ទីភ្នាក់ងារIAEA៖ អ៊ីរ៉ង់រំលោភកិច្ចព្រមព្រៀង នុយក្លេអ៊ែរ ដោយចាប់ផ្តើមផលិតលោហៈអ៊ុយរ៉ាញ៉ូម
អ៊ីរ៉ង់បានបោះមួយជំហានមួយ នៅលើផ្លូវរំលោភកិច្ចព្រមព្រៀងនុយក្លេអ៊ែរអន្តរជាតិ ដែលអ៊ីរ៉ង់ និងប្រទេសមហាអំណាចទាំង ៦ ធ្លាប់បានចុះហត្ថលេខាជាមួយ គ្នា កាលពីឆ្នាំ ២០១៥។ តាមទីភ្នាក់ងារថាមពលនុយក្លេអ៊ែរ អន្តរជាតិ IAEA អ៊ីរ៉ង់បានចាប់ផ្តើមផលិតលោហៈ អ៊ុយរ៉ាញ៉ូម នៅក្នុងរោងចក្រមួយភាគកណ្តាលប្រទេសអ៊ីរ៉ង់។ នៅប៉ុន្មានម៉ោងមុន ទីភ្នាក់ងារ ថាមពលបរិមាណូ ចេញសេចក្តីថ្លែងការណ៍ កាលពីថ្ងៃពុធ រដ្ឋមន្រ្តីការបរទេសនុយក្លេអ៊ែរអ៊ីរ៉ង់បានព្រមានហើយថា អ៊ីរ៉ង់នឹងអាចចាត់វិធានការផ្សេងទៀត ដើម្បីវាយបកនឹងភាពអសកម្ម របស់អឺរ៉ុប ហើយនិងការរំលោភកិច្ចសន្យារបស់អាមេរិក។
ចុះផ្សាយនៅថ្ងៃ៖
ស្តាប់ - ០២:៣០
នៅក្រោយ ចូលពិនិត្យ ឆែកមើលសារធាតុ ជាង ៣ក្រាម នៅរោងចក្រ Isfahan ភាគកណ្តាលប្រទេសអ៊ីរ៉ង់ កាលពីសប្តាហ៍មុន ទីភ្នាក់ងារថាមពលនុយក្លេអ៊ែរអន្តរជាតិបានជូនដំណឹងនៅ យប់ថ្ងៃពុធថា អ៊ីរ៉ង់បានចាប់ផ្តើមផលិតលោហៈអ៊ុយរ៉ាញ៉ូម ដែលត្រូវហាមឃាត់ ទៅតាមកិច្ចព្រមព្រៀងអន្តរជាតិស្តីពីនុយក្លេអ៊ែរអ៊ីរ៉ង់ឆ្នាំ ២០១៥។
ភាគីអ៊ីរ៉ង់ បាននិយាយការពារខ្លួនថា ការផលិតលោហៈអ៊ុយរ៉ាញ៉ូមចាំបាច់សម្រាប់ម៉ាស៊ីនប្រតិករ ដែលប្រើក្នុងការស្រាវជ្រាវ នៅទីក្រុងតេហេរ៉ង់។ ប៉ុន្តែ ទីភ្នាក់ងារថាមពលបរិមាណូបានសំដែងការព្រួយបារម្ភ ព្រោះថា គេក៏អាចយកលោហៈអ៊ុយរ៉ាញ៉ូម ទៅផលិតក្បាលគ្រាប់នុយក្លេអ៊ែរផងដែរ។
សាធារណរដ្ឋអ៊ីស្លាមអ៊ីរ៉ង់ បានបដិសេធ ថា គ្មានមហិច្ឆតា ចង់ផលិតអាវុធបរិមាណូ នោះទេ ប៉ុន្តែ ទីភ្នាក់ងារថាមពលនុយក្លេអ៊ែរអន្តរជាតិធ្លាប់បានលើកឡើងផ្ទុយពីនេះ នៅឆ្នាំ ២០១១ ពោលគឺនៅមុនកើតចេញកិច្ចព្រមព្រៀងនុយក្លេអ៊ែរអ៊ីរ៉ង់ ដែលនៅក្នុងនោះ អ៊ីរ៉ង់ បានសន្យាលះបង់ចោលកម្មវិធី នុយក្លេអ៊ែរយោធា ជាថ្នូរនឹងការដកទណ្ឌកម្មសេដ្ឋកិច្ចរបស់អាមេរិក។
ទៅតាមផែនការសកម្មភាពរួម ក្នុងកិច្ចព្រមព្រៀងនុយក្លេអ៊ែរអ៊ីរ៉ង់ ដែលមានគោលដៅ រារាំងអ៊ីរ៉ង់មិនឲ្យអាចផលិតអាវុធនុយក្លេអ៊ែរ អ៊ីរ៉ង់ត្រូវហាមមិនឲ្យផលិតលោហៈអ៊ុយរ៉ាញ៉ូម ឬភ្លុយតូញ៉ូម ក្នុងរយៈពេល ១៥ឆ្នាំ។ នៅ១០ឆ្នាំ ក្រោយ ចុះហត្ថលេខា អ៊ីរ៉ង់ អាចចាប់ផលិតលោហៈអ៊ុយរ៉ាញ៉ូម ក្នុងបរិមាណតិចតួច សម្រាប់ការស្រាវជ្រាវ របស់ខ្លួន ប៉ុន្តែ ដោយមានការយល់ព្រមពីប្រទេសមហាអំណាច ដែលជាហត្ថលេខី។
នៅក្រោយ អាមេរិកដកខ្លួនចេញពីកិច្ចព្រមព្រៀង នៅ ឆ្នាំ ២០១៨ និងត្រលប់មកដាក់ទណ្ឌកម្មសេដ្ឋកិច្ចសាជាថ្មីលើអ៊ីរ៉ង់ រដ្ឋាភិបាលអ៊ីរ៉ង់ បានដោះដៃ បន្តិចម្តងៗ លែងគោរពតាមកិច្ចព្រមព្រៀង ដូចមុន។ តាមទីភ្នាក់ងារថាមពលនុយក្លេអ៊ែរអន្តរជាតិ អ៊ីរ៉ង់បានរំលោភកាន់តែខ្លាំង កិច្ចព្រមព្រៀងនុយក្លេអ៊ែរ ដោយបានត្រលប់ទៅចម្រើនសារធាតុអ៊ុយរ៉ាញ៉ូម ក្នុងកម្រិត ២០% ដែលអ៊ីរ៉ង់ ធ្លាប់ធ្វើមុនចុះកិច្ចព្រមព្រៀង។
អ៊ីរ៉ង់ និងអាមេរិក បានទាមទារគ្នាទៅវិញ ទៅមក។ នៅពេលអាមេរិកនិយាយថា នឹងលុបចោលទណ្ឌកម្មសេដ្ឋកិច្ច នៅពេលអ៊ីរ៉ង់ ត្រលប់មកគោរពកិច្ចព្រមព្រៀងដូចដើម អ៊ីរ៉ង់ ឯណោះវិញ ទាមទារឲ្យអាមេរិកដកចោលទណ្ឌកម្មជាមុនសិន ទើបអ៊ីរ៉ង់ ត្រលប់ទៅចូលគោរពកិច្ចព្រមព្រៀង។ សម្រាប់រដ្ឋមន្រ្តី ការបរទេសអ៊ីរ៉ង់ ទ្វារបើកសម្រាប់អាមេរិកកាន់តែតូច ព្រោះថា ប្រទេសរបស់លោកនឹងចាត់វិធានការបន្ថែមទៀត ដើម្បីឆ្លើយតបនឹងចម្លើយអវិជ្ជមានរបស់ប្រទេសលោកខាងលិច។ សភាអ៊ីរ៉ង់បានបោះឆ្នោត សម្រេចហើយថា នៅថ្ងៃទី ២១ កុម្ភៈ បើសិនជានៅតែគ្មានសញ្ញាវិជ្ជមានទេ នោះ អ៊ីរ៉ង់នឹងហាមលែងឲ្យមន្រ្តីរបស់ទីភ្នាក់ងារថាមពលបរិមាណូអន្តរជាតិចូលទៅអង្កេត នៅក្នុងរោងចក្រអ៊ីរ៉ង់ តទៅទៀត។
នៅក្នុងសេចក្តីថ្លែងការណ៍ នៅថ្ងៃពុធ ទីភ្នាក់ងារថាមពលបរិមាណូអន្តរជាតិបានជូនដំណឹងស្តីពីការវិវឌ្ឍចុងក្រោយទៅប្រទេសសមាជិករបស់ខ្លួន។ នៅថ្ងៃព្រហស្បតិ៍ រុស្ស៊ី ដែលជាសម្ព័ន្ធមិត្តរបស់អ៊ីរ៉ង់ បានអំពាវនាវអ៊ីរ៉ង់ ឲ្យអត់ធ្មត់ និងទទួលខុសត្រូវខ្ពស់។ យល់ថា អ៊ីរ៉ង់ លែងចង់ត្រលប់ទៅ រកស្ថានភាពដូចដើម ដូចនៅពេលចុះកិច្ចព្រមព្រៀងនុយក្លេអ៊ែរ ម៉ូស្គូបានទាមទារឲ្យរដ្ឋបាលអាមេរិករបស់លោកចូ បៃដិន ដកទណ្ឌកម្មសេដ្ឋកិច្ចចេញពីអ៊ីរ៉ង់ និងឈប់អូសបន្លាយ វិបត្តិនុយក្លេអ៊ែរអ៊ីរ៉ង់តទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ