តុលាការព្រហ្មទណ្ឌអន្តរជាតិ ចុះកិច្ចព្រមព្រៀងបើកការិយាល័យនៅអ៊ុយក្រែន
តុលាការព្រហ្មទណ្ឌអន្តរជាតិ និងអ៊ុយក្រែន ចុះហត្ថលេខា នៅថ្ងៃព្រហស្បតិ៍ទី ២៣ មីនា២០២៣នេះ លើកិច្ចព្រមព្រៀងបង្កើតការិយាល័យតុលាការព្រហ្មទណ្ឌអន្តរជាតិមួយនៅក្នុងប្រទេសអ៊ុយក្រែន។ សេចក្តីសម្រេចនេះធ្វើឡើងតែមួយសប្តាហ៍ក្រោយពីស្ថាប័នអន្តរជាតិមួយនេះ ទើបបានចេញដីកាតតាមចាប់ខ្លួនលោកប្រធានាធិបតីរុស្ស៊ី ពូទីន ពីប្រព្រឹត្តឧក្រិដ្ឋកម្មសង្គ្រាម។
ចុះផ្សាយនៅថ្ងៃ៖
ស្តាប់ - ០១:៥៦
រដ្ឋអាជ្ញាអ៊ុយក្រែន លោក អង់ទ្រីអ៊ី កូស្តាំង ដែលតំណាងឱ្យប្រទេស បានចាត់ទុកការព្រមព្រៀងបង្កើតការិយាល័យតុលាការព្រហ្មទណ្ឌអន្តរជាតិនៅក្នុងប្រទេសអ៊ុយក្រែន ថាជាការចាប់ផ្តើមប៉ុណ្ណោះ ព្រោះអ៊ុយក្រែននឹងមិនបញ្ឈប់សកម្មភាពឡើយ បើចាប់ជនប្រព្រឹត្តបទឧក្រិដ្ឋអន្តរជាតិនៅលើទឹកដីអ៊ុយក្រែន ទាំងអស់មិនបានទទួលទោសតាមផ្លូវច្បាប់។
នៅក្នុងសេចក្តីថ្លែងការណ៍ លោករដ្ឋអាជ្ញាបានអបអរសេចក្តីសម្រេចជាប្រវត្តិសាស្ត្ររបស់តុលាការព្រហ្មទណ្ឌអន្តរជាតិដាក់ប្រឆាំងនឹងលោកវ្លាដេមៀ ពូទីន ពីបទប្រព្រឹត្តឧក្រិដ្ឋកម្មសង្គ្រាម ជម្លៀសក្មេងអ៊ុយក្រែន តែបានបញ្ជាក់ថា ការបង្កើតការិយាល័យព្រហ្មទណ្ឌអន្តរជាតិ ជាជំហរឯករាជ្យ ពីនយោបាយ និងយោធា។ គំនិតចង់ឱ្យតុលាការព្រហ្មទណ្ឌមានការិយាល័យនៅក្នុងប្រទេសអ៊ុយក្រែន ត្រូវបានលោក កូស្តាំង បានព្រលយឱ្យដឹងតាំងពីដើមខែមីនាមកម្ល៉េះ។
បង្កើតឡើងនៅឆ្នាំ២០០២ ដើម្បីកាត់ក្តីឧក្រិដ្ឋជនអាក្រក់ៗនៅលើពិភពលោក តុលាការព្រហ្មទណ្ឌអន្តរជាតិដែលមានទីស្នាក់ការកណ្តាលនៅក្រុងឡាអេប្រទេសហូឡង់ មានការិយាល័យរបស់ខ្លួនក្នុងប្រទេសចំនួន៧ផ្សេងទៀត ៖ នៅក្រុងគីនស្ហាឆា បូនីញ៉ា នៃសាធារណរដ្ឋកុងហ្គោ នៅក្រុងកំប៉ាឡាប្រទេសអ៊ូហ្កង់ដា នៅបង់ហ្គីប្រទេសអាហ្វ្រិកកណ្តាល នៅអាប៊ីហ្សង់ ប្រទេសកូដឌីវ័រ នៅត្បីលីស៊ីប្រទេសហ្សកហ្ស៊ី និង នៅបាម៉ាកូប្រទេសម៉ាលី។
ប៉ុន្តែក្រោយចេញដីកាចាប់ខ្លួនលោកពូទីន និងឧត្តមស្នងការសិទ្ធិកុមាររួច ស្ថាប័នតុលាការព្រហ្មទណ្ឌបានទទួលការគំរាមកំហែងពីរុស្ស៊ី ដែលប្រកាសបើកអង្កេតព្រហ្មទណ្ឌប្រឆាំងនឹងរដ្ឋអាជ្ញានិងចៅក្រមរបស់តុលាការចំនួនបីរូប។ អតីតប្រធានាធិបតីរុស្ស៊ី ឌីមីទ្រី មេដវេដេវ ដែលទម្លាប់តែធ្វើសេចក្តីថ្លែងការណ៍បែបវាយប្រហារខ្លាំងៗ បានណែនាំឱ្យក្រុមចៅក្រមCPI មើលមេឃឱ្យច្បាស់ ពោលគឺឱ្យប្រយ័ត្ននឹងសមត្ថភាពវាយប្រហារតាមអាកាសរបស់រុស្ស៊ី។ នៅថ្ងៃពុធទី២១មីនា លោកមេដវេដេវ បានព្រមានទៀតថាប្រទេសណាហ៊ានការចាប់ខ្លួនប្រធានាធិបតីរុស្ស៊ី ប្រទេសនោះប្រកាសសង្គ្រាមនឹងរុស្ស៊ីហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ