នាវាដឹកស្រូវសាឡីជាង២ម៉ឺនតោន របស់កម្មវិធីស្បៀងអាហារពិភពលោក ត្រៀមចេញពីកំពង់ផែអ៊ុយក្រែន
នាវាមួយគ្រឿងរបស់អង្គការកម្មវិធីស្បៀងអាហារពិភពលោក ដែលដឹកស្រូវសាឡីចំនួនជាង២ម៉ឺនតោន បានត្រៀមខ្លួនរួចរាល់ហើយ ដើម្បីចាកចេញពីកំពង់ផែ Pivdenny របស់អ៊ុយក្រែន។ យោងតាមរដ្ឋមន្ត្រីក្រសួងសាធារណការនិងដឹកជញ្ជូនអ៊ុយក្រែន នាវាមនុស្សធម៌ទីមួយនេះ នឹងដឹកស្រូវសាឡីអ៊ុយក្រែន ចេញទៅកាន់ទេសអេត្យូពី។ ប្រទេសតំបន់ស្នែងអាហ្វ្រិក ដែលមានដូចជាអេត្យូពី សូម៉ាលី និងកេនយ៉ា កំពុងតែជួបគ្រោះរាំងស្ងួត ហើយប្រជាជនច្រើនលាននាក់ ប្រឈមនឹងគ្រោះទុរ្ភឹក្ខ។
ចុះផ្សាយនៅថ្ងៃ៖
ស្តាប់ - ០២:១៧
លោក Oleksandre Koubrakov រដ្ឋមន្ត្រីក្រសួងសាធារណការនិងដឹកជញ្ជូនអ៊ុយក្រែន បានចុះមកត្រួតពិនិត្យដោយខ្លួនឯង ដល់កំពង់ផែ Pivdenny ក្នុងទីក្រុង Youjné នៅថ្ងៃអាទិត្យទី១៤សីហា។ នាវា MV Brave Commander របស់អង្គការកម្មវិធីស្បៀងអាហារពិភពលោក (PAM) នឹងដឹកស្រូវសាឡីអ៊ុយក្រែន ចំនួន២៣០០០តោន ឆ្ពោះទៅកាន់កំពង់ផែជីប៊ូទី ដើម្បីទំលាក់ស្រូវសាឡី ឲ្យគេដឹកបន្តទៅប្រទេសអេត្យូពី។
គួររំលឹកថា កាលពីខែកក្កដា អ៊ុយក្រែននិងរុស្ស៊ីបានចុះកិច្ចព្រមព្រៀងជាមួយគ្នា ដោយមានការជ្រោមជ្រែងពីតួកគី និងអង្គការសហប្រជាជាតិ ដើម្បីបើកផ្លូវឲ្យមានចរាចរណ៍នាវាដឹកទំនិញគ្រាប់ធញ្ញជាតិ ចេញពីកំពង់ផែអ៊ុយក្រែនឡើងវិញ។ ចាប់តាំងពីថ្ងៃទី១សីហាមក មាននាវាពាណិជ្ជកម្មឯកជនចំនួន១៦ហើយ ដែលបានចាកចេញពីកំពង់ផែអ៊ុយក្រែន។ តែលើកនេះ គឺជានាវារបស់អង្គការមនុស្សធម៌ទី១ហើយ ដែលដឹកគ្រាប់ធញ្ញជាតិចេញពីកំពង់ផែអ៊ុយក្រែន បន្ទាប់ពីផ្ទុះសង្គ្រាមជាង៥ខែមកនេះ។
លោកស្រី Marianne Ward អគ្គនាយករងទទួលបន្ទុកចាត់ចែងប្រតិបត្តិការ នៃកម្មវិធីស្បៀងអាហារពិភពលោក បានអះអាងថា នឹងមាននាវាច្រើនថែមទៀត ដែលគេគ្រោងដឹកគ្រាប់ធញ្ញជាតិចេញពីអ៊ុយក្រែន ដើម្បីយកទៅជួយប្រទេសក្រីក្រនៅអាហ្វ្រិក។
គួរបញ្ជាក់ដែរថា អ៊ុយក្រែននិងរុស្ស៊ី គឺជាប្រទេស២ដ៏ធំ ដែលនាំចេញទិន្នផលកសិកម្ម ដូចជាស្រូវសាឡី និងគ្រាប់ពោតច្រើនជាងគេបំផុត។ សង្គ្រាមនៅអ៊ុយក្រែនជាង៥ខែមកនេះ បានធ្វើឲ្យតម្លៃស្បៀងអាហារឡើងថ្លៃជាខ្លាំង ខណៈប្រទេសក្រីក្រនៅអាហ្វ្រិកកំពុងជួបគ្រោះរាំងស្ងួត។ យ៉ាងណាមិញ នៅថ្ងៃអាទិត្យទី១៤សីហា សម្តេចប៉ាបប្រមុខសង្ឃកាតូលិក បានអំពាវនាវ ឲ្យសហគមន៍អន្តរជាតិ រួមគ្នាជួយប្រទេសតំបន់ស្នែងអាហ្វ្រិកជាបន្ទាន់ ដែលមានដូចជា សូម៉ាលី អេត្យូពី និងកេនយ៉ា។ គ្រោះរាំងស្ងួតដ៏ធ្ងន់ធ្ងរមិនធ្លាប់មានប្រមាណ៤០ឆ្នាំចុងក្រោយនេះ កំពុងតែធ្វើបានប្រជាជននៅតំបន់នេះ។
យោងតាមអង្គការកម្មវិធីស្បៀងអាហារពិភពលោក យ៉ាងហោចណាស់ មានមនុស្ស៣៤៥លាននាក់ នៅតាមប្រទេសចំនួន៨២ប្រទេស ដែលកំពុងតែប្រឈមនឹងបញ្ហាខ្វះស្បៀងអាហារ ខណៈមនុស្សប្រមាណ៥០លាននាក់ទៀត នៅតាមប្រទេស៤៥ អាចនឹងធ្លាក់ខ្លួនទៅក្នុងគ្រោះទុរ្ភឹក្ខប្រសិនបើគ្មានជំនួយមនុស្សធម៌ ជាបន្ទាន់ទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ