ប្រមុខការទូតអាមេរិកធ្វើទស្សនកិច្ចនៅអ៊ីរ៉ាក់ ដោយគ្មានជូនដំណឹងមុន
សហរដ្ឋអាមេរិកកំពុងប្រញឹកខ្លាំងក្នុងផែនការស្ថាបនាសម្ព័ន្ធអន្តរជាតិប្រឆាំងនឹងពូកជីហាតរដ្ឋអ៊ីស្លាម។ លោក ចន ឃែរី ប្រមុខការទូតអាមេរិកដែលត្រូវផ្តើម ទស្សនកិច្ចមួយជុំនៅតំបន់ដើមបូព៌ា នៅថ្ងៃពុធនេះ ទៅទៀត ស្រាប់តែបានឆៀងចូលដោយឥតគ្រោងទុក ក្នុងក្រុងបាកដាដ តាំងពីព្រលឹម ដើម្បីលើកទឹកចិត្តដល់រដ្ឋាភិបាលអ៊ីរ៉ាក់ថ្មីទើបកកើត។ ចំណែកប្រធានាធិបតីបារាំង លោក ហ្វ្រង់ស័រ ហូឡង់ ក៏បានប្រកាសថានឹងអញ្ជើញទៅអ៊ីរ៉ាក់ដែរនៅថ្ងៃសុក្រ មុនត្រលប់មកធ្វើជាអធិបតីបើកសន្និសីទអន្តរជាតិស្តីពីអ៊ីរ៉ាក់នៅក្រុងប៉ារីស ថ្ងៃទី ១៥កញ្ញា២០១៤។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
លោក ចន ឃែរី បានអញ្ជើញទៅបំពេញទស្សនកិច្ចលើកដំបូងនៅអ៊ីរ៉ាក់ កាលពីពីរខែកន្លះ ដើម្បីជំរុញអ្នកនយោបាយអ៊ីរ៉ាក់ឱ្យរូតរះបង្កើតរដ្ឋាភិបាល ទើបងាយស្រួលធ្វើការប្រយុទ្ធប្រឆាំងនឹងពួកជីហាតរដ្ឋអ៊ីស្លាម។ នៅថ្ងៃនេះ លោកបានត្រលប់ទៅកាន់ក្រុងបាកដាដជាថ្មី ដោយគ្មានជូនដំណឹងជាមុន គឺដើម្បីពាំនាំសេចក្តី គាំទ្ររបស់អាមេរិកចំពោះរដ្ឋាភិបាលអ៊ីរ៉ាក់ថ្មី ដែលទើបប្រសូតចេញរួចកាលពីថ្ងៃចន្ទ និងដឹកនាំដោយលោក ហៃដា អាល់ អាបាឌី។
ថ្វីដ្បិតតែក្បាលម៉ាស៊ីនដឹកនាំអ៊ីរ៉ាក់ថ្មីនេះ មិនឆ្លើយតបបានទាំងស្រុងនឹងការរង់ចាំក៏ដោយ ក៏សហគមន៍អន្តរជាតិភាគច្រើនបានស្វាគមន៍ និងចាត់ទុកជាដំណាក់កាលដ៏សំខាន់។ ហេតុដូច្នេះហើយ បានជាលោក ប្រមុខការទូត ត្រូវប្រញាប់រួសរាន់ចូលជួបពិភាក្សាភ្លាមនៅថ្ងៃនេះ ជាមួយអាជ្ញាធរថ្មី អំពីតួនាទីមិនអាចខ្វះបានរបស់អ៊ីរ៉ាក់ ក្នុងការស្ថាបនាសម្ព័ន្ធអន្តរជាតិប្រឆាំងនឹងរដ្ឋអ៊ីស្លាម។ បន្ទាប់ពីក្រុងបាកដាដ លោក ចន ឃែរី ត្រូវបន្តដំណើរទៅកាន់ប្រទេសអារ៉ាប៊ីសាអ៊ូឌីត ដូចការគ្រោងទុក ដើម្បីជួបប្រមុខការទូតនៃក្រុមប្រទេសរាជានិយមក្នុងតំបន់ឈូងសមុទ្ទពែរ្ស ដែលត្រូវការឃើញផែនការលម្អិតរបស់អាមេរិកសិន មុនព្រមចូលជាសម្ព័ន្ធអន្តរជាតិប្រឆាំងរដ្ឋអ៊ីស្លាម។
ទន្ទឹមគ្នានោះ សហគមន៍អន្តរជាតិក៏កំពុងបង្កើនល្បឿនប្រយុទ្ធប្រឆាំងនឹងពួកជីហាតដែរ។ លោកប្រធានាធិបតីបារាំងហ្វ្រង់ស័រ ហូឡង់ ត្រូវធ្វើដំណើរទៅអ៊ីរ៉ាក់ដែរនៅថ្ងៃសុក្រទី ១២ កញ្ញានេះ មុនធ្វើជាម្ចាស់ផ្ទះ ទទួលរៀបចំសន្និសីទអន្តរជាតិ ស្តីពីសន្តិសុខអ៊ីរ៉ាក់ នៅទីក្រុងប៉ារីស ដោយមានការចូលរួមពីនាយករដ្ឋមន្ត្រីអ៊ីរ៉ាក់ថ្មីផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ