លោកអូបាម៉ា៖ ទិសដៅគឺធ្វើឲ្យក្រុមជីហាតអ៊ីរ៉ាក់ចុះខ្សោយ និងបន្ទាប់មកត្រូវកម្ទេចឲ្យខ្ទេច
ចុះផ្សាយនៅថ្ងៃ៖
ស្តាប់ - ០៨:១២
លោកប្រធានាធិបតីបារ៉ាក់ អូបាម៉ា បានប្រកាសទៅប្រជាជនអាមេរិកាំង កាលពីថ្ងៃពុធ ទី ១០កញ្ញាថា អាមេរិក នឹងធ្វើយុទ្ធនាការប្រឆាំងនឹងក្រុមជីហាតអ៊ីរ៉ាក់ បើទោះបីជាពួកនោះស្ថិតនៅទីណាក៏ដោយ នៅស៊ីរី ឬ នៅអ៊ីរ៉ាក់។ នៅមួយថ្ងៃមុនអាមេរិកប្រារព្ធរំលឹកខួបភេរវកម្មវាយប្រហារអាមេរិក ១១កញ្ញា ប្រធានាធិបតីអាមេរិកប្រកាសបំពាក់អាវុធដល់ក្រុមប្រឆាំងស៊ីរី និងផ្តល់អាវុធដល់ទាហានរដ្ឋាភិបាលអ៊ីរ៉ាក់ ដើម្បី “បំផ្លាញ” ក្រុមជីហាតអ៊ីរ៉ាក់ រដ្ឋអ៊ីស្លាម។ ប្រមុខការបរទេសអាមេរិក លោកចន ឃេរីបានធ្វើដំណើរទៅប្រទេសអារ៉ាប៊ី សាអូឌីត នៅថ្ងៃព្រហស្បតិ៍ ទី ១១កញ្ញា ដើម្បីពិភាក្សាលម្អិត ស្តីពីការអនុវត្តន៍ផែនការទិសដៅរបស់ប្រធានាធិបតីអាមេរិក។
លោកអូបាម៉ា ប្រធានាធិបតីអាមេរិកបានប្តូរជំហរលឿនជាបន្តបន្ទាប់ ទៅលើវិបត្តិជីហាតនៅ អ៊ីរ៉ាក់។ ដោយសារតែមិនចង់ត្រលប់ទៅជាប់ផុងនៅក្នុងសង្រ្គាមស៊ីវិលអ៊ីរ៉ាក់ កាលពីដើមខែសីហា កន្លងទៅ លោកបានបញ្ជាកុំឲ្យគេវាយប្រហារជើងអាកាសច្រើនពេកទៅលើក្រុមជីហាតអ៊ីរ៉ាក់។ បំណងរបស់លោកនៅពេលនោះ គឺគ្រាន់តែដើម្បីជួយការពារអាយុជីវិតរបស់ប្រជាជនអាមេរិកាំងក្នុងទឹកដីអ៊ីរ៉ាក់ផង និងដើម្បីទប់ទល់ក្រុមជីហាតកុំឲ្យសម្លាប់រង្គាលមនុស្សតែប៉ុណ្ណោះ។ ប៉ុន្តែ ក្រោយពីមើលឃើញក្រុមជីហាតឡើងដៃខ្លាំង និងបានកាត់ទោសប្រហារជីហាតយ៉ាងព្រៃផ្សៃលើអ្នកកាសែតអាមេរិកាំង លោកអូបាម៉ាបានផ្លាស់ប្តូរជំហរ និងបានយល់ព្រមត្រលប់ចូលទៅលូកដៃ ក្នុងសង្រ្គាមយូរអង្វែងនៅអ៊ីរ៉ាក់ជាថ្មី។
លោកប្រធានាធិបតីអាមេរិកបានថ្លែងកាលពីថ្ងៃពុធថា អាមេរិកនឹងតាមវាយប្រហារក្រុមភេរវករដែលគំរាមកំហែងសន្តិសុខអាមេរិក បើទោះជាពួកទាំងនោះស្ថិតនៅកន្លែងណាក៏ដោយ មិនថា នៅអ៊ីរ៉ាក់ ឬក៏នៅស៊ីរី។ ដូច្នេះ ជាលើកទីមួយ ដែលគេលឺចេញពីមាត់លោកអូបាម៉ាដែលបានសម្រេចបញ្ជាឲ្យមានអន្តរាគមន៍ទ័ពអាកាសអាមេរិកនៅលើទឹកដីស៊ីរី។ យុទ្ធសាស្រ្តសំខាន់ៗនៃផែនការរបស់លោកអូបាម៉ាមានដូចជា បំពាក់អាវុធដល់ក្រុមប្រឆាំងស៊ីរី និងកងទ័ពអ៊ីរ៉ាក់។ លោកអូបាម៉ាបានប្រកាសបញ្ជូនបន្ថែមអ្នកជំនាញអាមេរិក ៤៧៥នាក់ទៅអ៊ីរ៉ាក់ គឺបង្រ្គប់ចំនួន១៧០០នាក់ ដើម្បីជួយបណ្តុះបណ្តាលផ្នែកយុទ្ធសាស្រ្ត និងផ្តល់ព័ត៌មានសម្ងាត់ដល់កងទ័ពអ៊ីរ៉ាក់ ដើម្បីប្រយុទ្ធប្រឆាំងនឹងក្រុមជីហាត។
លោកអូបាម៉ាដែលមិនចង់ត្រលប់ទៅផុងខ្លួននៅក្នុងសង្រ្គាមនៅអ៊ីរ៉ាក់ជាថ្មី ឬធ្វើសង្រ្គាមនៅស៊ីរី បានបដិសេធមិនបញ្ជូនទ័ពជើងគោកអាមេរិកទៅប្រទេសទាំងនោះ ប៉ុន្តែ លោកបានសម្រេចពង្រឹង និងបំពាក់អាវុធឲ្យក្រុមប្រឆាំងស៊ីរី ឬទាហានអ៊ីរ៉ាក់វិញ។ នៅក្នុងគោលដៅប្រយុទ្ធប្រឆាំងក្នុងរយៈពេល អាមេរិកទាមទារផងដែរឲ្យប្រទេសអារ៉ាប់ក្នុងតំបន់ចូលរួម ដើម្បីធ្វើយ៉ាងណាឲ្យក្រុមជីហាតចុះខ្សោយ។ កន្លងមក មន្រ្តីអាមេរិកមួយចំនួនបាន ចោទប្រកាន់ក្រុមអ្នកមាននៅប្រទេសកាតា និង កូវ៉ែត ថាជាអ្នកផ្តល់លុយដល់ក្រុមជីហាត។ លើសពីនោះទៀត អាមេរិកបានទាមទារផងដែរ ឲ្យប្រទេសតួកគី និងហ្សកដានីចាត់វិធានការលុបបំបាត់ចោលសកម្មភាពរត់ពន្ធប្រេង គឺការទិញប្រេងពីក្រុមជីហាត ដែលក្រុមនេះនឹងយកលុយទៅទិញអាវុធដើម្បីកាប់សម្លាប់អ្នកប្រឆាំងនឹងខ្លួន។ ប្រទេសអារ៉ាប៊ី សាអូឌីតវិញបានស្វាគមអន្តរាគមន៍ និងប្រកាសថា ខ្លួននឹងផ្តល់ទីតាំងដើម្បីបង្វឹកបណ្តុះបណ្តាលក្រុមប្រឆាំងស៊ីរី បន្ទាប់ពីអាមេរិកបានប្រកាសថា នឹងផ្តល់បំពាក់អាវុធដល់ក្រុមប្រឆាំងស៊ីរី ដែលមិនសូវជុ្រលនិយម។
អារ៉ាប៊ី សាអូឌីតជាដៃគូមិនអាចខ្វះបានរបស់អាមេរិក
ក្រុមជីហាតអ៊ីរ៉ាក់ រដ្ឋអ៊ីស្លាមកើតនៅ អ៊ីរ៉ាក់ ប៉ុន្តែ ធ្លាប់ចូលរួមជាមួយក្រុមប្រឆាំងស៊ីរី ដើម្បីវាយប្រយុទ្ធប្រឆាំងនឹងទ័ពរដ្ឋាភិបាលស៊ីរី។ អារ៉ាប៊ី សាអូឌីត ដែលជាប្រទេសមហាសេដ្ឋីប្រេងអាចធ្លាប់ឧបត្ថម្ភដល់ក្រុមប្រឆាំងជាច្រើននៅស៊ីរី ដើម្បីធ្វើយ៉ាងណាឲ្យរបបស៊ីរី ដែលគាំទ្រដោយអ៊ីរ៉ង់ ដែលជាគូប្រជែងរបស់អារ៉ាប៊ី សាអូឌីតធ្លាក់ពីអំណាច។ ដូច្នេះ លុយមួយចំណែករបស់អារ៉ាប៊ី សាអូឌីត អាចធ្លាក់ទៅក្នុងដៃរបស់ក្រុមជីហាតអ៊ីរ៉ាក់ ដែលបានចូលទៅប្រយុទ្ធនៅស៊ីរី។
សម្រាប់អាមេរិក អារ៉ាប៊ី សាអូឌីតដើរតួសំខាន់នៅក្នុងតំបន់ដើម្បីប្រយុទ្ធប្រឆាំង នឹងក្រុមជីហាតអ៊ីរ៉ាក់។ ចំណែក អារ៉ាប៊ី សាអូឌីតបានសម្រេចចូលរួមជាមួយអាមេរិក ដោយមូលហេតុច្រើនយ៉ាង។ នៅចំពោះមុខការវិវត្ត រីកធំធាត់អំណាចរបស់ក្រុមជីហាត ដែលអាចគំរាមកំហែងដល់សន្តិសុខរបស់ខ្លួន អារ៉ាប៊ី សាអូឌីត ក៏បានដឹងថា សត្រូវបន្ទាន់របស់ខ្លួននៅពេលនេះមិនមែនជារបបស៊ីរី ឬអ៊ីរ៉ង់ទេ ប៉ុន្តែ គឺក្រុមជីហាតអ៊ីរ៉ាក់តែម្តង ដែលបានប្រកាសចង់ពង្រីករដ្ឋអ៊ីស្លាមរបស់ខ្លួន នៅក្នុងតំបន់។ អារ៉ាប៊ីសាអូឌីត ខ្លាចថា ក្រុមនេះ ដែលកាន់តែហិង្សា និងសម្លាប់មនុស្សជារៀងរាល់ថ្ងៃ នឹងអាចហៀរចូលទៅក្នុងប្រទេសខ្លួន។ អ៊ីចឹងហើយទើបអារ៉ាប៊ី សាអូឌីតសម្រេចចិត្តចូលមកសហការជាមួយអាមេរិក។ ម្យ៉ាងទៀត ការណ៍ដែលអារ៉ាប៊ី សាអូឌីតចូលមកចាប់ដៃជាមួយអាមេរិក វិញ ក៏ដោយសារតែអាមេរិកសុខចិត្តយល់ព្រមបំពាក់អាវុធដល់ក្រុមប្រឆាំងស៊ីរីសេរី ដែលគំនិតនេះត្រូវបាន អារ៉ាប៊ី សាអូឌីតទាមទារជាយូរមកហើយ។ ហើយនាយករដ្ឋមន្រ្តីថ្មីរបស់អ៊ីរ៉ាក់ ក៏មិនមែនជាមនុស្សគាំទ្រដោយអ៊ីរ៉ង់ ដែលជាសត្រូវរបស់ អារ៉ាប៊ី សាអូឌីតនៅក្នុងតំបន់ដែរ។
អនាធិបតេយ្យ អសន្តិសុខ និងសង្រ្គាមស៊ីវិលកើតមាននៅក្រោយរបបផ្តាច់ការត្រួវផ្តួលរំលំ
ចាប់តំាងពីមានបដិវត្តន៍នៅអារ៉ាប់ គេនៅមិនទាន់ឃើញមានប្រទេសណាមួយបានស្តារខ្លួនឡើងវិញ នៅឡើយទេ។ ជាក់ស្តែង ក្រោយរបបផ្តាច់ការនៅអ៊ីរ៉ាក់ នៅលីប៊ី បានដួលរលំ គឺមានតែចលាចល និងការប្រយុទ្ធហិង្សាដែលនៅបន្តនៅក្នុងប្រទេសទាំងនោះ។ នេះជាកំហុសមួយរបស់ប្រទេសលោកខាងលិចដែលបានលូកដៃទៅជួយក្រុមប្រឆាំង ដើម្បីផ្តួលរបបផ្តាច់ការរបស់លីប៊ី ឬអ៊ីរ៉ាក់ របស់សាដាម ហ៊ូសេន ប៉ុន្តែ ប្រទេសលោកខាងលិចមិនបានបន្តជួយរៀបចំប្រទេសទាំងនោះឲ្យបានស្រួលបួលឡើងវិញទេ។ បើទោះរបបផ្តាច់ការដួលរលំ ប៉ុន្តែ លីប៊ី និងអ៊ីរ៉ាក់នៅតែជួបអសន្តិសុខ អំពើហិង្សាសម្លាប់មនុស្ស និងសង្រ្គាម ហែកហួររវាងបក្សពួកក្រុមប្រឆាំង ដែលក្នុងនោះក៏មានលាយឡូកឡំផងដែរ ក្រុមជីហាត ឬក្រុមភេរវកម្មអាល់កៃដា។ ក្រុមទាំងនេះដើម្បីអំណាចទាមទារគ្រប់គ្រងតែម្នាក់ឯង។
លើកនេះ នៅក្នុងករណីអ៊ីរ៉ាក់ អាមេរិករបស់លោកអូបាម៉ា មិនចង់ធ្វើកំហុសដូចក្នុងអតីតកាល។ លោកអូបាម៉ាសន្យាលូកដៃស្តារប្រព័ន្ធដឹកនាំរបស់អ៊ីរ៉ាក់ ដូចជាប្រមូលគ្រប់ភាគី កុលសម្ព័ន្ធ ឬនិកាយឲ្យចូលរួម ឯកភាពគ្នាដឹកនាំប្រទេសអ៊ីរ៉ាក់។ តាមក្រសួងការបរទេសអាមេរិក អាមេរិកកំពុងជួយរដ្ឋាភិបាលអ៊ីរ៉ាក់ថ្មីក្នុងការបង្កើតប្រព័ន្ធការពារសន្តិសុខជាតិ ដែលមានចូលរួមពីគ្រប់និកាយ គឺទាំងពួកស៊ុននីត ស្ហីអ៊ីត និងពួកគៀក។ ធ្វើដូច្នេះ ដើម្បីធ្វើឲ្យពួកស៊ុននីតឈប់ស្អប់រដ្ឋាភិបាល និងឈប់ចូលរួមជាមួយក្រុមជីហាតអ៊ីរ៉ាក់ ប្រឆាំងនឹងរដ្ឋាភិបាលតទៅទៀត។ នៅស៊ីរីវិញ រដ្ឋបាលអាមេរិកធ្វើការទាំងលើវិស័យយោធា និងនយោបាយ។ អាមេរិកកំពុងរកក្រុមបក្សប្រឆាំងស៊ីរីមិនជ្រុលនិយម ដើម្បីអាចបំពាក់អាវុធឲ្យប្រយុទ្ធប្រឆាំងនឹងរបបផ្តាច់ការបាស្ហាអាល់អាសាដ។ ប៉ុន្តែ អ្នកជំនាញមួយចំនួនវាយតម្លៃថា ការជួយក្រុមប្រឆាំងស៊ីរី ដើម្បីផ្តួលរំលំរបបផ្តាច់ការ ដើម្បីធ្វើឲ្យស៊ីរីជួបរបបប្រជាធិបតេយ្យជារឿងលំបាកមួយ ព្រោះថា ក្រុមប្រឆាំងស៊ីរី ដែលបាក់បែកជាច្រើនបំណែក ភាគច្រើនមានទំនោរចង់ឲ្យសាសនាអ៊ីស្លាម ពោលគឺនិកាយស៊ុននីតរីករឹងមាំនៅស៊ីរី ប៉ុន្តែមិនមែនលទ្ធិប្រជាធិបតេយ្យដែលប្រទេសលោកខាងលិចស្រមៃចង់បាននោះទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ