នុយក្លេអ៊ែរអ៊ីរ៉ង់៖សហរដ្ឋអាមេរិកបន្ទន់ជំហរដាក់អ៊ីរ៉ង់ តែអ៊ីរ៉ង់បន្តពើងទ្រូង
នៅថ្ងៃសុក្រ ទី១៩ កុម្ភៈ អ៊ីរ៉ង់បានអំពាវនាវជាថ្មីឲ្យរដ្ឋបាលអាមេរិករបស់ប្រធានាធិបតីលោកចូ បៃដិនលើកទ័ណ្ឌកម្មទាំងអស់ចេញពីអ៊ីរ៉ង់។ ទណ្ឌកម្មដែលអ៊ីរ៉ង់ចង់និយាយនេះ គឺទណ្ឌកម្មដែលដាក់ដោយអតីតប្រធានាធិបតីអាមេរិកលោកដូណាល់ ត្រាំ។ ការអំពាវនាវនេះបានធ្វើឡើង ខណៈដែលបារាំង អាល្លឺម៉ង់ អង់គ្លេស និងសហរដ្ឋអាមេរិកបានជំរុញឲ្យអ៊ីរ៉ង់ត្រឡប់ទៅគោរពឲ្យបានពេញលេញនូវកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាឆ្នាំ ២០១៥។ ទន្ទឹមគ្នានេះ រដ្ឋបាលអាមេរិកក៏បានបោះដៃរកអ៊ីរ៉ង់ដោយត្រៀមផ្តើមកិច្ចសន្ទនាឡើងវិញ និងបានធ្វើសម្បទានមួយចំនួនឲ្យអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:៤៨
គឺនៅក្រោយកិច្ចប្រជុំតាមអនឡាញជាមួយប្រមុខការទូតបារាំង អង់គ្លេស និងអាល្លឺម៉ង់ដែលសហរដ្ឋអាមេរិកបានយល់ព្រមតាមការអញ្ជើញរបស់សហភាពអឺរ៉ុបឲ្យចូលរួមនៅក្នុងកិច្ចចរចាជាមួយអ៊ីរ៉ង់ដើម្បីដាក់ឲ្យដំណើរការឡើងវិញនូវកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាកាលពីឆ្នាំ ២០១៥។ កិច្ចព្រមព្រៀងដែលត្រូវបានភាគីអ៊ីរ៉ង់ចាប់ផ្តើមមិនគោរពបន្តិចម្តងៗតាំងពីក្រោយអតីតប្រធានាធិបតីអាមេរិកលោកដូណាល់ ត្រាំបានដកសហរដ្ឋអាមេរិកចេញក្នុងឆ្នាំ ២០១៨។ ក្តីបារម្ភមានកាន់តែខ្លាំង ព្រោះតាំងពីខែមករាដើមឆ្នាំ ២០២១ នេះ អ៊ីរ៉ង់បានចាប់ផ្តើមធ្វើការចម្រើនធាតុអ៊ុយរ៉ាញ៉ូមនៅក្នុងអត្រាមួយដែលគេមិនធ្លាប់ឃើញតាំងពីឆ្នាំ ២០១៥។
បន្ទាប់មកចាប់ពីថ្ងៃអាទិត្យ ទី២១ កុម្ភៈទៅ អ៊ីរ៉ង់គ្រោងនឹងរឹតបន្តឹងលើបេសកកម្មរបស់ក្រុមអធិការនៃទីភ្នាក់ងារថាមពលបរមាណូអន្តរជាតិនៅទីតាំងមជ្ឈមណ្ឌលនុយក្លេអ៊ែរមួយចំនួនរបស់ខ្លួន។ កម្មវត្ថុរបស់ទីក្រុងតេហេរ៉ង់នៃការរំលោភលើកិច្ចព្រមព្រៀងជាប្រវត្តិសាស្រ្តមួយនេះ គឺដាក់គំនាបលើរដ្ឋបាលអាមេរិកដើម្បីឲ្យលោកចូ បៃដិនលើកទណ្ឌកម្មទាំងអស់ចេញពីអ៊ីរ៉ង់ដែលដាក់ដោយរដ្ឋបាលរបស់លោកដូណាល់ ត្រាំ។ ខុសពីលោកត្រាំ លោកបៃដិនបានសន្យានាំសហរដ្ឋអាមេរិកចូលក្នុងកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ឡើងវិញ។ តែលោកបៃដិនបានដាក់លក្ខខណ្ឌឲ្យអ៊ីរ៉ង់គោរពកិច្ចព្រមព្រៀងត្រឹមត្រូវឡើងវិញសិន ទើបលោកដកទណ្ឌកម្មចេញវិញ។ តែអ៊ីរ៉ង់ក៏បានដាក់លក្ខខណ្ឌដូចគ្នានេះបញ្ច្រាស់វិញដែរ។
នៅទីបំផុត ទីក្រុងវ៉ាស៊ីនតោនបានបោះដៃរកអ៊ីរ៉ង់មុនដោយយល់ព្រមធ្វើសម្បទានចំនួន ៣ ទី១ យល់ព្រមត្រឡប់ទៅចរចាជាមួយក្រុមប្រទេសហត្ថលេខីនៃកិច្ចព្រមព្រៀងដោយមានវត្តមានអ៊ីរ៉ង់ ទី២ បន្ធូរបន្ធយការរឹតបន្តឹងលើការដើរហើររបស់ក្រុមមន្រ្តីការទូតអ៊ីរ៉ង់នៅក្នុងទីក្រុងញូយ៉កសម្រាប់បេសកកម្មនៃកិច្ចប្រជុំនៅអង្គការសហប្រជាជាតិ និងទី៣ រក្សាទុកដដែលលើការលើកទណ្ឌកម្មអន្តរជាតិពីអ៊ីរ៉ង់នៅក្រោយកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥។ នៅក្នុងជំនាន់លោកត្រាំ ការលើកទណ្ឌកម្មអន្តរជាតិនេះត្រូវបានលោកត្រាំលុបចោលវិញ។
តែអ៊ីរ៉ង់យល់ថា សម្បទានទាំង ៣ នេះរបស់អាមេរិកនៅមិនទាន់គ្រប់គ្រាន់ទេ ព្រោះអ្វីដែលអ៊ីរ៉ង់ចង់បានពិតប្រាកដ គឺចង់ឲ្យលោកបៃដិនលើកទណ្ឌកម្មអាមេរិកដែលលោកត្រាំបានដាក់លើខ្លួន។ យ៉ាងណាក៏ដោយ នាយកទីភ្នាក់ងារថាមពលបរមាណូអន្តរជាតិនឹងធ្វើដំណើរទៅកាន់អ៊ីរ៉ង់ដើម្បីស្វែងរកការសម្របសម្រួលមួយដែលអាមេរិក និងអ៊ីរ៉ង់អាចទទួលបានទាំងអស់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ