ក្រុមប្រទេសលោកខាងលិច បារម្ភខ្លាចក្រែងមានការផ្ទុះសង្គ្រាមរវាងរុស្ស៊ី និងអ៊ុយក្រែន នៅរដូវរងារនេះ
ខណៈដែលមានភាពតានតឹងកាន់តែខ្លាំងឡើង នៅព្រំដែនរវាង ប៉ូឡូញ និង បេឡារុស ដោយសារតែបញ្ហាជនភៀសខ្លួន គេកំពុងតែបារម្ភពីភាពតានតឹងខ្លាំងមួយទៀត នៅព្រំដែនរវាងអ៊ុយក្រែន និងរុស្ស៊ី។ ក្រុមប្រទេសបច្ចឹមលោក មានអាមេរិក និងអង់គ្លេស កំពុងតែខ្សឹមខ្សៀវគ្នាយ៉ាងស្ងាត់ៗ ថារុស្ស៊ីអាចប្រហែលជាកំពុង រៀបគម្រោងឈ្លានពានចូលទឹកដីអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:០៥
លោក អង់តូនី ប្លីងកិន រដ្ឋមន្ត្រីការបរទេសអាមេរិក បានលើកឡើងកាលពីថ្ងៃទី១៤ វិច្ឆិកាថា ៖ សកម្មភាពដែលរបបដឹកនាំបេឡារុស ដឹកនាំដោយលោក លូកាឆិនកូ កំពុងតែធ្វើ ដោយប្រើប្រាស់ជនភៀសខ្លួនជាអាវុធ គឺជាសកម្មភាពបំបែកបំបាក់សាមគ្គីភាព រវាងសមាជិកសហភាពអឺរ៉ុប និងមានកម្មវត្ថុបំភ័ន្តភ្នែក បង្វែរការចាប់អារម្មណ៍ កុំក្រុមប្រទេសអឺរ៉ុបមើលឃើញ សកម្មភាពត្រៀមកម្លាំងរបស់រុស្ស៊ី នៅតាមព្រំដែនអ៊ុយក្រែន។
នៅក្នុងកិច្ចសម្ភាសន៍មួយ ផ្តល់ឲ្យដល់កាសែត Financial Times លោកស្រី Hanna Maliar អនុរដ្ឋមន្ត្រីក្រសួងការពារជាតិអ៊ុយក្រែន បានអះអាងថា នៅរដូវរងារនេះ គឺរុស្ស៊ីពិតជាអាចធ្វើសកម្មភាព បង្កអស្ថិរភាពមកលើអ៊ុយក្រែន។
សូមបញ្ជាក់ថា យោងតាមរដ្ឋាភិបាលអ៊ុយក្រែន និងក្រុមប្រទេសបច្ចឹមលោក រុស្ស៊ីបានចល័តទ័ព នៅតាមបណ្តោយព្រំដែនអ៊ុយក្រែន ចំនួនយ៉ាងហោច ១១៤០០០នាក់។ ជាសកម្មភាពចល័តទ័ព ដែលមានចំនួនលើស កាលពីខែមេសា ហើយមិនមែនជារយៈពេលនៃការធ្វើសមយុទ្ធយោធាទេ។
កាលពីថ្ងៃសៅរ៍សប្តាហ៍មុន បណ្តាញព័ត៌មានអង់គ្លេស បានចុះផ្សាយថា រដ្ឋាភិបាលអង់គ្លេសបានត្រៀម បញ្ជូនកម្លាំងចំនួន៦០០ ដែលជាកងកម្លាំងពិសេស ដើម្បីទៅជួយអ៊ុយក្រែន ក្នុងករណីមានការឈ្លានពាន ពីសំណាក់រុស្ស៊ី។
យ៉ាងណាក៏ដោយ លោក Stephane Siohan អ្នករាយការណ៍ព័ត៌មាន វិទ្យុបារាំងអន្តរជាតិ RFI ប្រចាំនៅទីក្រុងកៀវ គឺក្រុមចារកិច្ចសម្ងាត់របស់អាមេរិក និងអង់គ្លេស ហាក់កំពុងតែបំប៉ោងព័ត៌មាន ដើម្បីបំភ័យមតិសាធារណៈ តាមរយៈការប្រើប្រាស់បណ្តាញផ្សព្វផ្សាយព័ត៌មាន។ ក៏ប៉ុន្តែលោកទទួលស្គាល់ថា ស្ថានការណ៍នេះ ត្រូវតែទទួលបានការតាមដានឲ្យជាប់ ល្អិតល្អន់។ យោងតាមអ្នករាយការណ៍រូបនេះ កងទ័ពអ៊ុយក្រែនបច្ចុប្បន្នមានសមត្ថភាពល្អប្រសើរច្រើនណាស់ បន្ទាប់ពីបានទទួលជំនួយ ទាំងការហ្វឹកហាត់ និងសម្ភារៈ ពីកងទ័ពអាមេរិក អង់គ្លេស និងតួកគី។ ក៏ប៉ុន្តែ រុស្ស៊ីក៏នៅតែចិញ្ចឹមចិត្ត ចង់ច្បាមយកដីអ៊ុយក្រែនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ