លោក បៃដិន ព្រមានពីការរីករាលដាលខ្លាំងនៃជំងឺអុតស្វា
ឆ្លៀតពេលកំពុងបំពេញទស្សនកិច្ចនៅអាស៊ី លោកប្រធានាធិបតីអាមេរិក ចូ បៃដិន ព្រមាននៅថ្ងៃអាទិត្យទី ២២ឧសភានេះ អំពីឥទ្ធិពលធ្ងន់ធ្ងរនៃការរីករាលដាលជំងឺអុតស្វា។ ជំងឺអុតស្វា មានលេចឡើងនៅក្នុងបណ្តាប្រទេសជាច្រើនដូចជា អូស្ត្រាលី កាណាដា សហរដ្ឋអាមេរិក និងនៅអឺរ៉ុប។
ចុះផ្សាយនៅថ្ងៃ៖
ស្តាប់ - ០១:៥៩
ដោយបញ្ជាក់ថាបានទទួលព័ត៌មានជាប់រហូតពីភ្នាក់ងារសុខាភិបាលអាមេរិក ស្តីពីការវិវត្តនៃមេរោគអុតស្វានៅសហរដ្ឋអាមេរិក លោកចូបៃដិនដាស់តឿន ពីលើយន្តហោះ ក្នុងដំណើរទៅកាន់ក្រុងតូក្យូថា ពិភពលោកត្រូវប្រុងប្រយ័ត្ននឹងជំងឺមួយនេះ។ ប្រសិនបើមានការរាតត្បាត នោះពិតជាធ្ងន់ធ្ងរហើយ។
បើតាមអង្គការសុខភាពពិភពលោក មានអ្នកកើតអុតស្វាបានឡើងដល់៩២ករណី និង២៨ករណីជាប់សង្ស័យ គិតត្រឹមថ្ងៃសៅរ៍ទី២១ឧសភា ក្នុងជាង១០ប្រទេស។ ប៉ុន្តែអង្គការសុខភាពពិភពលោកសង្ស័យថានឹងមានករណីអុតស្វានៅក្នុងប្រទេសផ្សេងទៀតនៅលើពិភពលោក ហើយអាចមានការចម្លងលឿននៅអឺរ៉ុប។
ក្នុងចំណោម៨ប្រទេសនៅអឺរ៉ុបដែលមានករណីអុតស្វា អង់គ្លេសកំពុងមានសន្ធឹកចម្លងច្រើនជាងគេ។ ករណីអុតស្វាថ្មីកើតឡើង និងច្រើនឡើងជារៀងរាល់ថ្ងៃ។ នេះបើតាមភ្នាក់ងារសុខាភិបាល ដែលអះអាងថាកំពុងតាមដានស្ថានភាពចម្លងយ៉ាងហ្មត់ចត់បំផុត។
ខ្សោយជាងជំងឺអុតស្វាយធម្មតា និង ត្រូវបានលុបបំបាត់អស់ម្តង តាំងពីកាលពីជាង៤០ឆ្នាំមុន អុតស្វាជាជំងឺឆ្លងប្រភេទថ្មី លេចឡើងដោយមានអាការៈក្តៅខ្លួន មានរោលកន្ទួលលើស្បែកជាពិសេសនៅលើមុខ គ្មានថ្នាំព្យាបាលទេ តែអាចជាវិញដោយឯងៗ។ គេសង្កេតឃើញ មេរោគធ្វើការចម្លងខ្លាំងពីមនុស្សម្នាក់ទៅម្នាក់ ក្នុងសហគម តែលឿននិងខ្លាំង ចំពោះមនុស្សស្រលាញ់ភេទដូចគ្នា មនុស្សប្រុសស្រលាញ់ប្រុសដូចគ្នា ឬស្រលាញ់គ្នាទាំងពីរភេទ។
ថ្វីបើពុំមានថ្នាំបង្ការប្រឆាំងនឹងជំងឺអុតស្វានេះមែន ប៉ុន្តែវ៉ាក់សាំងការពារជំងឺអុតស្វាយអាចជួយការពារអ្នកជាករណីពាក់ព័ន្ធ។ នេះបើតាមវេជ្ជបណ្ឌិត Hopkins នាយកទីភ្នាក់ងារសុខាភិបាលសាធារណៈអង់គ្លេស ដោយប្រកាសថារដ្ឋាភិបាលអង់គ្លេសបានបញ្ជាទិញថ្នាំបង្ការអុតស្វាយទុកបម្រុងរួចហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ