អៀរឡង់ខាងជើងប្រារព្វខួប២៥ឆ្នាំ នៃកិច្ចព្រមព្រៀងសន្តិភាពដ៏ផុយស្រួយ
១០ មេសា ១៩៩៨-១០មេសា២០២៣ ថ្ងៃចន្ទនេះជាគម្រប់ខួបទី ២៥ឆ្នាំគត់ នៃការចុះកិច្ចព្រមព្រៀងសន្តិភាព បិទបញ្ចប់ជម្លោះហិង្សាបីទសវត្សរ៍នៅខេត្តអៀរឡង់ខាងជើងរបស់អង់គ្លេស។ ប៉ុន្តែ បច្ចុប្បន្ននេះ សន្តិភាពនៅតែស្ថិតក្នុងសភាពផុយស្រួយខ្លាំងដដែល។ ដូច្នេះគ្មានទេពិធីប្រារព្វខួបយ៉ាងអឹកអធឹកនោះ មានត្រឹមតែដំណើរទស្សនកិច្ចគួរកត់សម្គាល់ របស់លោកប្រធានាធិបតីអាមេរិក ចូបៃដិន នៅអៀរឡង់ខាងជើង នៅប៉ុន្មានថ្ងៃខាងមុខប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១៥
តាមរយៈការចរចារវាងប្រទេសអង់គ្លេស ប្រទេសអៀរឡង់ និងសហរដ្ឋអាមេរិក ក្រុមអ្នកបង្រួបបង្រួមនិយមអៀរឡង់ខាងជើងដែលកាន់សាសនានិកាយប្រូតេស្តង់ និងក្រុមអ្នកសាធារណរដ្ឋអៀរឡង់ខាងជើងកាន់សាសនាកាតូលិកភាគច្រើន គាំទ្រដោយយោធាអង់គ្លេស បានរកឃើញកិច្ចព្រមព្រៀងសន្តិភាព ចុះហត្ថលេខានៅថ្ងៃទី ១០មេសា១៩៩៨ បិទបញ្ចប់ជម្លោះរ៉ាំរៃ ជិតបីទសវត្សរ៍ ដែលផ្តាច់ជីវិតមនុស្សអស់ជាង៣៦០០នាក់។
កិច្ចព្រមព្រៀងសន្តិភាព បានរំសាយព្រំដែនយោធា ដកអាវុធពីកងកម្លាំងស្វ័យត្រាន ហើយកងទ័ពអង់គ្លេសក៏បានចាកចេញ។ ប៉ុន្តែ២៥ឆ្នាំក្រោយមក សន្តិភាពនៅអៀរឡង់ខាងជើងមានស្ថានភាពផុយស្រួយជាងពេលណាៗទាំងអស់។ អៀរឡង់ខាងជើងកំពុងប្រឈមនឹងភាពទ័លច្រកនយោបាយ និងបញ្ហាអសន្តិសុខ។
ជាងមួយឆ្នាំក្រោយពីអង់គ្លេសផ្តាច់ខ្លួនចេញពីសហភាពអឺរ៉ុប ស្ថាប័នមូលដ្ឋាននៅអៀរឡង់ខាងជើងហាក់ត្រូវជាប់គាំង។ គណបក្សបង្រួបបង្រួមនិយមអៀរឡង់ខាងជើង បដិសេធមិនសហការជាមួយរដ្ឋាភិបាលក្រុងឡុងដ៍ទេ ដរាបណាវិធានការក្រោយBrexit ដែលចង់បញ្ចៀសមិនឱ្យមានការដាក់ព្រំដែនខណ្ឌចែកខេត្តអៀរឡង់ខាងជើងនិងប្រទេសអៀរឡង់ ត្រូវលុបចោលទេនោះ។ គណបក្សនេះទើបច្រានចោទពិធីសារដែលអឺរ៉ុបនិងអង់គ្លេសបានចរចាឡើងវិញ កាលពីសប្តាហ៍មុន។ ក្នុងបរិបទតានតឹងនយោបាយនេះ អៀរឡង់ខាងជើងកំពុងដំឡើងកំរិតគំរាមកំហែងភេរវកម្មទៀត ក្រោយពីមានការប៉ុនប៉ងធ្វើឃាតប៉ូលិស ពីសំណាក់សកម្មជនផ្តាច់ខ្លួនបក្សសាធារណរដ្ឋអៀរឡង់ខាងជើង។
គ្មានការប្រារព្វពិធីធំដុំចំថ្ងៃខួបមែន ប៉ុន្តែនាឱកាសនេះ មានឥស្សរជននយោបាយមួយចំនួន នឹងអញ្ជើញទៅអៀរឡង់ខាងជើង។ គួរឱ្យកត់សម្គាល់បំផុតគឺលោកប្រធានាធិបតីអាមេរិក ចូ បៃដិន ដែលមានដើមកំណើតអៀរឡង់ ត្រូវអញ្ជើញទៅដល់ក្រុង Belfast នៅល្ងាចថ្ងៃអង្គារទី ១១មេសា ដើម្បីរំលឹកអំពីឆន្ទៈអាមេរិកក្នុងការគាំទ្រអៀងឡង់ខាងជើង និងអំពីភាពប្រសើរឡើងនៃកិច្ចព្រមព្រៀងសន្តិភាព។ កិច្ចព្រមព្រៀង បន្តទទួលបានការគាំទ្រពីអន្តរជាតិ។ នេះជាប្រសាសន៍របស់លោកនាយករដ្ឋមន្ត្រីអង់គ្លេស ស៊ូណាក់ ដែលកាលណោះមានអាយុទើប១៧ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ