ប៉ូឡូញប្រកាសដកខ្លួនចេញពីសន្ធិសញ្ញាអន្តរជាតិ ស្តីពីអំពើហិង្សាទៅលើស្រ្តី
នៅក្នុងសន្និសីទកាសែត កាលពីថ្ងៃសៅរ៍ ទី២៥ កក្កដា២០២០ រដ្ឋមន្រ្តីក្រសួងយុត្តិធម៌ប៉ូឡូញ បានប្រកាស ថា ប៉ូឡូញនឹងដកខ្លួនចេញពី សន្ធិសញ្ញាអ៊ីស្តង់ប៊ូល ដែលមានបង្កប់ខ្លឹមសារ មិនល្អ បំផ្លាញ សង្គមប៉ូឡូញ។ តាមរដ្ឋមន្រ្តីយុត្តិធម៌ប៉ូឡូញ ក្រសួងការងារ និងគ្រួសារ នឹងចាប់បើកនិតិវិធី នៅថ្ងៃចន្ទ ស្អែកនេះ ដើម្បី ដកប៉ូឡូញ ចេញពីសន្ធិសញ្ញាអន្តរជាតិ ដែលតាមពិត មានគោលដៅ បង្ការ ការពារកុំឲ្យមានអំពើហិង្សាទៅលើស្រ្តី។
ចុះផ្សាយនៅថ្ងៃ៖ កែប្រែថ្ងៃទី៖
នៅពេលប៉ូឡូញផ្តល់សច្ចាប័ន ចូលជាសមាជិករបស់សន្ធិសញ្ញា អន្តរជាតិ ស្តីពីការពារស្រ្តី ពីអំពើហិង្សា នៅឆ្នាំ ២០១៥ ប៉ូឡូញដឹកនាំដោយរដ្ឋាភិបាលមកពីរដ្ឋាភិបាល កណ្តាល ពោលគឺសេរី មិនជ្រុលនិយម។ ប៉ុន្តែ រដ្ឋាភិបាលប៉ូឡូញ សព្វថ្ងៃ មានប្រភពចេញមកពី គណបក្សអភិរក្សជ្រុលនិយម ដែលស្និទ្ធទៅខាងក្រុមក្រុមគ្រិស្តសាសនិក និងដែលចង់លើកតម្កើង តម្លៃប្រពៃណីអប់រំរបស់គ្រួសារប៉ូឡូញ បានវាយតម្លៃថា សន្ធិសញ្ញាអន្តរជាតិ ដើម្បីការពារស្ត្រី ពីអំពើហិង្សា តាមពិត ដើបញ្ច្រាសនឹងតម្លៃគ្រួសារ ដែលប្រកាន់គ្រិស្តសាសនា នៅប៉ូឡូញ។
នៅក្នុងសន្និសីទកាសែត កាលពីថ្ងៃម្សិលមិញ រដ្ឋមន្រ្តី យុត្តិធម៌ ប៉ូឡូញ បានអះអាងថា ប៉ូឡូញ ត្រូវតែដកខ្លួនចេញពីសន្ធិសញ្ញា អ៊ីស្តង់ប៊ូល ព្រោះថា សន្ធិសញ្ញាបានបំផ្លាញសិទ្ធិអប់រំរបស់ឪពុកម្តាយ ដោយបានបើកសិទ្ធិឲ្យសាលារៀនជាអ្នកបង្រៀនក្មេងពីសិទ្ធិស្មើគ្នា រវាងបុរស និងស្រ្តី។ សម្រាប់រដ្ឋមន្រ្តីយុត្តិធម៌ ប៉ូឡូញ សន្ធិសញ្ញាអន្តរជាតិស្តីពីអំពើហិង្សាប្រឆាំងនឹងស្រ្តី មានបង្កប់ន័យមួយចំនួនដែលមានលក្ខណៈមនោគមវិជ្ជា។ រដ្ឋមន្រ្តីនៃរដ្ឋាភិបាលអភិរក្សជ្រុលនិយម រូបនេះ ធ្លាប់បាននិយាយសន្ធិសញ្ញា អ៊ីស្តង់ប៊ូល ជាការបង្កើតថ្មី បង្កើតចលនាស្រ្តី ដែលមានគោលដៅ លើកស្ទួយ មនោគមវិជ្ជានៃមនុស្សស្រឡាញ់ភេទដូចគ្នា។
មើលទៅ ប្រហែលដោយសាររឿង ស្រឡាញ់ភេទដូចគ្នា នេះហើយ ដែលធ្វើឲ្យរដ្ឋាភិបាលអភិរក្សជ្រុលនិយមប៉ូឡូញ ឃ្នើសចិត្ត និងចង់ដកប្រទេសចេញពីសន្ធិសញ្ញា អន្តរជាតិស្តីពីអំពើហិង្សាទៅលើស្រ្តី ព្រោះថា នៅក្នុងសន្ធិសញ្ញាមួយនេះ មានចែង ផងដែរពីការប្រឆាំងនឹងការរើសអើងផ្លូវភេទ។ នៅក្នុងយុទ្ធនាការឃោសនាបោះឆ្នោត នៅប៉ុន្មានខែមុននេះ លោកប្រធានាធិបតី ប៉ូឡូញ Dudaធ្លាប់បានចាត់ទុកសិទ្ធិរបស់មនុស្សស្រឡាញ់ភេទដូចគ្នា នេះ ថា ជាមនោគមវិជ្ជាដែលបំផ្លាញ សង្គមអាក្រក់ជាង កុម្មុយនិស្តទៅទៀត។ លោក Duda ធ្លាប់បាននិយាយសន្យាហើយថា នៅពេលលោកក្លាយជាប្រធានាធិបតី ប៉ូឡូញ នោះលោកនឹងហាមមិនឲ្យមានអាពាហ៍ពិពាហ៍រវាងមនុស្សស្រឡាញ់ភេទដូចគ្នា ហើយនិងសិទ្ធិសុំកូនចិញ្ចឹមសម្រាប់មនុស្សដែលស្រឡាញ់ភេទដូចគ្នាជាដើម។ ចង់ ឬមិនចង់ ការជាប់ឆ្នោតធ្វើជាប្រធានាធិបតី ប៉ូឡូញ រយៈពេល ៥ឆ្នាំ ទៅមុខរបស់លោកDuda គឺជាសុបិនអាក្រក់ សម្រាប់ មនុស្សស្រី និងមនុស្សស្រឡាញ់ភេទដូចគ្នា នៅប៉ូឡូញ។
កាលពីថ្ងៃសុក្រ ទី ២៤កក្កដា ស្រ្តីប៉ូឡូញ រាប់ពាន់នាក់បានធ្វើបាតុកម្មតវ៉ា នៅមុខក្រសួងការងារ និងគ្រួសារប៉ូឡូញ បន្ទាប់ពីរដ្ឋមន្រ្តី របស់ក្រសួងនេះ និយាយប្រាប់វិទ្យុកាតូលិក នៅសប្តាហ៍មុនពីគម្រោងដកប៉ូឡូញ ចេញពី សន្ធិសញ្ញា អន្តរជាតិ ស្តីពីអំពើហិង្សាទៅលើស្រ្តី។ នៅលើបដា មានសរសេរថា គណបក្សរបស់លោកប្រធានាធិបតី Duda គឺជាឋាននរករបស់មនុស្សស្រី ឬពាក្យស្រែកអំពាវនាវឲ្យរដ្ឋាភិបាលប្រយុទ្ធប្រឆាំងនឹងជំងឺកូវីដ ជាជាងមកបំផ្លាញសិទ្ធិមនុស្សស្រី។
តើអ្វីទៅជាសន្ធិសញ្ញា អន្តរជាតិ ស្តីពីអំពើហិង្សាប្រឆាំងនឹងស្រ្តី?
សន្ធិសញ្ញាអន្តរជាតិ ស្តីពីអំពើហិង្សាទៅលើស្រ្តី ឬដែលគេហៅថា សន្ធិសញ្ញាទីក្រុងអ៊ីស្តង់ប៊ូល ព្រោះវាចាប់កំណើតឡើងនៅអ៊ីស្តង់ប៊ូល ក្នុងប្រទេសតួកគី ត្រូវបានផ្តួចផ្តើមគំនិត បង្កើតឡើង ដោយក្រុមប្រឹក្សាអឺរ៉ុប នៅឆ្នាំ ២០១១។ ប្រទេសប្រមាណ ៤៥បានចុះហត្ថលេខា ដែលនៅក្នុងនោះ មានតែ ៣៤ប៉ុណ្ណោះ ដែលភាគច្រើនជា ប្រទេសនៅអឺរ៉ុប បានផ្តល់សច្ចាប័ន។ ប៉ូឡូញជាដើមបានចុះហត្ថលេខាលើសន្ធិសញ្ញា អ៊ីស្តង់ប៊ូល នៅឆ្នាំ ២០១២ និងត្រូវរង់ចាំ ៣ឆ្នាំ ក្រោយ ទើបផ្តល់សច្ចាប័នលើសន្ធិសញ្ញា ស្តីពីអំពើហិង្សាប្រឆាំងនឹងស្រ្តី។
ក្រុមប្រឹក្សាអឺរ៉ុបមានគំនិតបង្កើតសន្ធិសញ្ញានេះឡើង បន្ទាប់ពីសង្កេតឃើញថា ប្រទេសជាច្រើន នៅអឺរ៉ុប មានច្បាប់ និងចាត់វិធានការមិនស្មើគ្នា នោះទេ ដើម្បីការពារសិទ្ធិស្រ្តី។ នៅប្រទេសអឺរ៉ុបខ្លះ ស្រ្តីនៅតែរងគ្រោះដោយសារអំពើហិង្សា គ្រប់រូបភាព និងមានសិទ្ធិមិនស្មើនឹងបុរស។
តាមរយៈ សន្ធិសញ្ញា អន្តរជាតិ ស្តីពីអំពើហិង្សា ទៅលើស្រ្តី ក្រុមប្រឹក្សាអឺរ៉ុបចង់ឲ្យប្រទេសជាសមាជិក ចូលរួម លើកកំពស់សិទ្ធិស្រ្តី និងចាត់វិធានការ នានាដើម្បី បង្ការទុកកុំឲ្យស្រ្តីធ្លាក់ខ្លួន រងគ្រោះដោយសារអំពើហិង្សា។ ជារួម សន្ធិសញ្ញា អ៊ីស្តង់ប៊ូល ប្រៀបបាននឹងគម្ពី ការពារ មនុស្សស្រី អីចឹង ព្រោះវាការពារ មនុស្សស្រ្តី ពីអំពើហិង្សាគ្រប់ទម្រង់ ដែលមានតាំងពីអំពើហិង្សា ក្នុងគ្រួសារ អំពើហិង្សាផ្លូវភេទ ការរើសអើងជាដើម។ សន្ធិសញ្ញាអ៊ីស្តង់ប៊ូលមានលក្ខណៈចាប់បង្ខំ ឲ្យរដ្ឋាភិបាលរបស់ប្រទេសសមាជិកត្រូវ តែចាត់វិធានការការពារចាំបាច់ មនុស្សស្រី ហើយនិងតាមចាប់ ផ្តន្ទាទោស ឧក្រិដ្ឋជន ដៃដល់ដែលប្រព្រឹត្តអំពើហិង្សាទៅលើស្រ្តី។
សន្ធិសញ្ញាដ៏ចម្រូងចម្រាសសម្រាប់ប្រទេសមួយចំនួន
តាមការអះអាងរបស់រដ្ឋមន្រ្តីយុត្តិធម៌ប៉ូឡូញ កំណែទម្រង់ប៉ុន្មានឆ្នាំចុងក្រោយនេះ ធ្វើឲ្យប៉ូឡូញមានច្បាប់ ឧបករណ៍គ្រប់គ្រាន់ដើម្បីការពារមនុស្សស្រីពីអំពើហិង្សា ដោយមិនចាំបាច់ត្រូវការសន្ធិសញ្ញាអន្តរជាតិ អ៊ីស្តង់ប៊ូល។
ដោយពិតទៅ មិនមែនមានតែប៉ូឡូញទេ ដែល ចង់ដកខ្លួនចេញពីសន្ធិសញ្ញា អ៊ីស្តង់ប៊ូល។ មានប្រទេសសមាជិកមួយចំនួន ចង់ដោះដៃ ចេញពីសន្ធិសញ្ញា ដែលគេចាត់ទុកថា ជាចម្រូងចម្រាស ប៉ះពាល់ដល់តម្លៃគ្រួសារប្រពៃណីរបស់ប្រទេស។ ប្រទេសភាគច្រើន ដែលមិនចូលចិត្តសន្ធិសញ្ញា នេះភាគច្រើនជាប្រទេសអភិរក្សនិយម ដែលមិនគាំទ្រ ផ្តល់សិទ្ធិសេរីភាព ដល់មនុស្សស្រឡាញ់ភេទដូចគ្នា ដូចជាតួកគី ហុងគ្រី ជាដើម។ សភាហុងគ្រី កាលពីខែឧសភាកន្លងទៅ បានបោះឆ្នោត មិនផ្តល់សច្ចាប័នទៅលើសន្ធិសញ្ញា បន្ទាប់ពីប្រមុខរដ្ឋាភិបាល ហុងគ្រីវាយតម្លៃថា សន្ធិសញ្ញាអន្តរជាតិបង្កើតឡើងដោយក្រុមប្រឹក្សាអឺរ៉ុប មានគោលដៅជំរុញ អន្តោប្រវេសន៍ខុសច្បាប់ ហើយនិងមនោគមវិជ្ជាដែលបំផ្លាញ និយមន័យភេទរបស់មនុស្ស។ ចំណែកសភាស្លូវ៉ាគីវិញ បានបោះឆ្នោត ទាត់ចោល សច្ចាប័ន ក្នុងហេតុផលថា សន្ធិសញ្ញាអន្តរជាតិស្តីពីអំពើហិង្សាទៅលើស្រ្តី មានដើរប្រញ្ច្រាសទិស ផ្ទុយពីនិយមន័យអាពាហ៍ពិពាហ៍ នៅក្នុងរដ្ឋធម្មនុញ្ញ ដែលនិយាយតែពីអាពាហ៍ពិពាហ៍រវាងមនុស្សភេទផ្សេងគ្នា គឺគ្មានមនុស្សដែលស្រឡាញ់ភេទដូចគ្នានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ