ថ្នាក់ដឹកនាំអៀរឡង់ខាងជើងថ្កោលទោសចំពោះអំពើហិង្សាកើតឡើងនៅក្រុង Belfast
មេដឹកនាំអៀរឡង់ខាងជើងបានរួមគ្នាថ្កោលទោសចំពោះកុបកម្មដ៏ហិង្សាដែលបានកើតឡើងក្នុងទីក្រុងប៊ែលហ្វាស (Belfast) កាលពីយប់ថ្ងៃពុធ ទី៧ មេសា។ ក្នុងអំឡុងពេលកើតមានអំពើហិង្សាជាច្រើនម៉ោង គេឃើញមន្រ្តីប៉ូលិសរងការវាយប្រហារ ហើយហ្វូងមនុស្សជាច្រើនបាននាំគ្នាគប់គ្រាប់បែកសាំងនៅតាមដងផ្លូវ ហើយមានឡានក្រុងមួយគ្រឿងបានត្រូវភ្លើងឆាបឆេះ។ តែជាសំណាងល្អ មិនមាននរណាម្នាក់រងគ្រោះថ្នាក់ធ្ងន់ធ្ងរ ឬបាត់បង់ជីវិតដោយសារហេតុការណ៍នេះឡើយ។
ចុះផ្សាយនៅថ្ងៃ៖
ស្តាប់ - ០២:២៥
អំពើហិង្សាបានចាប់ផ្ទុះឡើងនៅអៀរឡង់ខាងជើងជារៀងរាល់យប់អស់រយៈពេលជាងមួយសប្តាហ៍មកហើយ។ ប៉ុន្តែកុបកម្មដែលកើតឡើងនៅក្នុងទីក្រុង Belfast កាលពីយប់ថ្ងៃពុធមានលក្ខណៈធ្ងន់ធ្ងរខ្លាំង និងមិនដែលត្រូវបានគេឃើញរាប់ឆ្នាំមកហើយនៅខេត្តរបស់អង់គ្លេសមួយនេះ។
នៅភាគខាងលិចក្រុង Belfast កាលពីយប់ថ្ងៃពុធ មានមន្ត្រីប៉ូលិសចំនួន ៨នាក់បានរងរបួសនៅអំឡុងពេលមានការប្រឈមមុខដាក់គ្នារវាងក្រុមអ្នកជាតិនិយមជាមួយនឹងក្រុមម្ខាងទៀតដែលជាអ្នកស្មោះស្ម័គ្រនឹងអង់គ្លេស។
ថ្នាក់ដឹកនាំអៀរឡង់ខាងជើងមានការព្រួយបារម្ភយ៉ាងខ្លាំងចំពោះអំពើហិង្សាដ៏អាក្រក់នៅតាមដងផ្លូវនេះ។ ក្រោយការជួបប្រជុំគ្នាជាបន្ទាន់មួយនៅថ្ងៃព្រហស្បតិ៍ ថ្នាក់ដឹកនាំអៀរឡង់ខាងជើងបានថ្កោលទោសចំពោះកុបកម្មដ៏ហិង្សា និងថាការវាយប្រហារទៅលើមន្ត្រីប៉ូលិស សេវាកម្មសាធារណៈ និងសហគមន៍របស់ប្រជាជន គឺមិនអាចទទួលយកបានជាដាច់ខាត ហើយពួកកុបករត្រូវតែបញ្ឈប់សកម្មភាពទាំងនោះភ្លាម។
ដូចគ្នានេះដែរ លោកនាយករដ្ឋមន្ត្រីអង់គ្លេស បូរីសចនសុន បានសម្តែងនូវក្តីព្រួយបារម្ភជាខ្លាំងចំពោះអំពើហិង្សានៅអៀរឡង់ខាងជើង។ លោកចនសុនបានមានប្រសាសន៍ថាវិធីដោះស្រាយបញ្ហាការខ្វែងគំនិតគ្នាគឺការសន្ទនាមិនមែនជាអំពើហិង្សានោះទេ។
គួរជ្រាបថា មន្រ្តីប៉ូលិសសរុបជាង ៥០ នាក់បានរងរបួសដោយសារអំពើហិង្សាដែលកើតឡើងក្នុងតំបន់ជាច្រើននៃអៀរឡង់ខាងជើងចាប់តាំងពីចុងខែមីនាមក។ ក្នុងប៉ុន្មានថ្ងៃថ្មីៗនេះមានមនុស្ស ១០នាក់ ដែលខ្លះមានអាយុ ១៣ ឆ្នាំផងត្រូវបានចាប់ខ្លួនដោយសារពួកគេបានចូលរួមក្នុងកុបកម្មហិង្សារៀបចំឡើងដោយពួកក្រុមក្មេងទំនើង។
ក្រុមអ្នកឃ្លាំមើលសង្គមបានលើកឡើងថា អំពើហិង្សាដែលបានកើតឡើងនៅអៀរឡង់ខាងជើងនេះ គឺជាភស្តុតាងមួយបញ្ជាក់ពីភាពច្របូកច្របល់កើតចេញពីការចាកចេញរបស់អង់គ្លេសពីសហភាពអឺរ៉ុប។
យ៉ាងណាក៏ដោយ Brexit មិនមែនជាកត្តាតែមួយមុខដែលជំរុញឲ្យអំពើហិង្សាកើតមានឡើងនៅអៀរឡង់ខាងជើងនោះទេ។ អ្នកជំនាញបានលើកឡើងថា បញ្ហាផ្ទៃក្នុងជាច្រើនរវាងក្រុមអ្នកជាតិនិយមអៀរឡង់ និងអ្នកស្មោះស្ម័គ្រនឹងរាជានិយមអង់គ្លេសក៏ជាកត្តាដ៏សំខាន់នៅពីក្រោយកុបកម្មដ៏ហិង្សាថ្មីៗនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ