និស្សិតពីភ្នំពេញមួយក្រុមត្រូវអាជ្ញាធរហាមមិនឲ្យចូលក្បែរព្រំដែនក្នុង ខេត្តរតនគិរី
នៅថ្ងៃទី២៨ ខែសីហានេះ ក្រុមនិស្សិត ដែលមានគ្នាប្រមាណ៣៥នាក់ ត្រូវបានអាជ្ញាធរការពារព្រំដែនស្ថិតក្នុងភូមិឡុំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ហាមមិនឲ្យចូលទៅតំបន់សនៃព្រំដែនស្ថិតក្បែរតំបន់ខាងលើទេ។ ការហាមឃាត់នេះ ត្រូវបានអាជ្ញាធរបញ្ជាក់ថាធ្វើតាមបញ្ជាថ្នាក់លើ ព្រោះភាគីប្រទេសទាំងពីរកំពុងតែដោះស្រាយ។
ចុះផ្សាយនៅថ្ងៃ៖
ស្តាប់ - ០២:៥២
ការប៉ុនប៉ងចូលទៅតំបន់សនៃព្រំដែន ដែលស្ថិតនៅក្បែរភូមិឡុំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី គឺធ្វើឡើងក្នុងគោលបំណងចង់ដឹងពីការជីកស្រះ និងការសាងសង់ប៉ុស្តិ៍ព្រំដែនពីថ្ម របស់ភាគីវៀតណាមក្នុងតំបន់នោះ ចង់ដឹងពីការបោះបង្គោលព្រំដែន ចង់ដឹងពីការប្រឈមរបស់ប្រជាពលរដ្ឋ ដែលរស់នៅក្នុងតំបន់នោះ។ នេះបើតាមតំណាងនិស្សិតកញ្ញាផេង ស្រីស។
និស្សិតរូបនេះបានបន្ថែមថាគោលបំណងនេះនឹងអាចឲ្យយុវជន ដែលចូលរួមជាមួយកញ្ញាអាចធ្វើអ្វី បន្តទៀត ដើម្បីដោះស្រាយ។ ស្រីសបញ្ជាក់ថា បញ្ហាព្រំដែននេះ ជាបញ្ហាគួរឲ្យព្រួយបារម្ភ ព្រោះថ្ងៃក្រោយទៅភាគីវៀតណាមអាចបង្ខិតព្រំដែន ហើយថ្ងៃអនាគតយុវជននឹងមិនដឹងទេ ដូច្នេះបើយុវជនមិនដឹងពីព្រំដែននៅទីណាឲ្យប្រាកដទេ នោះថ្ងៃខាងមុខអាចនឹងបន្តបាត់បង់ទៀត។
នៅព្រឹកថ្ងៃទី២៨ សីហា ក្រុមនិស្សិតទាំងនោះបានធ្វើដំណើរទៅភូមិឡុំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ដោយមានតំណាងសហគមន៍ជាអ្នកសម្របសម្រួល ប៉ុន្តែពួកគេគ្មានឱកាសចូលទៅកាន់តំបន់សនៃព្រំដែនស្ថិតក្បែរតំបន់ខាងលើទេ ព្រោះអាជ្ញាធរការពារព្រំដែនហាមឃាត់។
បើតាមកញ្ញាផេង ស្រីស ក្រុមនិស្សិត ដែលកញ្ញាដឹកនាំនឹងធ្វើទស្សនៈកិច្ចសិក្សាក្នុងខេត្តរតនគិរីរយៈពេល៥ថ្ងៃ ហើយថ្ងៃទី២ នេះ គឺក្រុមកញ្ញាបានបន្តដំណើរទៅបង្គោលព្រំដែនលេខ៣០ ក្រោយពីអាជ្ញាធរហាមឃាត់មិនឲ្យចូលក្នុងតំបន់សនៃព្រំដែនស្ថិតក្បែរភូមិឡុំ។
លោកម៉ី កយ នាយរងប៉ុស្តិ៍ព្រំដែនភូមឡុំ បានបញ្ជាក់ប្រាប់វិទ្យុបារាំងអន្តរជាតិថា ការហាមឃាត់ក្រុមនិស្សិតនេះ លោកធ្វើឡើងតាមបញ្ជារបស់ថ្នាក់ដឹកនាំរបស់លោក ព្រោះគណៈកម្មការកិច្ចការព្រំដែនប្រទេសទាំងពីរកំពុងតែដោះស្រាយ ជៀសវាងការធ្វើដំណើរទៅតំបន់នោះនាំឲ្យមានបញ្ហាចម្រូងចម្រាសរវាងប្រទេសទាំងពីរ។ បើតាមលោកម៉ី កយ មិនមានការប៉ះទង្គិចគ្នាណាមួយកើតឡើងរវាងអាជ្ញាធរ និងក្រុមនិស្សិតទេ។
សូមបញ្ជាក់ថាតាមគម្រោងនៅថ្ងៃចន្ទទី២៩ សីហានេះ កម្ពុជានឹងធ្វើជាម្ចាស់ផ្ទះទទួលរៀបចំកិច្ចប្រជុំចង្អៀតជាមួយគណៈកម្មការកិច្ចការព្រំដែនរបស់វៀតណាម។ កិច្ចប្រជុំនេះនឹងផ្ដោតទៅលើរបៀបវារៈពីរចំណុចសំខាន់ៗ។ កិច្ចប្រជុំនេះធ្វើឡើងបន្ទាប់ពីក្រសួងការបរទេសកម្ពុជា បានផ្ញើកំណត់ទូតមួយទៅប្រទេសវៀតណាម កាលពីថ្ងៃទី១៨សីហា ពាក់ព័ន្ធនឹងការរំលោភបំពានរបស់វៀតណាមនៅតាមខ្សែបន្ទាត់ព្រំដែននាពេលកន្លងមក។
លោក ឆាយ ធី អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តរតនគិរីថា ការហាមឃាត់និស្សិតមិនឲ្យចូលទៅតំបន់សនៃព្រំដែនកម្ពុជា-វៀតណាមនោះ គឺកម្ពុជាគោរពកិច្ចព្រមព្រៀងអំពីតំបន់ស ដូច្នេះហើយទើបអាជ្ញាធរមិនចង់ឲ្យក្រុមនិស្សិតចូលទៅបើពុំមានការចាំបាច់ណាមួយ ដោយមិនបានជូនដំណឹងទៅភាគីវៀតណាម។
លោកបន្ថែមថា កន្លងមកគឺភាគីវៀតណាមបានមកជីកស្រះចូលជ្រៅក្នុងទឹកដីខ្មែរ រួមទាំងការសាងសង់ប៉ុស្តិ៍ព្រំដែន ដែលនេះបញ្ជាក់ថាភាគីវៀតណាមមិនបានគោរពកិច្ចព្រមព្រៀងពីតំបន់ស ដូចភាគីកម្ពុជាទេ។ យ៉ាងណាមិញ លោកឆាយ ធី ចង់ឲ្យអាជ្ញាធរព្រំដែនប្រាប់នូវការពិត ដែលវៀតណាមបានរំលោភចូលមកក្នុងដីកម្ពុជា ដើម្បីឲ្យក្រុមនិស្សិតអាចចងក្រងឯកសារ និងសិក្សាស្វែងយល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ