វិបត្តិស្បៀងជាប្រធានបទស្នូលនៃទស្សនកិច្ចរបស់ប្រធានសហភាពអាហ្រ្វិកនៅក្នុងប្រទេសរុស្ស៊ី
លោកម៉ាកគី ស្ហាល ប្រធានាធិបតីនៃប្រទេសសេណេហ្កាល់ និងជាប្រធានប្តូរវេនសហភាពអាហ្រ្វិកបានទៅបំពេញទស្សនកិច្ចនៅក្នុងប្រទេសរុស្ស៊ីនាថ្ងៃសុក្រ ទី៣ មិថុនា។ លោកម៉ាកគី ស្ហាលត្រូវបានប្រធានាធិបតីរុស្ស៊ីលោកវ្ល៉ាឌីមៀរ ពូទីនទទួលនៅទីក្រុងសុតឈីដែលជាទីក្រុងមាត់សមុទ្រស្ថិតប៉ែកខាងត្បូងប្រទេសរុស្ស៊ី។ ក្រៅពីទំនាក់ទំនងទ្វេភាគីរុស្ស៊ី សហភាពអាហ្រ្វិក វិបត្តិស្បៀងជាប្រធានបទអាទិភាពនៃវត្តមានរបស់លោកម៉ាកគី ស្ហាលនៅរុស្ស៊ីពេលនេះ។
ចុះផ្សាយនៅថ្ងៃ៖
ស្តាប់ - ០២:០៦
សេចក្តីប្រកាសព័ត៌មានរបស់វិមានប្រធានាធិបតីរុស្ស៊ីក្រឹមឡាំងបានបញ្ជាក់ថា កិច្ចសន្ទនារវាងប្រធានាធិបតីរុស្ស៊ីលោកពូទីន និងប្រធានសហភាពអាហ្រ្វិកផ្តោតលើការសន្យារបស់រុស្ស៊ីចំពោះសហភាពអាហ្រ្វិក ពិសេសពង្រីកកិច្ចសន្ទនានយោបាយ កិច្ចសហប្រតិបត្តិការសេដ្ឋកិច្ច និងមនុស្សធម៌ រួមទាំងការដោះដូរទស្សនៈគ្នាទៅវិញ ទៅមកជុំវិញរឿងរ៉ាវនៅក្នុងពិភពលោកបច្ចុបប្បន្ន។ ទោះបីជាវិមានក្រឹមឡាំងមិនបានលើកឡើងចំៗក៏គេដឹងថា រឿងរ៉ាវពិភពលោកបច្ចុប្បន្នក៏មានរឿងសង្រ្គាមអ៊ុយក្រែនមួយដែរ។ ត្រង់ចំណុចនេះ ក្រុមការងាររបស់ប្រធានសហភាពអាហ្រ្វិកបានបញ្ជាក់ដោយមិនលាក់លៀមថា ទស្សនកិច្ចរបស់លោកម៉ាកគី ស្ហាលនៅរុស្ស៊ីមានគោលដៅជួយកាត់បន្ថយភ្លើងសង្រ្គាមនៅអ៊ុយក្រែន និងជួយសម្រួលឲ្យមានការនាំចេញស្រូវសាលីអ៊ុយក្រែនដែលកំពុងជាប់គាំងនៅកំពង់ផែអ៊ុយក្រែន។
គួររម្លឹកថា រុស្ស៊ី និងអ៊ុយក្រែនជាអ្នកផ្គត់ផ្គង់ស្រូវសាលីឲ្យពិភពលោកដល់ទៅ ៣០%។ តែសង្រ្គាមពេលនេះកំពុងធ្វើឲ្យពិភពលោកប្រឈមនឹងវិបត្តិខ្វះស្បៀង ហើយតម្លៃស្រូវសាលីក៏កំពុងឡើងថ្លៃខ្លាំង។ ប្រទេសដែលកំពុងប្រឈមនឹងផលវិបាកខ្លាំងជាងគេ គឺក្រុមប្រទេសអាហ្រ្វិកដែលការនាំចូលស្រូវសាលីមានជាងពាក់កណ្តាលទិញពីអ៊ុយក្រែន ឬរុស្ស៊ី។ សម្រាប់លោកម៉ាកគី ស្ហាលដែលជាប្រធានាធិបតីសេណេហ្កាល់ និងជាប្រធានប្តូរវេនសហភាពអាហ្រ្វិក ការរំដោះស្រូវសាលីពីកំពង់ផែអ៊ុយក្រែនជារឿងចាំបាច់ខ្លាំងណាស់។ នៅក្នុងសារផ្ញើទៅកាន់ថ្នាក់ដឹកនាំអឺរ៉ុបកាលពីថ្ងៃអង្គារ ទី៣១ ឧសភា លោកម៉ាកគី ស្ហាលក៏បានអំពាវនាវយ៉ាងទទូចដូចគ្នានេះ។
នៅម្ខាង អ៊ុយក្រែនមិនអាចនាំស្រូវសាលីចេញបាន ហើយនៅម្ខាងទៀត ការនាំចេញស្រូវសាលីរុស្ស៊ីមួយភាគធំត្រូវបានបិទខ្ទប់ដោយទណ្ឌកម្មរបស់ក្រុមប្រទេសលោកខាងលិច។ អង្គការស្បៀង និងកសិកម្មពិភពលោកកំពុងបារម្ភថា បើសង្រ្គាមអូសបន្លាយ មានមនុស្សពី ៨លានទៅ ១៣លាននាក់បន្ថែមទៀតត្រូវប្រឈមនឹងការខ្វះស្បៀង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ