បារាំងក្លាយជាប្រទេសអឺរ៉ុបទី១ ដែលមានករណីឆ្លងជំងឺកូវីដ ច្រើនបំផុត ជិត ៦ម៉ឺននាក់ក្នុងមួយថ្ងៃ
នៅប្រទេសបារាំង ករណីឆ្លងរាលដាលជំងឺកូវីដបានកើនឡើងយ៉ាងឆាប់រហ័ស រហូតធ្វើឲ្យបារាំងក្លាយជាប្រទេសអឺរ៉ុបដំបូងគេដែលមានករណីឆ្លងជំងឺកូវីដច្រើន រហូតដល់១,៦លាននាក់។ អាជ្ញាធរសុខភាពបារាំងបានទទូចសុំ ជាថ្មីម្តងទៀត ឲ្យប្រជាជនបារាំងគោរព វិធានការបិទខ្ទប់ទីក្រុង ដើម្បីកាត់បន្ថយ ករណីឆ្លងរាលដាលជំងឺកូវីដ ហើយនិងការដាក់សម្ពាធ នៅមន្ទីរពេទ្យ។
ចុះផ្សាយនៅថ្ងៃ៖
ស្តាប់ - ០២:៣៣
រលកទី២នៃជំងឺរាតត្បាតកូវីដ ១៩ បោកសន្ធប់ និងលឿនខ្លាំងនេះ។ នេះជាការវាយតម្លៃ របស់អគ្គនាយកសុខភាពបារាំង លោកJérome Salomon នៅក្នុងសន្និសីទកាសែតស្តីពីការវិវឌ្ឍនៃជំងឺកូវីដ ១៩ក្នុងទឹកដីបារាំង ។ តាមអគ្គនាយកសុខភាពបារាំង តួលេខនៅថ្ងៃព្រហស្បតិ៍បង្ហាញថា ក្នុងរយៈពេល តែ២៤ម៉ោង អ្នកឆ្លងកូវីដថ្មី មានដល់ទៅ ជិត ៦ម៉ឺននាក់ (៥៨០០០នាក់) គឺជាចំនួនដ៏ច្រើន មិនធ្លាប់មានពីមុនមក រហូតធ្វើឲ្យបារាំង ដែលមានចំនួនអ្នកឆ្លងកូវីដ សរុប ជាង ១លាន ៦សែននាក់ ក្លាយជាប្រទេសអឺរ៉ុបទី១ដែលមានចំនួនអ្នកឆ្លងកូវីដច្រើន។
ករណីឆ្លងកូវីដបានកើនឡើង យ៉ាង តិច ៤ម៉ឺននាក់ក្នុងមួយថ្ងៃៗ នៅបន្ទាប់ពីបារាំង បានបង្កើនការធ្វើតេស្ត លើមនុស្សច្រើនជាង ១លាននាក់ ក្នុងមួយសប្តាហ៍។ និន្នាការកើនឡើងនៃតេស្តវិជ្ជមាន ជំងឺកូវីដ កំពុងដាក់សម្ពាធលើប្រព័ន្ធមន្ទីរពេទ្យបារាំង ដែលមានគ្រែសម្រាប់អ្នកជំងឺធ្ងន់ធ្ងរ ច្រើនបំផុត ១ម៉ឺន គ្រែ នៅទូទាំងប្រទេស។
តាម អគ្គនាយកសុខភាពបារាំង លោកJérome Salomon នៅថ្ងៃព្រហស្បតិ៍ម្សិលមិញ នៅក្នុងរយៈពេលតែ២៤ម៉ោង មន្ទីរពេទ្យបានទទួលអ្នកជំងឺកូវីដថ្មី ជិត ៣ពាន់នាក់ ចំណែកអ្នកជំងឺ ៤៤៧នាក់ ត្រូវបញ្ជូនទៅ កាន់បន្ទប់សង្រ្គោះបន្ទាន់ ដែលធ្វើឲ្យចំនួនអ្នកជំងឺនៅបន្ទប់សង្រ្គោះបន្ទាន់មានចំនួនកើនឡើងដល់ ជាង ៤ពាន់នាក់។ តាមលោកJérome Salomon ដដែល អ្នកជំងឺម្នាក់ ក្នុងចំណោម ៤នាក់ មិនអាចរួចរស់ជីវិត នៅក្រោយ ពេលទៅដល់បន្ទប់សង្រ្គោះបន្ទាន់។ នៅបារាំង មនុស្សជិត ៤០០នាក់បានស្លាប់ដោយសារកូវីដ កាលពីថ្ងៃព្រហស្បតិ៍ម្សិលមិញ ដែលធ្វើចំនួនមនុស្សស្លាប់សរុប មានចំនួន ជាង ៣៨ ០០០នាក់។
ប្រឈមនឹងរលកទី២នៃជំងឺកូវីដ ដែលកាចសាហាវខ្លាំង និងអាចយូរអង្វែង បើប្រៀបធៀបនឹងរលកទី ១ កាលពីខែមីនាកន្លងទៅ រដ្ឋមន្រ្តីសុខាភិបាលបារាំង លោកOlivier Véran បានអំពាវនាវឲ្យប្រជាជនបារាំង ចូលរួម គោរពឲ្យបានម៉ត់ចត់ វិធានការបិទខ្ទប់ទីក្រុងជាលើកទី២ ដែលលោកប្រធានាធិបតី បារាំង អេម៉ានុយអែល ម៉ាក្រុង បានប្រកាសកាលពីថ្ងៃពុធ សប្តាហ៍មុន។
ដោយពឹងផ្អែកលើរបាយការណ៍របស់វិទ្យាស្ថាន ប៉ាស្ទ័រ រដ្ឋមន្រ្តីក្រសួងសុខាភិបាលបារាំង បានអះអាងថា បើសិនគេគោរពវិធានការបិទទីក្រុងឲ្យបាន១០០ភាគរយ នោះ គេសង្ឃឹមថា ចំនួន អ្នកជំងឺ នៅបន្ទប់សង្រ្គោះបន្ទាន់ នឹងកើនឡើងខ្ពស់បំផុត នៅត្រឹម ៦ពាន់នាក់ នៅពាក់កណ្តាលខែ វិច្ឆិកា។ ប៉ុន្តែ បើសិនគេមិនធ្វើអ្វីសោះ មិនគោរពវិធានការរបស់រដ្ឋាភិបាល នោះ អ្នកជំងឺធ្ងន់ធ្ងរ ដែលត្រូវចូលបន្ទប់សង្រ្គោះបន្ទាន់ នឹងកើនដល់ ៩ពាន់នាក់ ដែលនឹងធ្វើឲ្យមន្ទីរពេទ្យ ត្រូវច្រាលចល់អ្នកជំងឺ លែងមានគ្រែ គ្រប់គ្រាន់ សម្រាប់ដាក់អ្នកជំងឺ នៅពាក់កណ្តាលខែ វិច្ឆិកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ