ជំនួបវិនិយោគ ៖ ប្រធានាធិបតីបារាំង ប្រកាសទាក់ទាញវិនិយោគបរទេសបាន ១៣ពាន់លានអឺរ៉ូ
លោក អេម៉ានុយអែល ម៉ាក្រុង បានទទួលជួបមហាសេដ្ឋី អេឡិន មឺស Elon Musk នៅថ្ងៃចន្ទទី ១៥ឧសភានេះ នាឱកាសជួបប្រជុំអ្នកវិនិយោគបរទេស ប្រចាំឆ្នាំ “Choose France”។ ជំនួបបានទាក់ទាញក្រុមហ៊ុនបរទេសឱ្យចូលមកវិនិយោគលើទឹកដីបារាំង ទំហំ១៣ពាន់លានអឺរ៉ូ។ ជាទឹកប្រាក់វិនិយោគដ៏ច្រើនសម្បើមបំផុតមិនធ្លាប់មាន ដែលប្រធានាធិបតីបារាំងសង្ឃឹមថានឹងអាចបាំងបិទវិបត្តិសោធននិវត្តន៍បាន។
ចុះផ្សាយនៅថ្ងៃ៖
ស្តាប់ - ០២:០២
បើកធ្វើជាលើកទីមួយនៅឆ្នាំ២០១៨ ជំនួបទាក់ទាញអ្នកវិនិយោគ« Choose France » បានក្លាយជាការណាត់ជួប ដែលបារាំងតែងរៀបចំធ្វើជារៀងរាល់ឆ្នាំ ដើម្បីបង្ហាញពីជោគជ័យក្នុងនយោបាយ បញ្ចុះតម្លៃការងារនិងបំពាក់ឧស្សាហកម្មឱ្យប្រទេសឡើងវិញ ដោយពន្លឿនអន្តរកាលបរិស្ថានទៀត។ ជំនួបឆ្នាំនេះ បានការចូលរួមពីវិនិយោគិនប្រមាណ៤០០នាក់ ក្នុងនោះជាងពាក់កណ្តាល (២០៦នាក់) ជាថៅកែក្រុមហ៊ុនសហគ្រាសខ្នាតពហុជាតិ។
បើតាមលោកប្រធានាធិបតី បារាំងទាក់ទាញវិនិយោគបរទេសចូលប្រទេស បាន១៣ពាន់លានអឺរ៉ូ ដោយអាចបង្កើតការងារបានចំនួន៨ពាន់ការងារផ្ទាល់។ គម្រោងវិនិយោគដ៏ធំបំផុត ក្នុងចំណោមគម្រោងវិនិយោគទាំង២៨ គឺការវិនិយោគតៃវ៉ាន់បង្កើតរោងចក្រផលិតអាគុយរថយន្តអគ្គិសនីជំនាន់ក្រោយបំផុត នៅភាគខាងជើងប្រទេសបារាំង ក្នុងតម្លៃទឹកប្រាក់ ៥២០០លានអឺរ៉ូ និងផ្តល់ការងារចំនួន៣ពាន់។ រោងចក្រផលិតផ្ទាំងសូឡាគ្រប់គ្រងដោយក្រុមហ៊ុនអឺរ៉ុប នៅភាគខាងកើតប្រទេស ដែលផ្តល់ការងារចំនួន ១៧០០ ជាគម្រោងវិនិយោគដ៏ចម្បងមួយទៀត តម្លៃ៧១០លានអឺរ៉ូ។ នៅក្នុងវិស័យថាមពលវិញ ក្រុមហ៊ុនStart-Up Newcleo ប្រកាសដាក់ទុនវិនិយោគនៅបារាំង ៣ពាន់លានអឺរ៉ូ សម្រាប់រយៈពេល៥ឆ្នាំ (២០២៥-៣០) ដើម្បីអភិវឌ្ឍម៉ាស៊ីនប្រតិករនុយក្លេអ៊ែរខ្នាតតូច។ សូម្បីតែវិស័យគ្រឿងសង្ហារឹម ឱសថក៏មានបរទេសចាប់អារម្មណ៍បន្ថែមការវិនិយោគដែរ។
សូមបញ្ជាក់ថាមុនបើកជំនួប Choose France លោក អេម៉ានុយអែលម៉ាក្រុង បានទទួលជួប ថៅកែរថយន្តTesla ប្រធានក្រុមហ៊ុនយានអវកាសSpaceX និងម្ចាស់ភាគហ៊ុនTwintterដ៏ចម្បង លោក Elon Musk នៅវិមានប្រធានាធិបតីបារាំង ប៉ុន្តែគ្មានសេចក្តីប្រកាសអ្វីទេ មានត្រឹមសាររបស់លោកប្រធានាធិបតីបង្ហោះតាមប្រព័ន្ធសង្គម បញ្ជាក់អំពីមូលបទនៃការជជែកគ្នា ជុំវិញភាពទាក់ទាញនិងភាពជឿនលឿនរបស់បារាំងក្នុងវិស័យរថយន្តអគ្គិសនី និងថាមពល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ