នាវាដំបូងគេដឹកគ្រាប់ធញ្ញជាតិអ៊ុយក្រែន ចេញដំណើរពីកំពង់ផែអូដេសា
យោងតាមការបញ្ជាក់ពីភាគីតួកគី នាវាទីមួយដែលដឹកគ្រាប់ធញ្ញជាតិរបស់អ៊ុយក្រែន បានចាកចេញពីកំពង់ផែក្រុងអូដេសាហើយ។ បន្ទាប់ពីឆ្លងកាត់ការត្រួតពិនិត្យរួចរាល់ នៅកំពង់ផែក្រុងអ៊ីស្តង់ប៊ូល នាវានេះធ្វើដំណើរនាំយកគ្រាប់ធញ្ញជាតិទៅកាន់កំពង់ប្រទេសលីបង់។ នេះគឺជាដំណឹងល្អមួយ ខណៈតម្លៃទំនិញវត្ថុធាតុដើមគ្រាប់ធុញ្ញជាតិ កាន់តែឡើងថ្លៃខ្លាំង នៅពាសពេញពិភពលោក។ ការអាចនាំចេញគ្រាប់ធុញ្ញជាតិរបស់អ៊ុយក្រែននេះ គឺជាលទ្ធផលនៃកិច្ចព្រមព្រៀង រវាងអ៊ុយក្រែននិងរុស្ស៊ី ដោយមានតួកគី និងអង្គការសហប្រជាជាតិជាអ្នកសម្របសម្រួល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
រដ្ឋមន្ត្រីក្រសួងការពារជាតិតួកគី បានបញ្ជាក់ថា នាវាឈ្មោះ Razoni បានចាកចេញពីកំពង់ផែអូដេសា ប្រទេសអ៊ុយក្រែនហើយ នៅវេលាម៉ោង៦និង១៧នាទីព្រឹក ថ្ងៃចន្ទទី១សីហា។ នាវានេះត្រូវឆ្លងកាត់ច្រកសមុទ្របូស្វ័រ ហើយមកដល់កំពង់ផែអ៊ីស្តង់ប៊ូលនៅថ្ងៃទី២សីហា ជាទីដែលគេនឹងត្រួតពិនិត្យវា មុននឹងអនុញ្ញាតឲ្យធ្វើដំណើរ ឆ្ពោះទៅកាន់គោលដៅចុងក្រោយ គឺកំពង់ផែក្រុងទ្រីប៉ូលី ប្រទេសលីបង់។
បើតាមលោក រដ្ឋមន្ត្រីក្រសួងហេដ្ឋារចនាសម្ព័ន្ធអ៊ុយក្រែន នាវាទី១នេះ មានផ្ទុកគ្រាប់ពោតជំនួន ២៦០០០តោន។ ប្រភពពីរដ្ឋាភិបាលអ៊ុយក្រែនដែរ អះអាងថាមាននាវាទាំងអស់១៦គ្រឿង ដែលជាប់គាំងនៅកំពុងផែ ក្រោយការផ្ទុះសង្គ្រាម ហើយដែលកំពុងរងចាំធ្វើដំណើរនាំគ្រាប់ធញ្ញជាតិចេញទៅបរទេស។ នាវាទាំង១៦នេះ មានផ្ទុកគ្រាប់ធញ្ញជាតិសរុបប្រមាណ ៥៨ម៉ឺនតោន។
គួររំលឹកថា កាលពីថ្ងៃ២២កក្កដា ដោយមានការជ្រោមជ្រែងសម្របសម្រួលពីតួកគី និងអង្គការសហប្រជាជាតិ តំណាងរដ្ឋាភិបាលរុស្ស៊ី និងអ៊ុយក្រែន បានចុះកិច្ចព្រមព្រៀងជាមួយគ្នា ដើម្បីឲ្យអ៊ុយក្រែនអាចចាប់ផ្តើមដំណើរការនាំចេញគ្រាប់ធញ្ញជាតិឡើងវិញ។ ចំណែកកិច្ចព្រមព្រៀងមួយទៀត ចុះស្របពេលជាមួយគ្នានោះ គឺអនុញ្ញាតឲ្យរុស្ស៊ីអាចនាំចេញទិន្នផលកសិកម្មខ្លួន ព្រមទាំងជីកសិកម្មផង ដោយមិនត្រូវជាបទណ្ឌកម្មសេដ្ឋកិច្ចអន្តរជាតិ។
យោងតាមអ្វីដែលមានចែងក្នុងកិច្ចព្រមព្រៀង គឺនាវាត្រូវតែឆ្លងកាត់ការត្រួតពិនិត្យតាមដាន យ៉ាងល្អិតល្អន់ នៅកំពង់ផែក្រុងអ៊ីស្តង់ប៊ូល។ មជ្ឈមណ្ឌលសហប្រតិបត្តិការរួមមួយ ត្រូវបានគេបង្កើតឡើង ដោយមានការចូលរួមពីតំណាងរុស្ស៊ី អ៊ុយក្រែន តួកគី និងអង្គការសហប្រជាជាតិ ដើម្បីធ្វើកិច្ចការនេះ ទាំងការត្រួតពិនិត្យទំនិញស្តុកក្នុងនាវា ទាំងការតាមឃ្លាំមើលការធ្វើដំណើរតាមផ្លូវសមុទ្រ។
គួរកត់សំគាល់ថា ការចាប់ផ្តើមនាំចេញគ្រាប់ធញ្ញជាតិឡើងវិញ របស់អ៊ុយក្រែននិងរុស្ស៊ីនេះ គឺជាដំណឹងដ៏ល្អមួយ ដោយគេរំពឹងថា វានឹងអាចជួយធ្វើឲ្យតម្លៃតម្លៃទំនិញ ក៏ដូចជាវត្ថុធាតុដើមនានាចុះថោក។ ក្រោយការផ្ទុះសង្គ្រាមនៅអ៊ុយក្រែន ដែលបានធ្វើឲ្យរាំងស្ទះទាំងស្រុង ដល់កំពង់ផែ ក៏ដូចជាចរាចរណ៍នាវាក្នុងសមុទ្រខ្មៅ តម្លៃគ្រាប់ធញ្ញជាតិដែលមានស្រូវសាឡី ពោត ព្រមទាំងជីកសិកម្មជាដើម បានឡើងខ្ពស់ស្រឺតៗ។ កង្វះវត្ថុធាតុដើមនេះ បានទាញធ្វើឲ្យតម្លែទំនិញនានាឡើងថ្លៃ បង្កការលំបាកជាខ្លាំងដល់ជីវភាព ជាពិសេសនៅតាមប្រទេសក្រីក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ