អង់គ្លេសបញ្ចេញទាហាន១២០០នាក់ ដើម្បីធ្វើការជំនួសអ្នកធ្វើកូដកម្ម
នៅមួយសប្តាហ៍មុន ចលនាកូដកម្ម ដែលអាចធ្វើឲ្យអង់គ្លេសជាប់គាំង នៅដំណាច់ឆ្នាំ រដ្ឋាភិបាលអង់គ្លេស បានប្រកាស កាលពីថ្ងៃអាទិត្យ ថានឹងបញ្ចេញកម្លាំងទ័ព ១២០០នាក់ សម្រាប់ជំនួសកូដករ ដែលអាចជាប៉ូលិសព្រំដែន និងអ្នកបើករថយន្តជួយសង្រ្គោះ។ កូដកម្មដើម្បីប្រឆាំងនឹងទំនិញឡើងថ្លៃ កំណើនអតិផរណា ប៉ះពាល់ដល់វិស័យជាច្រើន ជាពិសេស នៅក្នុងវិស័យដឹកជញ្ជូន និងសុខាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
នៅប្រទេសអង់គ្លេស ជាទីដែលកម្រិតអតិផរណាកើនឡើងខ្ពស់ មិនធ្លាប់មាន ១០% ចលនាកូដកម្ម និងបាតុកម្ម ដើម្បីទាមទារការដំឡើងប្រាក់ខែ កាន់តែរីកធំ កើនចំនួន ជារៀងរាល់ថ្ងៃ។
បន្ទាប់ពីធ្វើកូដកម្ម មិនធ្វើការកាលពីថ្ងៃព្រហស្បតិ៍ គិលានុបដ្ឋាយិកានៅមន្ទីរពេទ្យរដ្ឋគ្រោងនឹងធ្វើកូដកម្មម្តងទៀត នៅថ្ងៃអង្គារទី ២០ ធ្នូ ដើម្បីទាមទារការដំឡើងប្រាក់ខែ និងលក្ខខណ្ឌការងារល្អប្រសើរជាងមុន។
ទៅតាមការអំពាវនាវរបស់សហជីព បុគ្គលិកបើករថយន្តសង្រ្គោះបន្ទាន់គ្រោងធ្វើកូដកម្ម នៅថ្ងៃទី ២១ និងថ្ងៃទី ២៨ធ្នូ ចំណែក ប៉ូលិសអន្តោប្រវេសន៍ នៅព្រំដែន ដែលប្រចាំការ នៅព្រលានយន្តហោះប្រកាស មិនចូលធ្វើការ ពីពេលនេះ រហូតដល់ថ្ងៃបុណ្យឆ្លងឆ្នាំ។
នៅក្នុងបទសម្ភាសន៍ជាមួយកាសែតអង់គ្លេស The Sun ចុះផ្សាយកាលពីថ្ងៃអាទិត្យ នាយករដ្ឋមន្ត្រីអង់គ្លេស លោករីស៊ី ស៊ូណាក់ បានចោទសហជីពថា កំពុងបង្កការលំបាក ទុក្ខវេទនាដល់ប្រជាជនអង់គ្លេសរាប់លាននាក់ តាមរយៈការអំពាវនាវធ្វើកូដកម្ម នៅក្នុងវិស័យដឹកជញ្ជូន នៅក្នុងអំឡុងបុណ្យចូលឆ្នាំ។
ដើម្បីប្រឈមនឹងចលនាកូដកម្មដែលរាលដាលដល់វិស័យសុខាភិបាល និងដឹកជញ្ជូន រដ្ឋាភិបាលអង់គ្លេស កាលពីថ្ងៃអាទិត្យបានប្រកាសបញ្ចេញទាហាន១២០០នាក់ និងមន្រ្តីរាជការ ១០០០នាក់ សម្រាប់ទៅជំនួសអ្នកបើករថយន្តសង្រ្គោះបន្ទាន់ និងប៉ូលិសព្រំដែន។
ប្រតិកម្មតបនឹងការប្រកាសរបស់រដ្ឋាភិបាល ដែលគ្រោងបញ្ចេញទាហានដើម្បីជំនួសអ្នកបើករថយន្តសង្រ្គោះបន្ទាន់ និងប៉ូលិសព្រំដែនដែលធ្វើកូដកម្ម ប្រធានសេនាធិការការពារជាតិអង់គ្លេស Tony Radakin ដែលដកស្រង់សំដី ដោយកាសែតSunday Telegraphបានព្រមាន មិនឲ្យគេយកទាហានជាជម្រើសសម្រាប់ ជំនួសបុគ្គលិកដែលធ្វើកូដកម្ម។ សម្រាប់អ្នកទទួលខុសត្រូវខាងលើ កងទ័ពអង់គ្លេសបានបម្រើជាតិច្រើនណាស់មកហើយ។ លោកបានបន្ថែមថា កងទ័ពគ្មានកូតាបម្រុងសម្រាប់ធ្វើការជំនួសអ្នកធ្វើកូដកម្ម និងថា កងទ័ពអង់គ្លេសត្រូវផ្តោតសំខាន់លើតួនាទីចំបង របស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ