Oxfam៖មនុស្សជាង ២៦០លាននាក់ទៀតប្រឈមនឹងការធ្លាក់ចូលក្នុងភាពក្រីក្រខ្លាំងក្នុងឆ្នាំ ២០២២
មានមនុស្សជាង ២៦០លាននាក់បន្ថែមទៀតលើលោកកំពុងប្រឈមនឹងការធ្លាក់ចូលក្នុងភាពក្រីក្រខ្លាំងនៅឆ្នាំ ២០២២ នេះបើតាមអង្គការ Oxfam។ តំបន់ដែលកំពុងប្រឈមខ្លាំងជាងគេច្រើនជាតំបន់ដែលបានជួបវិបត្តិរួចហើយ ដូចជានៅអាហ្រ្វិកខាងកើត នៅតំបន់សាហ៊ែល នៅប្រទេសយេម៉ែន ឬនៅប្រទេសស៊ីរី។ តាម Oxfam ប្រជាជនរស់ក្នុងតំបន់ និងក្នុងប្រទេសទាំងនេះមានចំណូលតិចជាង ១ដុល្លារ ៩០សេនក្នុងមួយថ្ងៃ។ វិបត្តិកើតចេញពីកូវីដ១៩ កំណើនវិសមភាព និងផលវិបាកពីសង្រ្គាមអ៊ុយក្រែនជាដើមចមនៃកំណើនភាពក្រីក្រ។ លោកល្វី នីកូឡា ហ្សង់ដូ អ្នកទទួលបន្ទុកផ្នែកហិរញ្ញវត្ថុនៃប្រទេសកំពុងអភិវឌ្ឍន៍របស់ Oxfam បានអំពាវនាវឲ្យចាត់វិធានការជួយមុនគេដល់ក្រុមប្រទេសដែលនឹងរងផលប៉ះពាល់។
ចុះផ្សាយនៅថ្ងៃ៖
ស្តាប់ - ០១:៣៩
« នៅក្នុងជំហានដំបូង គេត្រូវតែធ្វើសកម្មភាពដើម្បីកាត់បន្ថយប្រាក់បំណុលឲ្យបានច្រើនដែលអាចធ្វើបានពីក្រុមប្រទេសកំពុងអភិវឌ្ឍន៍។ សម្រាប់តែឆ្នាំ ២០២២ មួយ គេប៉ាន់ប្រមាណឃើញថា ក្រុមប្រទេសក្រីក្រខ្លាំងជាងគេនឹងត្រូវសងបំណុលគេចំនួន ៤៣ ០០០លានដុល្លារ។ នេះជាចំនួនប្រាក់បំណុលដ៏សម្បើមខ្លាំងណាស់ដែលពួកគេបានខ្ចីសម្រាប់ការចាយវាយលើផលវិបាកកើតចេញពីវិបត្តិកូវីដ១៩ ដើម្បីចំណាយទប់ស្កាត់នឹងទំនិញឡើងថ្លៃ និងសម្រាប់ចំណាយទិញផលិតផលស្តុកទុក។ល។និង។ល។
ចំណុចទី២ គឺទាក់ទងនឹងជំនួយអន្តរជាតិ ជំនួយពីក្រុមប្រទេសអ្នកមាន រួមទាំងជំនួយពីស្ថាប័នអន្តរជាតិ ដូចយ៉ាងមូលនិធិរូបិយវត្ថុអន្តរជាតិ FMI និងធនាគារពិភពលោកដល់ក្រុមប្រទេសក្រីក្របំផុត។ ចំណែកចំណុចទី៣ ចុងក្រោយ គឺភាពចាំបាច់ដែលគេត្រូវបង្វែរកញ្ចប់លុយបង្កើតដោយ FMI ដើម្បីជួយផ្តល់សន្ទុះសេដ្ឋកិច្ចដល់បណ្តាប្រទេសខាងជើងក្នុងសម័យកូវីដ១៩ និងក្រោយសម័យកូវីដ១៩ ទៅជួយក្រុមប្រទេសក្រីក្រជាងគេវិញ។
សព្វថ្ងៃនេះ បណ្តាប្រទេសខាងជើង និងប្រទេសអ្នកមានមិនសូវបានប្រើកញ្ចប់លុយរបស់ FMI ហ្នឹងទេ។ ដូច្នេះ វាជារឿងសមហេតុផលដែលត្រូវបង្វែរកញ្ចប់លុយបង្កើតដោយ FMI នេះទៅជួយក្រុមប្រទេសក្រីក្រខ្លាំងដែលពួកគេបានទទួលតិចតួចណាស់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ