អង់គ្លេសយកពន្ធលើក្រុមហ៊ុនប្រេងដើម្បីយកលុយទៅជួយប្រជាជនប្រឈមអតិផរណា
រដ្ឋាភិបាលអង់គ្លេសបានប្រកាសឲ្យដឹង នៅថ្ងៃព្រហស្បតិ៍ អំពីគម្រោងយកពន្ធលើក្រុមហ៊ុនប្រេង ដែលកំពុងទាញយកផលចំណេញពីការឡើងថ្លៃប្រេង ហើយយកលុយពីការយកពន្ធនេះ ទៅចំណាយក្នុងកញ្ចប់ថវិកា ដើម្បីជួយដល់ប្រជាជនក្រីក្រ ដែលកំពុងរងនូវផលប៉ះពាល់ដោយសារបញ្ហាអតិផរណា។ ការសម្រេចនេះត្រូវបានធ្វើឡើង នៅក្នុងបរិបទនៃកំណើនអត្រាអតិផរណាដ៏ខ្ពស់មិនធ្លាប់មាននៅអង់គ្លេស ក្នុងរយៈពេល ៤០ឆ្នាំកន្លងទៅនេះ ចំណែកនាយករដ្ឋមន្រ្តីអង់គ្លេសក៏កំពុងបន្តប្រឈមនឹងរឿងអាស្រូវ ទាក់ទងនឹងការល្មើសនឹងវិធានបិទខ្ទប់កូវីដ កាលពីពេលកន្លងទៅ។
ចុះផ្សាយនៅថ្ងៃ៖
ស្តាប់ - ០២:១៦
ថ្លែងនៅក្នុងកិច្ចប្រជុំសភា នៅថ្ងៃព្រហស្បតិ៍នេះ រដ្ឋមន្រ្តីក្រសួងសេដ្ឋកិច្ចអង់គ្លេសបានឲ្យដឹងថា ពន្ធពិសេស ក្នុងអត្រា ២៥% នឹងត្រូវយកទៅលើប្រាក់ចំណេញរបស់ក្រុមហ៊ុនប្រេង និងឧស្ម័ន ដែល កំពុងតែកើនឡើងកប់ពពក ដោយទាញយកផលចំណេញពីការឡើងថ្លៃប្រេង និងឧស្ម័ន។
រដ្ឋមន្រ្តីក្រសួងសេដ្ឋកិច្ចអង់គ្លេសក៏បានបញ្ជាក់ផងដែរថា ពន្ធពិសេសនេះនឹងត្រូវដាក់ជាលក្ខណៈបណ្តោះអាសន្នតែប៉ុណ្ណោះ។ នៅពេលដែលតម្លៃប្រេង និងឧស្ម័នធ្លាក់ចុះមកកម្រិតធម្មតាវិញ ពន្ធពិសេសនេះក៏នឹងត្រូវកាត់បន្ថយចេញវិញទៅតាមនោះផងដែរ។
យោងតាមការប៉ាន់ស្មានរបស់រដ្ឋាភិបាល ពន្ធពិសេសលើប្រាក់ចំណេញរបស់ក្រុមហ៊ុនប្រេង និងឧស្ម័ននេះ អាចនឹងមានទំហំជាទឹកប្រាក់ប្រមាណជា ៥ពាន់លានផោន ឬស្មើនឹងជាង ៦ពាន់លានដុល្លារ នៅក្នុងរយៈពេលមួយឆ្នាំខាងមុខ។ លុយដែលបានពីការយកពន្ធពិសេសនេះនឹងត្រូវយកទៅដាក់បញ្ចូលក្នុងកញ្ចប់ថវិកា គិតជាសរុបចំនួន ១៩ពាន់លានដុល្លារ ដែលរដ្ឋាភិបាលគ្រោងចំណាយ ដើម្បីជួយប្រជាជនអង់គ្លេស ដែលកំពុងប្រឈមនឹងបញ្ហាជីវភាព បង្កឡើងដោយបញ្ហាអតិផរណា។
តាមគម្រោង នៅខែតុលាខាងមុខនេះ ប្រជាជនអង់គ្លេសទូទៅគ្រប់គ្រួសារទាំងអស់ នឹងទទួលបានជំនួយពីរដ្ឋចំនួន ៤០០ផោន ឬស្មើនឹង ៥០០ដុល្លារ ក្នុងមួយគ្រួសារ ដើម្បីជួយរ៉ាប់រងការចំណាយលើផ្នែកថាមពល។ ចំណែកប្រជាជន ដែលគេរាប់បញ្ចូលជាគ្រួសារក្រីក្រ នឹងទទួលបានជំនួយបន្ថែមពីលើនេះ ចំនួន ៦៥០ផោន ឬស្មើនឹងជាង ៨០០ដុល្លារ ក្នុងមួយគ្រួសារ ដើម្បីជួយទប់ទល់នឹងបញ្ហាទំនិញឡើងថ្លៃ។
គួរបញ្ជាក់ថា កាលពីពេលកន្លងទៅនេះ លោកបូរីស ចនសុន នាយករដ្ឋមន្រ្តីអង់គ្លេសធ្លាប់បានបដិសេធជាច្រើនលើករួចមកហើយ រឿងយកពន្ធពិសេសលើប្រាក់ចំណេញរបស់ក្រុមហ៊ុនប្រេង ក្រោមហេតុផលថា វាអាចនឹងធ្វើឲ្យក្រុមហ៊ុនប្រេងកាត់បន្ថយការវិនិយោគទៅលើវិស័យថាមពលបៃតង។
ហេតុដូច្នេះហើយបានជាមានអ្នករិះគន់ថា ការណ៍ដែលរដ្ឋាភិបាលផ្លាស់ប្តូរជំហរ ប្រកាសយកពន្ធពិសេស ដើម្បីយកលុយទៅជួយប្រជាជននៅពេលនេះ គឺធ្វើឡើង ដើម្បីបង្វែរចំណាប់អារម្មណ៍សាធារណមតិ ឲ្យចេញពីរឿងអាស្រូវ ដែលកំពុងតែកក្រើកឡើងវិញ ជុំវិញរឿងលោកបូរីស ចនសុន ព្រមទាំងមន្រ្តីមួយចំនួនក្នុងជួររដ្ឋាភិបាលរបស់លោក បានធ្វើពិធីជួបជុំគ្នា នៅក្នុងអំឡុងវិបត្តិកូវីដ ល្មើសទៅនឹងវិធានការបិទខ្ទប់ ដែលខ្លួនឯងបានដាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ