អនុប្រធានាធិបតីអាមេរិក ចូ បៃដិន បំពេញទស្សនកិច្ចនៅឥណ្ឌា
នៅថ្ងៃចន្ទនេះ អនុប្រធានាធិបតីសហរដ្ឋអាមេរិក លោក ចូ បៃដិន បានបំពេញទស្សនកិច្ចរយៈពេលបួនថ្ងៃ នៅប្រទេសឥណ្ឌា ដើម្បីរឹតចំណងទំនាក់ទំនងការទូតរវាងអាមេរិកនិងឥណ្ឌា និងជំរុញអោយទំនាក់ទំនងពាណិជ្ជកម្មរវាងប្រទេសទាំងពីរកាន់តែប្រសើរឡើងថែមទៀត។ ទស្សនកិច្ចរបស់លោកបៃដិន ធ្វើឡើងតែប៉ុន្មានសប្តាហ៍ប៉ុណ្ណោះ បន្ទាប់ពីទស្សនកិច្ចរបស់ប្រមុខការទូតអាមេរិក ចន ឃែររី។ នៅពេលដែលទំនាក់ទំនងអាមេរិកនិងឥណ្ឌា ត្រូវបានគេរិះគន់ថា ធ្លាក់ចុះក្នុងប៉ុន្មានឆ្នាំចុងក្រោយនេះ លោកបៃដិនប្រាប់ថា លោកចង់អោយអាមេរិកនិងឥណ្ឌា ខិតខំប្រឹងប្រែងធ្វើការរួមគ្នាបន្ថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
ក្នុង៣ទស្សវត្សរកន្លងមកនេះ លោក ចូ បៃដិន បានក្លាយជាអនុប្រធានាធិបតីទីមួយរបស់សហរដ្ឋអាមេរិក ដែលបានបំពេញទស្សនកិច្ចនៅឥណ្ឌា។ នៅថ្ងៃអង្គារស្អែក លោកនឹងជួបជាមួយនាយករដ្ឋមន្ត្រីឥណ្ឌា ម៉ាន់ម៉ូហាន់ ស៊ីង ហើយលោកនឹងធ្វើសន្ទរកថាសេដ្ឋកិច្ចមួយ នៅក្នុងកិច្ចប្រជុំតុមូលជាមួយបណ្តាសហគ្រាសនានា។
លោកបៃដិនចង់អោយការដោះដូរពាណិជ្ជកម្មរវាងឥណ្ឌានិងអាមេរិកកាន់តែចំរើនទៅមុខ។ យោងតាមអនុប្រធានាធិបតីអាមេរិក ទឹកប្រាក់នៃការដោះដូរពាណិជ្ជកម្មរវាងប្រទេសទាំងពីរនឹងកើនឡើនដល់១០០ពាន់លានដុល្លារអាមេរិក សំរាប់ឆ្នាំ២០១៣នេះ។
ទស្សនកិច្ចរបស់លោក ចូ បៃដិន ធ្វើឡើងតែប៉ុន្មានសប្តាហ៍ប៉ុណ្ណោះ បន្ទាប់ពីទស្សនកិច្ចរបស់ប្រមុខការទូតអាមេរិក ចន ឃែររី កាលពីខែមុន។ គួររំលឹកថា កាលពីខែកក្កដា លោកឃែររី បានធ្វើដំណើរមកឥណ្ឌា ដើម្បីលួងលោមឥណ្ឌាអោយបន្ថយការព្រួយបារម្ភរបស់ខ្លួន នៅពេលដែលកងទ័ពបរទេសដកចេញអស់ពីប្រទេសអាហ្វហ្កានិស្ថាន ក្នុងឆ្នាំ២០១៤ខាងមុខ។ ឥណ្ឌាបារម្ភថា នៅពេលកងទ័ពបរទេសដកអស់ពីប្រទេសនេះ ក្រុមឧទ្ទាមតាលីបង់ដែលជាសត្រូវរបស់ឥណ្ឌា នឹងវិលត្រលប់មកកាន់ក្រុងកាប៊ូលវិញ។
មិនខុសពីលោក ឃែររី លោកបៃដិនបានក្រើនរំលឹកឡើងវិញ ថាអាមេរិកមិនគាំទ្រនូវដំណើរការសន្តិភាពណាដែលមានក្រុមតាលីបង់ចូលរួមនោះទេ លើកលែងតែថា ក្រុមតាលីបង់បញ្ឈប់អំពើហិង្សា ព្រមផ្តាច់ទំនាក់ទំនងខ្លួនជាមួយក្រុមអាល់កៃដា និងព្រមទទួលស្គាល់រដ្ឋធម្មនុញ្ញអាហ្វហ្កានិស្ថាន។ អាមេរិកបន្តគាំទ្រតួនាទីឥណ្ឌាក្នុងការជួយជ្រោមជ្រែងសេដ្ឋកិច្ចអាហ្វហ្កានិស្ថានអោយបានប្រសើរឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ