អង់គ្លេស ប្រឈមមុខជាថ្មីនៅតុលាការកំពូល ក្នុងសំណុំរឿងលក់អាវុធឲ្យអារ៉ាប៊ីសាអូឌីត
នៅរាជធានីឡុងដ្រ៍ ថ្ងៃអង្គារ រដ្ឋាភិបាលអង់គ្លេស ត្រូវប្រឈមមុខជាថ្មីនៅចំពោះមុខតុលាការកំពូល ក្នុងសំណុំរឿងលក់អាវុធឲ្យបរទេស។ អង្គការដ៏ល្បីល្បាញមួយ ឈ្មោះថា CAAT ធ្វើការខាងប្រយុទ្ធប្រឆាំងនឹងការជួញដូរអាវុធ បានប្តឹងរដ្ឋាភិបាលអង់គ្លេសដែលនៅតែបន្តលក់អាវុធក្នុងតម្លៃរាប់ពាន់លានដុល្លារ ទៅឱ្យរាជាណាចក្រអារ៉ាប៊ីសាអូឌីត។ អារ៉ាប៊ីសាអូឌីត ដែលបានយកអាវុធទៅបង្កសង្គ្រាមដ៏ចម្រូងចម្រាស់ ជាច្រើនឆ្នាំមកហើយ នៅក្នុងប្រទេស យេម៉ែន។
ចុះផ្សាយនៅថ្ងៃ៖
ស្តាប់ - ០២:១៣
បណ្តឹងប្រឆាំងនឹង រដ្ឋាភិបាលអង់គ្លេស បានចាប់ផ្តើមនីតិវិធី តាំងពីឆ្នាំ២០១៩។ ពាក្យប្តឹងកាលនោះ បានជំរុញឲ្យ រដ្ឋាភិបាល បង្ខំចិត្ត ផ្អាកការលក់អាវុធឲ្យ អារ៉ាប៊ីសាអូឌីត មួយរយៈ។ ក៏ប៉ុន្តែ រំលងបានតែមួយឆ្នាំ រដ្ឋអំណាចទីក្រុងឡុងដ្រ៍ ប្រកាសជាថ្មីថាអាចផ្តើមលក់អាវុធនិងបញ្ជូនគ្រឿងបរិក្ខារយោធាឲ្យ រដ្ឋបាលទីក្រុងរីយ៉ាដ វិញបានហើយ គឺបន្ទាប់ពីបានវាយតម្លៃស្ថានការណ៍ជាថ្មី។ ការសិក្សាជាថ្មីនោះ ដែល ទីក្រុងឡុងដ្រ៍ អះអាងថាគ្មានសញ្ញាណហានិភ័យ ក្នុងការរំលោភច្បាប់មនុស្សធម៌អន្តរជាតិ អ្វីធ្ងន់ធ្ងរឡើយ។
ការអះអាងនេះ ត្រូវ អង្គការប្រយុទ្ធប្រឆាំងនឹងការជួញដូរអាវុធ ច្រានទាត់ចោល។ អ្នកនាំពាក្យរបស់អង្គការនេះ ឈ្មោះ Emily Apple បានសម្តែងក្តីសោកស្តាយ និងថា រដ្ឋាភិបាលអង់គ្លេសប្រើមូលហេតុនិងលេសដែលគ្មានមូលដ្ឋានហេតុផល ដើម្បីអាចនឹងបន្តលក់អាវុធ ចំណេញលុយកាក់ខាងសេដ្ឋកិច្ច តែបំផ្លាញសម្លាប់អាយុជីវិតមនុស្ស។
អង្គការដដែល ប្រកាសទិន្នន័យថា ចាប់ពី២០១៥មក ការលក់អាវុធពីសំណាក់រដ្ឋាភិបាលអង់គ្លេសឲ្យ អារ៉ាប៊ីសាអូឌីត គឺមានតម្លៃប្រមាណ ៧,៩ ពាន់លានលីវ្រ។ អង្គការនេះ នៅតែរក្សាជំហរអះអាងថា អាវុធនិងទង្វើរបស់អង់គ្លេស គឺចូលរួមចំណែកបង្កវិនាសកម្មនៅយេម៉ែន និង រំលោភច្បាប់មនុស្សធម៌អន្តរជាតិ ។ អាស្រ័យហេតុដូច្នេះហើយ ទើប តុលាការកំពូល នៅទីក្រុងឡុងដ្រ៍ បានបើកសវនាការជាថ្មី នៅអង្គារ៍ ទី៣១មករា ដើម្បីត្រួតពិនិត្យមើលសកម្មភាពស្របច្បាប់ឬខុសច្បាប់ របស់រដ្ឋាភិបាលអង់គ្លេស។
គួររំឭកជូនថា ចាប់តាំងពីឆ្នាំ២០១៥មក ព្រះរាជាណាចក្រ អារ៉ាប៊ីសាអូឌីត បានបើកយុទ្ធនាការធ្វើសង្គ្រាមនៅប្រទេស យេម៉ែន។ យេម៉ែន ជាទីដែលមានមហាប្រទេសផ្សេងៗលូកដៃបង្កជម្លោះ និងដែលមាននិន្នាការមនោគមន៍វិជ្ជាផ្សេងៗគ្នាផង។
ច្រើនលើកមកហើយ អង្គការសហប្រជាជាតិ បានថ្កោលទោសការបង្កសង្គ្រាមបង្ហូរឈាមនេះ ដែលបង្កជាវិបត្តិមនុស្សធម៌ធ្ងន់ធ្ងរ និងបណ្តាលឲ្យមានគ្រោះទុរ្ភិក្ស គ្រោះអត់ឃ្លាននៅយេម៉ែន។ យេម៉ែន មានប្រជាជនប្រមាណ ៣០លាននាក់ ក្នុងនោះ គឺ រាប់ពាន់នាក់ បានស្លាប់បាត់បង់ជីវិតក្នុងភ្នក់ភ្លើងសង្គ្រាម ក្នុងពេល៧-៨ឆ្នាំចុងក្រោយនេះ ហើយពលរដ្ឋរាប់លាននាក់ ត្រូវរត់ភៀសខ្លួនចោលផ្ទះសម្បែង ទាំងបង្ខំចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ