អ៊ីរ៉ង់និងទីភ្នាក់ងារបរិមាណូអន្តរជាតិរកឃើញ កិច្ចព្រមព្រៀង នៅ ២ថ្ងៃមុនឱសានវាទរបស់សភាអ៊ីរ៉ង់
បន្ទាប់ពីចរចា យ៉ាងស្វិតស្វាញនៅទីក្រុងតេហេរ៉ង់ ទីភ្នាក់ងារថាមពលបរិមាណូអន្តរជាតិ និងភាគីអ៊ីរ៉ង់ បានរកឃើញកិច្ចព្រមព្រៀងមួយ កាលពីល្ងាចថ្ងៃអាទិត្យម្សិលមិញ។ កិច្ចព្រមព្រៀងដែលនឹងអនុញ្ញាតឲ្យទីភ្នាក់ងារអន្តរជាតិតាមដានសកម្មភាពនុយក្លេអ៊ែររបស់អ៊ីរ៉ង់ ដូចមុន ធ្វើឡើង នៅ២ថ្ងៃ មុនឱសានវាទរបស់សភាអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:២៤
ជាមួយ រដ្ឋាភិបាលអ៊ីរ៉ង់ ទីភ្នាក់ងារថាមពលបរិមាណូអន្តរជាតិ បានរកឃើញកិច្ចព្រមព្រៀងយ៉ាងប្រផិតប្រផើយបំផុត ព្រោះថា នៅតែ២ថ្ងៃទៀតប៉ុណ្ណោះ ច្បាប់ថ្មី របស់សភាអ៊ីរ៉ង់ នឹងដាក់កំហិត កាត់បន្ថយ ការចូលត្រួតពិនិត្យរបស់មន្រ្តីទីភ្នាក់ងារថាមពលនុយក្លេអ៊ែរ របស់អង្គការសហប្រជាជាតិ នៅតាមទីតាំង នុយក្លេអ៊ែរ ក្នុងទឹកដី អ៊ីរ៉ង់។
ទៅតាមច្បាប់ថ្មីរបស់សភា អ៊ីរ៉ង់ ចាប់តាំង ពីថ្ងៃទី២៣កុម្ភៈ ស្អែកតទៅត ទីភ្នាក់ងារ ថាមពលបរិមាណូអន្តរជាតិ មិនអាចចូលត្រួតពិនិត្យ ទីតាំងដែល សង្ស័យ ថា មានអភិវឌ្ឍសកម្មភាពនុយក្លេអ៊ែរយោធានោះទេ បើសិនជាអាមេរិកមិនព្រមដកទណ្ឌកម្មសេដ្ឋកិច្ចពីអ៊ីរ៉ង់ ជាមុននោះទេ។
សម្រាប់ប្រធានទីភ្នាក់ងារ ថាមពលបរិមាណអន្តរជាតិ កិច្ចព្រមព្រៀង កាលពី ថ្ងៃអាទិត្យ គ្រាន់តែជាកិច្ចព្រមព្រៀងបណ្តោះអាសន្ន មានរយៈពេល ៣ខែ ដែលនៅក្នុងនោះ អ៊ីរ៉ង់អាចផ្លាស់ប្តូរចិត្តបានគ្រប់ពេលវេលា។ ប៉ុន្តែ យ៉ាងហោចណាស់ វាជាកិច្ចព្រមព្រៀង បន្ទាន់ ដែលគេ ត្រូវការចាំបាច់ដើម្បីតាមដានឲ្យបានជាប់ជានិច្ចសកម្មភាពនុយក្លេអ៊ែររបស់អ៊ីរ៉ង់។
តាមកិច្ចព្រមព្រៀងនុយក្លេអ៊ែរអ៊ីរ៉ង់ ឆ្នាំ ២០១៥ ទីភ្នាក់ងារថាមពលបរិមាណូអន្តរជាតិ មានសិទ្ធិចូលត្រួតពិនិត្យ រោងចក្រ និងទីតាំងយោធាជាច្រើន ដើម្បីធានាថា អ៊ីរ៉ង់ គ្មានធ្វើសកម្មភាពលួចលាក់ដើម្បី ផលិតអាវុធនុយក្លេអ៊ែរ។
ប៉ុន្តែ នៅក្រោយលោកដូណាល់ ត្រាំ ដកអាមេរិកចេញពីកិច្ចព្រមព្រៀងនៅ ឆ្នាំ ២០១៨ អ៊ីរ៉ង់ បានដោះដៃ បន្តិចម្តងៗ លែងគោរពតាមការសន្យា ក្នុងកិច្ចព្រមព្រៀង ឆ្នាំ ២០១៥ តទៅទៀត។
ថ្មីៗនេះទៀត សភាអ៊ីរ៉ង់បានបោះឆ្នោត ទាមទារឲ្យរដ្ឋាភិបាល កាត់បន្ថយសកម្មភាពចូលត្រួតពិនិត្យរបស់ទីភ្នាក់ងារថាមពលនុយក្លេអ៊ែរអន្តរជាតិ។ តាមអនុរដ្ឋមន្រ្តីការបរទេសអ៊ីរ៉ង់ លោក Abbas Araghchi នៅក្រោយច្បាប់ថ្មីចូលជាធរមាន អ៊ីរ៉ង់មិនដកខ្លួនចេញពីកិច្ចព្រមព្រៀងទេ ប៉ុន្តែ សកម្មភាពត្រួតពិនិត្យរបស់ទីភ្នាក់ងារអន្តរជាតិនឹងត្រូវកាត់បន្ថយ ប្រមាណ ២០%។ មួយវិញទៀត អ៊ីរ៉ង់ នឹងមិនផ្តល់ព័ត៌មានលម្អិត ដូចជារូបភាពវីដេអូ ស្តីពីសកម្មភាព និងគ្រឿងបរិក្ខារ នៅតាមទីតាំងជាច្រើន ដូចមុននោះទេ ដរាបណាអាមេរិកមិនព្រមដកទណ្ឌកម្មសេដ្ឋកិច្ចចេញពីអ៊ីរ៉ង់ ក្នុងរយៈពេល ៣ខែទៅមុខ។
ចាប់តាំងពីលោកចូ បៃដិនចូលកាន់អំណាច អាមេរិកបានបង្ហាញចេតនាចង់ត្រលប់មកចូលកិច្ចព្រមព្រៀងនុយក្លេអ៊ែរអ៊ីរ៉ង់ ឡើងវិញ។ ប៉ុន្តែ ភាគីទាំងពីរ ទាំងអ៊ីរ៉ង់ និងអាមេរិក ប្រចាំគ្នា ដោយអ៊ីរ៉ង់បានទាមទារឲ្យអាមេរិកដកទណ្ឌកម្មជាមុនសិន ទើបខ្លួនត្រលប់មកគោរពកិច្ចសន្យាដូចដើម។ នៅថ្ងៃព្រហស្បតិ៍សប្តាហ៍មុន អាមេរិកបានយល់ព្រមតាមសម្ព័ន្ធមិត្តអឺរ៉ុប ដែលចង់ឲ្យមានការចរចា ស្តីពីកិច្ចព្រមព្រៀងនុយក្លេអ៊ែរ ជាមួយភាគីអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ