មូលនិធិរូបិយវត្ថុអន្តរជាតិអនុម័តផែនការជំនួយថ្មី ១៥ពាន់លានសម្រាប់អ៊ុយក្រែន
អង្គការអន្តរជាតិនិងអ្នកគាំទ្រអ៊ុយក្រែន បាននិងកំពុងផ្តើមជួយស្តារនិងស្ថាបនាប្រទេសអ៊ុយក្រែនឡើងវិញ។ នៅថ្ងៃសុក្រទី ៣១មីនា អង្គការមូលនិធិរូបិយវត្ថុអន្តរជាតិបានអនុម័តជំនួយថ្មី តម្លៃ១៥,៦ពាន់លានដុល្លារ ដែលជាផ្នែកមួយនៃផែនការគោល ១១៥ពាន់លានដុល្លារ ចុះហត្ថលេខាជាមួយរដ្ឋាភិបាលអ៊ុយក្រែនកាលពីពីរសប្តាហ៍មុន។ ការអនុម័តនេះ បានបើកផ្លូវឱ្យអ៊ុយក្រែនបានទទួលលុយមួយវគ្គដំបូងចំនួន២,៧ពាន់លានដុល្លារ។
ចុះផ្សាយនៅថ្ងៃ៖
ស្តាប់ - ០២:០៤
កម្មវត្ថុនៃការផ្តល់ជំនួយថ្មី គឺដើម្បីឱ្យរដ្ឋអ៊ុយក្រែនយកទៅប្រើប្រាស់ជាបឋមសម្រាប់ពង្រឹងគម្រោងថវិកាឆ្នាំ២០២៣របស់ខ្លួនផង និងដើម្បីពង្រឹងប្រភពចំណូលពន្ធដារផង ហើយកំរិតវិបត្តិអតិផរណាទៀត។
ចំណែកឯផែនការគោលរបស់អង្គការមូលនិធិរូបិយវត្ថុអន្តរជាតិ ចូលរួមដោយអង្គការស្ថាប័នព្រមទាំងម្ចាស់កម្ចីទ្វេភាគីអ៊ុយក្រែនជាច្រើនទៀត ដែលមានទំហំ ១១៥ពាន់លានដុល្លារវិញ សំដៅជួយអ៊ុយក្រែន រយៈពេលបួនឆ្នាំ មានទម្រង់ជា ការលុបបំណុលចាស់មួយភាគ ចំនួន២ពាន់លានដុល្លារ សម្រាលបំណុលចំនួន ២០ពាន់លានដុល្លារ ជាប្រាក់កម្ចីចំនួន៦០ពាន់លានដុល្លារ និង ២០ពាន់លានដុល្លារ ជាអំណោយ។ នេះបើតាមការលម្អិតរបស់មូលនិធិរូបិយវត្ថុអន្តរជាតិដដែល
ជាមួយនឹងគម្រោងជំនួយដ៏មហិមានេះ អ៊ុយក្រែនអាចនឹងធានារ៉ាប់រងស្តារ និងស្ថាបនាប្រទេសឡើងវិញបានក្រោយចប់សង្គ្រាម។ មូលនិធិរូបិយវត្ថុអន្តរជាតិរំពឹងថា អ៊ុយក្រែននឹងមានកំណើនសេដ្ឋកិច្ចសន្សឹមៗឡើងវិញបន្តិចម្តងៗនៅឆ្នាំនេះ ហើយហក់ឡើងខ្លាំងនៅឆ្នាំ២០២៤ (៣,២%) និង២០២៥ (៦%)។ ប៉ុន្តែអង្គការក៏មានរៀបសេណារីយ៉ូអវិជ្ជមានខ្លាំង ដោយគ្រោងពន្យារប្រាក់កម្ចី និងបន្ថែមហិរញ្ញវត្ថុ ប្រសិនបើសង្គ្រាមត្រូវអូសបន្លាយយូរខ្លាំងរហូតដល់ចុងឆ្នាំ២០២៥ មិនមែនចប់ត្រឹមពាក់កណ្តាលឆ្នាំ២០២៤ ដូចការគិតនាពេលបច្ចុប្បន្ននេះ។
អ៊ុយក្រែនបានទទួលការគាំទ្រពីអង្គការមូលនិធិរូបិយវត្ថុអន្តរជាតិតាំងពីរុស្ស៊ីចូលឈ្លានពានក្រុងកៀវថ្ងៃទី២៤កុម្ភៈ២០២២ភ្លាម។ តាំងពីពេលនោះមក ធនាគារពិភពលោក បានផ្តល់លុយឱ្យអ៊ុយក្រែន២០ពាន់លានដុល្លារ អាមេរិកជាង១១០ពាន់លានដុល្លារបើបូកនឹងជំនួយយោធាទៀត។ ជំនួយទាំងអស់នេះបានធ្វើឱ្យសេវាសាធារណៈអ៊ុយក្រែនបន្តដំណើរការយ៉ាងរលូននិងឱ្យបុគ្គលិករដ្ឋការទទួលប្រាក់បៀរវត្សរ៍ជាប់ឥតដាច់ ព្រមទាំងបានជួយដោះបន្ទុកក្នុងផ្នែកទ្រទ្រង់ជនធ្វើបំលាស់ទីក្នុងស្រុកទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ