អាល្លឺម៉ង់ចាប់ខ្លួនចារបុរសចិន ប៉ុន្តែ ប៉េកាំងប្រកែកនិងប្រាប់ឲ្យគេបញ្ឈប់នយោបាយស្អប់ចិន
ចិនបានប្រកែកយ៉ាងញាប់មាត់ និងបរិហារការនិយាយមួលបង្កាច់ បន្ទាប់ពីអាល្លឺម៉ង់ចាប់ខ្លួនជាបន្តបន្ទាប់ចារបុរសចិននៅក្នុងទឹកដីអាល្លឺម៉ង់។ នៅថ្ងៃអង្គារទី ២៣មេសា តុលាការអាល្លឺម៉ង់បានប្រកាសដំណឹងចាប់ខ្លួនភ្នាក់ងារចារកម្ម ដើមកំណើតចិនម្នាក់ ដែលធ្វើការជាជំនួយការរបស់អ្នកតំណាងរាស្រ្តអាល្លឺម៉ង់ម្នាក់នៅសភាអឺរ៉ុប។ យោងតាមសេចក្តីថ្លែងការណ៍របស់អយ្យការអាល្លឺម៉ង់ ជនសង្ស័យរងការចោទប្រកាន់ថា បានលួចយកការណ៍សម្ងាត់ទាក់ទងសភាអឺរ៉ុបទៅផ្តល់ឲ្យទីភ្នាក់ងារចារកម្មចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣១
បន្ទាប់ពីសំណុំរឿងចារបុរសរុស្ស៊ី ត្រូវចាប់ខ្លួនក្នុងបទរៀបចំគម្រោងបំផ្ទុះបំផ្លាញហេដ្ឋារចនាសម្ព័ន្ធយោធាក្នុងទឹកដីអាល្លឺម៉ង់ តុលាការអាល្លឺម៉ង់កាលពីថ្ងៃអង្គារទី ២៣មេសាបានប្រកាសថា គេបានចាប់ខ្លួនលើកនេះ ចារបុរសចិនវិញម្តងដែលសំងំលួចស្តាប់យកការណ៍សម្ងាត់នៅសភាអឺរ៉ុបទៅប្រគល់ឲ្យទីភ្នាក់ងារស៊ើបការណ៍សម្ងាត់ចិន។
យោងតាមសេចក្តីប្រកាសព័ត៌មានរបស់អយ្យការអាល្លឺម៉ង់ ជនសង្ស័យ ដែលមានឈ្មោះថា Jian Guo សញ្ជាតិអាល្លឺម៉ង់ ដើមកំណើតចិន បានរងការចោទប្រកាន់ថា បានលួចតាមដានសកម្មភាពរបស់អ្នកប្រឆាំងជនជាតិចិន រស់នៅប្រទេសអាល្លឺម៉ង់។ បើតាមតុលាការអាល្លឺម៉ង់ នៅខែមករាឆ្នាំ២០២៤ ជនសង្ស័យដែលមានមុខងារជាអ្នកជំនួយការរបស់អ្នកតំណាងរាស្រ្តអាល្លឺម៉ង់នៅសភាអឺរ៉ុប បានលួចបញ្ជូនជាច្រើនលើកច្រើនសា ព័ត៌មានទាក់ទងនឹងការចរចា និងការសម្រេចរបស់សភាអឺរ៉ុបទៅឲ្យទីភ្នាក់ងារស៊ើបការណ៍សម្ងាត់ចិន។
នៅលើវិបសៃតិ៍របស់សភាអឺរ៉ុប ជនសង្ស័យ ស្ថិតក្នុងបញ្ជីឈ្មោះអ្នកជំនួយការជាច្រើនរូបរបស់អ្នកតំណាងរាស្រ្តអាល្លឺម៉ង់ ដែលបានទទួលសិទ្ធិចេញចូលសភាអឺរ៉ុបក្នុងទីក្រុងព្រុចស៊ែល ប្រទេសបែលហ្សិក តាំងពីឆ្នាំ២០១៩។ យោងតាមប្រព័ន្ធផ្សព្វផ្សាយក្នុងស្រុកអាល្លឺម៉ង់ ជនសង្ស័យមិនមែនជាមនុស្សថ្មីថ្មោង នៅក្នុងក្រសែភ្នែករបស់ក្រុមស៊ើបការណ៍សម្ងាត់អាល្លឺម៉ង់នោះទេ។ កាលពី១០ឆ្នាំមុន ជនសង្ស័យរូបនេះធ្លាប់ស្ម័គ្រខ្លួន ចង់ចូលធ្វើជាអ្នកផ្តល់ព័ត៌មានឲ្យទីភ្នាក់ងារស៊ើបការណ៍សម្ងាត់អាល្លឺម៉ង់ ប៉ុន្តែ មិនបានសម្រេច។
ការចាប់ខ្លួនជំនួយការរបស់អ្នកតំណាងរាស្រ្តអាល្លឺម៉ង់មកពីគណបក្សស្តាំនិយមជ្រុល កាលពីថ្ងៃចន្ទ បានធ្វើឲ្យគណបក្សមួយនេះទើសទាល់ និងបារម្ភខ្លាចពីការបាត់សំឡេងគាំទ្រ នៅតែពីរខែមុនការបោះឆ្នោតសភាអឺរ៉ុប។ អ្នកនាំពាក្យរបស់សភាអឺរ៉ុបបានប្រកាសកាលពីថ្ងៃអង្គារថា ដោយយោងទៅលើស្ថានភាពធ្ងន់ធ្ងរនៅក្រោយការបែកធ្លាយលើកនេះ សភាសម្រេចផ្អាកជាបន្ទាន់ការងាររបស់ជនសង្ស័យ។ រដ្ឋមន្រ្តីក្រសួងមហាផ្ទៃលោកស្រីNancy Faeser ចាត់ទុកសំណុំរឿងលើកនេះថាធ្ងន់ធ្ងរខ្លាំងមែនទែន ព្រោះវាជាការវាយប្រហារលទ្ធិប្រជាធិបតេយ្យអឺរ៉ុប។ សមាជិកសភាអឺរ៉ុបមួយចំនួនវិញចោទប្រកាន់ថា ប្រទេសផ្តាច់ការដូចជាចិន និងរុស្ស៊ីព្យាយាមយ៉ាងសកម្មបំផ្លាញលទ្ធិប្រជាធិបតេយ្យនៅអឺរ៉ុប។
នៅក្នុងរយៈពេលតែ ២ថ្ងៃ អាល្លឺម៉ង់ចាប់បានមនុស្ស ៤នាក់ដែលលួចយកការណ៍សម្ងាត់ទៅឲ្យភ្នាក់ងារចារកម្មចិន។ កាលពីប៉ុន្មានថ្ងៃមុននេះ អាល្លឺម៉ង់ទើបតែបានចាប់ខ្លួនចារកិច្ចរុស្ស៊ី២នាក់ ក្នុងបទចោទប្រកាន់រៀបចំគម្រោងការកម្ទេចបំផ្លាញ ហេដ្ឋារចនាសម្ព័ន្ធយោធានៅក្នុងទឹកដីអាល្លឺម៉ង់ ដូចជាមូលដ្ឋានទ័ពអាមេរិកជាទីដែល ទាហានអ៊ុយក្រែនទទួលការបណ្តុះបណ្តាលឲ្យចេះប្រើរថក្រោះAbraham ដ៏ទំនើបរបស់អាមេរិក។
នៅថ្ងៃចន្ទទី ២២មេសា តុលាការអង់គ្លេសទើបចោទប្រកាន់មនុស្ស២នាក់ នៅក្នុងបទល្មើសដូចគ្នានេះ ពោលគឺធ្វើចារកម្ម នៅទីក្រុងឡុងដ៍ ដើម្បីបម្រើផលប្រយោជន៍ចិន។
ប្រតិកម្មនឹងការចាប់ខ្លួនចារបុរសចិននៅទឹកដីអាល្លឺម៉ង់ និងនៅអង់គ្លេស អ្នកនាំពាក្យរបស់ក្រសួងការបរទេសចិនទាត់ចោលការចោទប្រកាន់ដែលថា ទីភ្នាក់ងារស៊ើបការណ៍ចិននៅពីក្រោយសកម្មភាពលួចបច្ចេកវិទ្យាអឺរ៉ុប។ នៅក្នុងសន្និសីទកាសែតក្នុងទីក្រុងប៉េកាំង អ្នកនាំពាក្យ លោក Wang Wenbin បានបរិហាការនិយាយមួលបង្កាច់ប្រទេសចិន និងថា គេត្រូវឈប់ជាបន្ទាន់នយោបាយពង្វក់ឲ្យស្អប់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ