WHO៖ ការគំរាមកំហែងរបស់មេរោគកូវីដនឹងធ្លាក់ចុះខ្សោយ មកនៅត្រឹម កម្រិតមេរោគគ្រុនផ្តាសាយ
៣ឆ្នាំក្រោយជំងឺកូវីដលេចរូបរាង រាតត្បាតពេញសកលលោក និងបានសម្លាប់មនុស្សជាង ៦លាននាក់ អង្គការសុខភាពពិភពលោក កាលពីថ្ងៃសុក្រម្សិលមិញ វាយតម្លៃថា ស្ថានភាពគំរាមកំហែងរបស់ជំងឺកូវីដ១៩នឹងអាចធ្លាក់ចុះកម្រិត មកនៅត្រឹមជំងឺគ្រុនផ្តាសាយ។ នៅក្នុងសន្និសីទកាសែតកាលពីថ្ងៃ សុក្រ ប្រធានកម្មវិធីអាសន្នរបស់អង្គការសហប្រជាជាតិបានបង្ហាញការជឿជាក់ដែលថា អង្គការសុខភាពពិភពលោកនឹងអាចបញ្ចុះទម្លាក់កម្រិតអាសន្នអតិបរមានៃជំងឺឆ្លងរាតត្បាតកូវីដ យ៉ាងយូរ នៅឆ្នាំ២០២៣នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
នៅក្នុងរយៈពេលជាង៣ឆ្នាំ ដែលជំងឺកូវីដឆ្លងរាតត្បាត សម្លាប់មនុស្ស ជិត ៧លាននាក់ ស្ថានភាពជំងឺកូវីដ នៅក្នុងពិភពលោកសព្វថ្ងៃបានល្អប្រសើរខ្លាំង ជាងពេលណាៗទាំងអស់។ នេះបើតាមការវាយតម្លៃរបស់អង្គការ សុខភាពពិភពលោក។
នៅក្នុងសន្និសីទកាសែត នៅទីក្រុងហ្សឺណែវ កាលពីថ្ងៃសុក្រ អ្នកទទួលខុសត្រូវកម្មវិធីអាសន្នរបស់អង្គការសុខភាពពិភពលោក លោក Michael Ryan អះអាងថា ការគំរាមកំហែងរបស់មេរោគកូវីដបានធ្លាក់ថយចុះ មកនៅត្រឹមកម្រិតមេរោគគ្រុនផ្តាសាយធំ ដែលនៅតែកាច អាចសម្លាប់មនុស្ស ប៉ុន្តែ មិនទៅ បង្ក ការរំខានជីវិតរស់នៅ របស់មនុស្ស ឬដាក់បន្ទុកលើប្រព័ន្ធមន្ទីរពេទ្យ។
ស្ថានភាពជំងឺកូវីដចាប់ល្អប្រសើរឡើងខ្លាំង ធ្វើឲ្យអង្គការសុខភាពពិភពលោក មានទំនុកចិត្តថា គេនឹងអាចបិទទំព័រកូវីដ ជំងឺឆ្លងរាតត្បាតសកល យ៉ាងយូរបំផុត នៅឆ្នាំនេះ។
នៅថ្ងៃទី១១មីនា ឆ្នាំ ២០២០ នាយកអង្គការសុខភាពពិភពលោក លោក តេត្រូស (Tedros Adhanom Ghebreyesu)បានប្រកាសចាត់ទុក ជាផ្លូវការ ជំងឺកូវីដ១៩ ជាជំងឺរាតត្បាតសកល ដោយលែងចាត់ទុកជាជំងឺរីករាលដាលខ្លាំង ឬរាតត្បាតធម្មតា។
នៅខួបបីឆ្នាំ នៃការប្រកាសសុខភាពអាសន្ន កម្រិតពិភពលោក កាលពីសប្តាហ៍មុន លោកតេត្រូស រំលឹកឡើងវិញថា អង្គការសុខភាពពិភពលោកបានសម្រេចចិត្តប្រកាសចាត់ទុក ជំងឺកូវីដ១៩ ជាជំងឺរាតត្បាតសកល ដោយយោងទៅលើភាពអាសន្ន និងការរីករាលដាលធ្ងន់ធ្ងររបស់កូវីដ១៩ និងដើម្បីជំរុញលើកទឹកចិត្តឲ្យពិភពលោកចាត់វិធានការ សមស្របទៅនឹងស្ថានភាពគំរាមកំហែងរបស់មេរោគកូវីដ។
ប៉ុន្តែ នៅ៣ឆ្នាំក្រោយ ប្រធានអង្គការសុខភាពពិភពលោកសង្កេតឃើញថា ករណីឆ្លង និងចំនួនមនុស្សស្លាប់ដោយសារកូវីដ បានធ្លាក់ចុះគួរឲ្យកត់សំគាល់។ នៅក្នុងពិភពលោក មនុស្សប្រមាណ ៣២ ០០០នាក់ ស្លាប់ដោយសារជំងឺកូវីដក្នុងរយៈពេលមួយខែ។
ចាប់តាំងពីលេចមុខដំបូងនៅខេត្តវូហានប្រទេសចិន នៅចុងឆ្នាំ ២០១៩ មេរោគកូវីដសម្លាប់មនុស្សជិត ៧លាននាក់ និងឆ្លងទៅមនុស្សជាង ៧៦០លាននាក់ នៅក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ