អង់គ្លេសបើកចរចារកកិច្ចព្រមព្រៀងផ្តោះប្តូរពាណិជ្ជកម្មសេរី ជាមួយក្រុម៦ប្រទេសនៅឈូងសមុទ្ទពែក្ស
តាំងពីផ្តាច់ខ្លួនចេញពីសហភាពអឺរ៉ុប អង់គ្លេសបាននិងកំពុងប្រឹងពង្រឹងពង្រីកទំនាក់ទំនងជាមួយពាណិជ្ជកម្មជាមួយបណ្តាប្រទេសផ្សេងនៅក្រៅអឺរ៉ុប។ នៅថ្ងៃសៅរ៍ទី ៩ តុលា២០២១នេះ ឡុងដ៍បានចាប់ផ្តើមបើកកិច្ចចរចា ជាផ្លូវការ ជាមួយក្រុមប្រទេសនៅតំបន់ឈូងសមុទ្ទពែក្សចំនួន៦ប្រទេស។ នេះបើតាមសេចក្តីប្រកាសរបស់ប្រទសបារ៉ែន ដែលកំពុងធ្វើជាប្រធានក្រុមប្រឹក្សាកិច្ចសហប្រតិបត្តិការតំបន់ឈូងសមុទ្ទពែក្ស (CCG)។
ចុះផ្សាយនៅថ្ងៃ៖
ស្តាប់ - ០២:០៣
អង់គ្លេសមានចំណងទំនាក់ទំនងសេដ្ឋកិច្ចនិងនយោបាយ ស្អិតល្មួតហើយជាមួយបណ្តារដ្ឋជាសមាជិកក្រុមប្រឹក្សាកិច្ចសហប្រតិបត្តិការឈូងសមុទ្ទពែក្ស ៖ អារ៉ាប៊ីសាអូឌីត អេមីរ៉ាតអារ៉ាប់រួម កាតា បារ៉ែន កូវ៉ែត និងអូម៉ង់។ ដូច្នេះច្បាស់ណាស់ដែលថាក្រុមប្រទេសទាំង៦ នឹងបើកទំព័រថ្មីរួមគ្នា ដើម្បីពង្រឹងកិច្ចសហប្រតិបត្តិការ ដែលមានតាំងពីយូរអង្វែងមកហើយ ឱ្យកាន់តែរឹងមាំ ក្នុងវិស័យពាណិជ្ជកម្មនិងវិនិយោគ។ នេះបើតាមសេចក្តីថ្លែងការណ៍ប្រកបដោយអំណរនិងភាពរីករាយ របស់លោករដ្ឋមន្ត្រីក្រសួងពាណិជ្ជកម្ម ឧស្សាហកម្ម និងទេសចរណ៍បារ៉ែន ប្រកាសបើកកិច្ចចរចាផ្តោះប្តូរពាណិជ្ជកម្មសេរី រវាងក្រុមប្រទេសក្នុងតំបន់ឈូងសមុទ្ទ និងអង់គ្លេស។
ការផ្តោះប្តូរពាណិជ្ជកម្មអង់គ្លេសនិងក្រុមប្រទេសCCG មានទំហំដល់ទៅ ៣៥ពាន់លានអឺរ៉ូ នៅឆ្នាំ២០២០។ នេះបើតាមតួលេខផ្តល់ដោយរដ្ឋាភិបាលក្រុងឡុងដ៍ ដែលរំពឹងថា កិច្ចព្រមព្រៀងផ្តោះប្តូរពាណិជ្ជកម្មសេរី នឹងរុញច្រានទំនាក់ទំនងពាណិជ្ជកម្មឱ្យមានសន្ទុះកាន់លឿននិងខ្លាំងជាងមុនច្រើន។
រដ្ឋមន្ត្រីក្រសួងពាណិជ្ជកម្មអន្តរជាតិអង់គ្លេស លោកស្រី Anne-Marie Trevelyanបានអបអរសាទរការចាប់ផ្តើមចរចានេះ ដោយចាត់ទុកថា នេះជាឱកាសបើកទូលាយទីផ្សារឆ្ពោះទៅរកកំណើនសេដ្ឋកិច្ចផង និងបានរឹតចំណងជាមួយតំបន់ឈូងសមុទ្ទដែលតំបន់យុទ្ធសាស្ត្រ មិនអាចខ្វះបានសម្រាប់ផលប្រយោជន៍អង់គ្លេស។
កិច្ចព្រមព្រៀងផ្តោះប្តូរសេរី ជាកិច្ចព្រមព្រៀងទំនើប និងពេញលេញ លុបបំបាត់អស់ទាំងស្រុងនូវរនាំងពាណិជ្ជកម្មក្នុងទីផ្សារភេសជ្ជៈ ចំណីអាហារ និងក្នុងវិស័យផ្សេងទៀត ដូចជា ពាណិជ្ជកម្មឌីជីថល ឬ ថាមពលមិនចេះរីងស្ងួត។ នេះបើតាមការលម្អិតក្នុងសេចក្តីថ្លែងការណ៍អង់គ្លេសដដែល។
តាំងពីបំបែកខ្លួនចេញពីសហភាពអឺរ៉ុប អង់គ្លេសបានងាកទៅពង្រឹងទំនាក់ទំនងពាណិជ្ជកម្មជាមួយដៃគូចាស់ ដូចជាសហរដ្ឋអាមេរិក អូស្ត្រាលី ឬក្រុមប្រទេសក្នុងតំបន់ឈូងសមុទ្ទពែក្ស។ ក្រុមប្រទេសនៃតំបន់ឈូងសមុទ្ទពែក្សមានសេដ្ឋកិច្ចខ្លាំងជាងគេក្នុងចំណោមប្រទេសអារ៉ាប ដោយអារ៉ាប៊ីសាអូឌីត ជាប្រទេសនាំចេញប្រេងលំដាប់លេខមួយពិភពលោក អេមីរ៉ាតអារ៉ាប់រួម ឬកាតា មានប្រជាជនសុទ្ធតែអ្នកមាន មានជីវភាពនិងសមត្ថភាពចាយវាយខ្ពស់ខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ