រុស្ស៊ីបើកការវាយប្រហារទ្រង់ទ្រាយធំលើទីតាំងចុងក្រោយរបស់កងទ័ពអ៊ុយក្រែន នៅម៉ារីយូប៉ូល
កងទ័ពរុស្ស៊ី និងក្រុមឧទ្ទាមផ្តាច់ទឹកដីនិយមរុស្ស៊ីបានចាប់បើកប្រតិបត្តិការវាយប្រហារទ្រង់ទ្រាយធំ ទៅលើរោងចក្រស្លដែក Azovstal ទីតាំងចុងក្រោយ របស់កងទ័ពអ៊ុយក្រែន ក្នុងទីក្រុងកំពង់ផែ ម៉ារីយូប៉ូល។ មេបញ្ជាការកងវរសេនាធំអ៊ុយក្រែន នៅម៉ារីយូប៉ូលបាននិយាយកាលពីថ្ងៃអង្គារម្សិលមិញថា នៅមុនបើកការវាយប្រហារនៅថ្ងៃអង្គារ យន្តហោះចម្បាំងរុស្ស៊ីបានទម្លាក់គ្រាប់លើទីតាំងរោងចក្រ ដោយសម្លាប់ប្រជាជនស៊ីវិល២នាក់ និងរបួសយ៉ាងតិច១០នាក់។ ការវាយប្រហាររបស់កងទ័ពរុស្ស៊ីធ្វើឡើងនៅបន្ទាប់ពី អង្គការសហប្រជាជាតិបានជួយសម្របសម្រួលប្រជាជនស៊ីវិលជាង១០០នាក់ចេញពីរោងចក្រស្លដែក ជាទី ដែលពួកគេជាប់គាំងអស់ជាច្រើនសប្តាហ៍ ដោយសារការឡោមព័ទ្ធរបស់កងទ័ពរុស្ស៊ី នៅម៉ារីយូប៉ូល។
ចុះផ្សាយនៅថ្ងៃ៖
នៅក្នុងសារវីដេអូដែលបង្ហោះផ្សាយនៅលើបណ្តាញតេឡេក្រាម មេបញ្ជាការរងនៃវរសេនាធំអ៊ុយក្រែន ដែលប្រចាំការឈរជើង នៅក្នុងរោងចក្រស្លដែក Azovstal ដែលជាទីតាំងចុងក្រោយរបស់កងទ័ពអ៊ុយក្រែននៅម៉ារីយូប៉ូល បាននិយាយថា កងទ័ពរុស្ស៊ី បានបើកការវាយប្រហារទ្រង់ទ្រាយធំ ទៅលើទីតាំងរោងចក្រAzovstal នៅថ្ងៃអង្គារ ដោយប្រើរថក្រោះ និងយន្តហោះចម្បាំង។ តាមមេទាហានអ៊ុយក្រែន រុស្ស៊ីបានបញ្ជូនទ័ពបន្ថែមតាមផ្លូវគោក និងផ្លូវទឹក សំដៅ វាយដណ្តើមយករោងចក្រស្លដែក Azovstal។
នៅក្នុងសេចក្តីប្រកាសព័ត៌មានកាលពីថ្ងៃអង្គារ ដែលដកស្រង់ផ្សាយដោយទីភ្នាក់ងារព័ត៌មានរុស្ស៊ី ក្រសួងការពារជាតិរុស្ស៊ីបានអះអាងថា កងទ័ពរុស្ស៊ី និងកងកម្លាំងប្រដាប់អាវុធគាំទ្ររុស្ស៊ីបានប្រើយន្តហោះចម្បាំង និងកាំភ្លើងធំ បាញ់កម្ទេចរោងចក្រស្លដែក កាលពីថ្ងៃអង្គារ។ អ្នកនាំពាក្យរបស់ក្រសួងការពារជាតិរុស្ស៊ី លោកVadim Astafiev បាននិយាយតាំងពីព្រឹកថ្ងៃអង្គារម្ល៉េះថា កងទ័ពរុស្ស៊ីបានចាប់បាញ់បំផ្លាញទីតាំងប្រយុទ្ធរបស់ក្រុមប្រដាប់អាវុធអ៊ុយក្រែន។ អ្នកនាំពាក្យរុស្ស៊ីបានចោទប្រកាន់ផងដែរ ក្រុមទាហានអ៊ុយក្រែនថា បានឆ្លៀតឱកាស បទឈប់បាញ់កាលពីថ្ងៃអាទិត្យកន្លងទៅ ដើម្បីទៅពង្រាយកម្លាំង នៅទីតាំងយុទ្ធសាស្រ្ត ក្នុងរោងចក្រស្លដែកដើម្បីរង់ចាំប្រយុទ្ធទប់ទល់នឹងកងទ័ពរុស្ស៊ី។
នៅក្នុងសារវីដេអូ កាលពីថ្ងៃអង្គារ មេបញ្ជាការរងកងទ័ពអ៊ុយក្រែននៅរោងចក្រAzovstalបាននិយាយថា កងទ័ពអ៊ុយក្រែននឹងប្រឹងអស់សមត្ថភាពដើម្បីវាយរុញច្រានកងទ័ពរុស្ស៊ី ប៉ុន្តែ លោកអំពាវនាវឲ្យគេចាត់វិធានការជួយជម្លៀសជាបន្ទាន់ ប្រជាជនស៊ីវិល ផ្សេងទៀត ដែលកំពុងនៅជាប់គាំង ជាមួយកងទ័ព នៅក្នុងរូងក្រោមដី ពីក្រោមរោងចក្រស្លដែក។
ខណៈពេលកងទ័ពរុស្ស៊ីចាប់បើកការវាយប្រហារទៅលើទីតាំងចុងក្រោយរបស់កងទ័ពអ៊ុយក្រែន ប្រធានាធិបតីរុស្ស៊ី លោកពូទីនបានប្រាប់សមភាគីបារាំង លោកម៉ាក្រុង នៅក្នុងកិច្ចសន្ទនាតាមទូរស័ព្ទ កាលពីថ្ងៃម្សិលមិញថា រុស្ស៊ី នៅតែបើកចំហរ សម្រាប់ការចរចា ប៉ុន្តែ គឺភាគីអ៊ុយក្រែនទេដែលគ្មានចេតនាចង់ចរចាដើម្បីបញ្ចប់ជម្លោះ។ ដោយទាត់ចោលរាល់ការចោទប្រកាន់ដែលថា កងទ័ពរុស្ស៊ីបានប្រព្រឹត្តឧក្រិដ្ឋកម្មសង្រ្គាមនៅក្នុងសង្រ្គាមអ៊ុយក្រែន លោកប្រធានាធិបតីពូទីនបានបកចោទប្រកាន់កម្លាំងប្រដាប់អាវុធអ៊ុយក្រែនថា ជាអ្នកកាប់សម្លាប់ប្រជាជនស៊ីវិលអ៊ុយក្រែន។ បើតាមប្រមុខដឹកនាំរុស្ស៊ី ក្រុមប្រទេសលោកខាងលិចអាចជួយបញ្ឈប់ការកាប់សម្លាប់មនុស្សនៅអ៊ុយក្រែន តាមរយៈការឈប់ផ្តល់គ្រឿងសព្វាវុធទៅឲ្យអ៊ុយក្រែន។
គួរបញ្ជាក់ដែរថា នៅចុងសប្តាហ៍មុន ប្រធានាធិបតីបារាំង លោកម៉ាក្រុង ទើបបាននិយាយទូរស័ព្ទទៅប្រធានាធិបតីអ៊ុយក្រែន ដែលនៅក្នុងនោះលោកបានសន្យាថា បារាំងនឹងផ្តល់សព្វាវុធធុនធ្ងន់ ចំនួន ៦១៥តោនទៅឲ្យកងទ័ពអ៊ុយក្រែន។
នៅថ្ងៃអង្គារ នាយករដ្ឋមន្រ្តីអង់គ្លេសបានសន្យាទៅសមាជិកសភាអ៊ុយក្រែនថា អង់គ្លេសនឹងផ្តល់ជំនួយយោធា ចំនួន ៣០០លានផោនបន្ថែមទៀតសម្រាប់ជួយកងទ័ពអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ