សមាជិកកិច្ចព្រមព្រៀងពាណិជ្ជកម្មអន្តរប៉ាស៊ីហ្វិកយល់ព្រមបើកកិច្ចចរចា ជាមួយអង់គ្លេស
អង់គ្លេសបាននិងកំពុងប្រឹងស្វែងរកកិច្ចព្រមព្រៀងពាណិជ្ជកម្មថ្មី ក្រោយពីបានផ្តាច់ខ្លួនចេញជាស្ថាពរពីសហភាពអឺរ៉ុប។ ដាក់ពាក្យសុំ ជាផ្លូវការនៅថ្ងៃទី ១កុម្ភៈ ២០២១ សមាជិកកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក ទើបបានផ្តល់ការយល់ព្រម និងប្រកាស នៅថ្ងៃពុធទី ២មិថុនា ថាដំណើរការចរចាសុំចូលជាសមាជិកកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក របស់អង់គ្លេស នឹងអាចចាប់ផ្តើម នៅក្នុងឆ្នាំ២០២១នេះតែម្តង។
ចុះផ្សាយនៅថ្ងៃ៖
ស្តាប់ - ០១:៥០
ជួបប្រជុំគ្នាតាមអនឡាញ និង រៀបចំឡើងដោយជប៉ុន ក្រុមប្រទេសជាសមាជិកកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក បានចេញសេចក្តីថ្លែងការណ៍រួម ព្រមបើកកិច្ចចរចាជាមួយអង់គ្លេស ដែលបានដាក់ពាក្យស្នើសុំចូលជាសមាជិកម្នាក់ដែរ។
កើតចេញជារូបរាងនៅឆ្នាំ២០១៩ សន្ធិសញ្ញាពាណិជ្ជកម្មអន្តរប៉ាស៊ីហ្វិក ហៅកាត់ថា CPTPP (Comprehensive and Progressive Agreement for Trans-Pacific Partnership) ជាទម្រង់ថ្មីនៃកិច្ចព្រមព្រៀងផ្តោះប្តូរសេរីអន្តរប៉ាស៊ីហ្វិក ដែលរលាយទៅក្រោយពីសហរដ្ឋអាមេរិករបស់លោកដូណាល់ ត្រាំ បានដកខ្លួនចេញ។ កិច្ចព្រមព្រៀងពាណិជ្ជកម្មអន្តរប៉ាស៊ីហ្វិក CPTPP មានសមាជិកសរុបចំនួន១១ប្រទេស (អូស្ត្រាលី ព្រុយណេ កាណាដា ជប៉ុន ស៊ីលី ម៉ិចស៊ិក ម៉ាឡេស៊ី នូវែលហ្សេឡង់ ប៉េរ៉ូសិង្ហបុរី និង វៀតណាម) និងជាទីផ្សារបំរើឱ្យពលរដ្ឋដល់ជិត៥០០លាននាក់ នៅតំបន់អាស៊ីប៉ាស៊ីហ្វិក។
ឥលូវសន្ធិសញ្ញាកំពុងឈានទៅពង្រីកខ្លួនមានសមាជិកថ្មីបន្ថែម។ តែជាសេចក្តីសម្រេចចិត្ត ដ៏គួរឱ្យកត់សម្គាល់ បើឈរលើទស្សនៈនៃការរៀបចំសណ្តាប់ធ្នាប់សេដ្ឋកិច្ច សេរី និងមានសមភាព។ នេះបើតាមសេចក្តី ប្រកាសរបស់រដ្ឋមន្ត្រីក្រសួងសេដ្ឋកិច្ចជប៉ុន ទៅកាន់អ្នកសារព័ត៌មាន។
សម្រាប់លោករដ្ឋមន្ត្រីជប៉ុន ការសុំភ្ជាប់ខ្លួននឹងសន្ធិសញ្ញាពាណិជ្ជកម្មអន្តរប៉ាស៊ីហ្វិក របស់អង់គ្លេស នឹងមកពង្រឹងបន្ថែមទំនាក់ទំនងទ្វេភាគី ជប៉ុន-អង់គ្លេស ដែលទើបបានចុះហត្ថលេខា លើកកិច្ចព្រមព្រៀងពាណិជ្ជកម្ម រវាងគ្នា កាលពីខែតុលា២០២០។ ជាកិច្ចព្រមព្រៀងពាណិជ្ជកម្មដ៏ធំដំបូងបំផុត ស្រដៀងនឹងកិច្ចព្រមព្រៀងពាណិជ្ជកម្មអឺរ៉ុប-ជប៉ុន។
ក្រោយពីបានចាកចេញជាផ្លូវការ និងជាស្ថាពរពីសហភាពអឺរ៉ុប ពីទីផ្សាររួមអឺរ៉ុប នៅថ្ងៃទី ៣១ធ្នូ ២០២០ អង់គ្លេសបានខ្នះខ្នែងរកដៃគូពាណិជ្ជកម្មថ្មី។ ក្រោយពីបានសម្រេចកិច្ចព្រមព្រៀងជាមួយជប៉ុន និងសិង្ហបុរី អង់គ្លេសកំពុងចរចាជាមួយ អូស្ត្រាលី នូវែលហ្សេឡង់ ឥណ្ឌានិងសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ