័រ ហ្វីលីព ធ្លាប់តានតឹង និយាយមិនចុះសម្រុងគ្នាជាមួយ លោកប្រធានាធិបតីម៉ាក្រុង។ លោកម៉ាក្រុង ចង់ប្រញាប់បើកទីក្រុងឡើងវិញ ប៉ុន្តែ លោកនាយករដ្ឋមន្រ្តី ហ្វីលីព ឯណោះវិញ ដែលព្រមានពីគ្រោះថ្នាក់ឆ្លងរាលដាលកូវីដ មិនយល់ស្របឲ្យគេប្រញាប់បើកទីក្រុងឡើងវិញនោះទេ។ ការគិតគូរ ខ្វាយខ្វល់ពីបញ្ហាសុខភាព របស់ប្រជាជន ធ្វើឲ្យកូដប្រជាប្រិយភាពរបស់លោកអេឌ័រ ហ្វីលីព ឡើងខ្ពស់ដាច់ឆ្ងាយជាង លោកម៉ាក្រុង ដែលស្ថិតនៅចំណាត់ថ្នាក់ទី៩ ក្នុងចំណោមបុគ្គលមានមុខមាត់ ៣៥រូបនៅបារាំង។
ដោយដក នាយករដ្ឋមន្រ្តី ដែលមានប្រជាប្រិយភាពជាងខ្លួន លោកម៉ាក្រុង អះអាង កាលពីថ្ងៃព្រហស្បតិ៍ម្សិលមិញ ថា លោកចង់ផ្តើមផ្លូវនយោបាយថ្មី ជាមួយក្រុមថ្មី ដែលមកពីគ្រប់និន្នាការនយោបាយ។
ប្រធានាធិបតីបារាំងជ្រើសរើសនាយករដ្ឋមន្រ្តីថ្មី ដែលយល់កាលៈទេសៈច្រើនជាងលោកអេឌ័រ ហ្វីលីព
វិមានប្រធានាធិបតីបារាំង បានប្រកាសឈ្មោះនាយករដ្ឋមន្រ្តីបារាំង ថ្មី គឺលោក Jean Castex ដែលជាចៅហ្វាយក្រុង តូចមួយ នៅភាគខាងត្បូងបារាំង។ មកពីគណបក្សស្តាំនិយម ដែលមិនមែនជាគណបក្សរបស់លោកម៉ាក្រុងទេនោះ លោកJean Castex ជាមនុស្សស្និទ្ធនឹងអតីតប្រធានាធិបតី បារាំងនីកូឡា សាកូហ្សី។
ថ្មីៗនេះ លោកJean Castex ទើបត្រូវបានលោកម៉ាក្រុង ជ្រើសតាំងឲ្យទទួលបន្ទុក សំណុំរឿងបើកទីក្រុង បើកសកម្មភាពសេដ្ឋកិច្ចឡើងវិញ នៅក្រោយ បិទខ្ទប់អស់២ខែដោយសារវិបត្តិកូវីដ។
តាមការពន្យល់របស់វិមានប្រធានាធិបតី លោកJean Castex ជាអ្នកនយោបាយដែលយល់ដឹង ស្ថានភាព ជាក់ស្តែង ដែលអាចមានសមត្ថភាព អនុវត្តគោលនយោបាយ ក្រោយ វិបត្តិកូវីដ ដែលលោកប្រធានាធិបតីម៉ាក្រុង បានដៅទុក សម្រាប់រយៈពេល២ឆ្នាំចុងក្រោយនៃអាណត្តិរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ