កងទ័ពខ្មែរ-ថៃអនុញ្ញាតអោយប្រជាជនត្រឡប់ចូលភូមិរបស់ពួកគេវិញ
តំណាងកងទ័ពខ្មែរ និងថៃនៅបន្តជួបគ្នាទៀតនៅព្រឹកថ្ងៃអាទិត្យនេះ ដើម្បីបញ្ជាក់អំពីជំហររបស់ពួកគេ ក្នុងការបន្ធូរបន្ថយភាពតានតឹងផ្នែកយោធា។ កងទ័ពទាំងពីរក៏បានបញ្ជាក់ទៅវិញទៅមកថា ពួកគេនឹងអនុញ្ញាតអោយប្រជាជនដែលរស់នៅតាមតំបន់ព្រំដែន អាចត្រឡប់មករស់នៅក្នុងភូមិឋានរបស់ពួកគេបានតាមធម្មតាវិញ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
មេបញ្ជាការកងពលធំអន្តរាគមន៍លេខ៣ លោកឧត្តមសេនីយទោ ស្រី ឌឹក បានជួបគ្នាជាមួយមេបញ្ជាការកងពលលេខ៦របស់ថៃ កាលពីវេលាថ្ងៃត្រង់ ថ្ងៃអាទិត្យទី៦កុម្ភៈនេះ ដើម្បីធ្វើយ៉ាងណាអោយស្ថានភាពតាមព្រំដែនប្រាសាទព្រះវិហារបានធូរស្រាល។ ហើយថាមេបញ្ជាការទាំងពីរក៏បានព្រមព្រៀងគ្នាផងដែរ អនុញ្ញាតអោយប្រជាជនដែលរស់នៅក្បែរតំបន់ព្រំដែនអាចត្រឡប់ចូលមករស់នៅក្នុងភូមិឋានរបស់ពួកគេវិញ។ ក្រុមអ្នកភូមិទាំងនេះបានរត់ភៀសខ្លួនដើម្បីចាកចេញពីសមរភូមិប្រយុទ្ធគ្នារវាងកងទ័ពខ្មែរ-ថៃកាលពីរសៀលថ្ងៃសុក្រទី៤កុម្ភៈ។
ក្រោយជំនួបដែលបានប្រព្រឹត្តទៅនៅក្បែរច្រកព្រំដែនប្រាសាទព្រះវិហារកាលពីព្រឹកមិញនេះ ឧត្តមសេនីយទោ ស្រី ឌឹក បានថ្លែងប្រាប់អ្នកសារព័ត៌មានអោយដឹងថា លោក និងមេបញ្ជាការកងពលរបស់ថៃបានសន្យារក្សាលំនឹងសភាពការណ៍មិនអោយតានតឹងជាងនេះ។ ប៉ុន្តែលោកបញ្ជាក់ថា លទ្ធភាពនៃការផ្ទុះអាវុធ ឬក៏អត់នោះ គឺអាស្រ័យលើសកម្មភាពរបស់កងទ័ពថៃតែប៉ុណ្ណោះ។ ឧត្តមសេនីយទោ ស្រី ឌឹក បានថ្លែងបញ្ជាក់ជំហរការពារទឹកដីខ្មែរ ក្នុងករណីកងទ័ពថៃរុលចូលមកក្នុងទឹកដីកម្ពុជាទៀតនោះ។
បើទោះជាមានការព្រមព្រៀងគ្នាជាគោលការណ៍រវាងភាគីកងទ័ពទាំងពីរ ក្នុងការចៀសវាងការផ្ទុះអាវុធយ៉ាងណាក៏ដោយ ប៉ុន្តែភាពតានតឹងនៅតែមានតាមរយៈការបន្ថែមគ្រឿងសព្វាវុធ និងកម្លាំងទ័ព។ នាយឧត្តមសេនីយ ហ៊ីង ប៊ុនហៀង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងអង្គរក្សរបស់លោកនាយករដ្ឋមន្ត្រី ហ៊ុន សែន បានថ្លែងប្រាប់កាសែតដើមអម្ពិលនៅថ្ងៃនេះថា កងទ័ពសៀមបានបន្ថែមកម្លាំងរបស់ខ្លួនប្រមាណ២០០០នាក់ និងរថក្រោះ២០គ្រឿងនៅប៉ែកព្រំដែនប្រាសាទតាមាន់ និងតាក្របី ក្នុងខេត្តឧត្តរមានជ័យ។
ក្នុងក្របខ័ណ្ឌនៃការពង្រឹងសមត្ថភាពកងទ័ពរបស់ខ្លួន កម្ពុជាវិញក៏បានបន្ថែមគ្រឿងសព្វាវុធទៅសមរភូមិដូចគ្នា។
បើយោងតាមការបញ្ជាក់របស់លោក ហ៊ីង ប៊ុនហៀង ប្រាប់កាសែតដើមអម្ពិល ការប្រយុទ្ធគ្នា២លើកចុងក្រោយនេះ បានបង្កអោយទាហានកម្ពុជាស្លាប់២នាក់ និងរបួសស្រាលធ្ងន់ប្រមាណ២០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ