រដ្ឋមន្ត្រីការពារជាតិកម្ពុជាថៃអាចអនុម័តកាលបរិច្ឆេទនៃការដកទ័ព
ក្រុមលេខាកម្ពុជាថៃរបស់គណៈកម្មាធិការព្រំដែនទូទៅ GBC បានបញ្ចប់កិច្ចប្រជុំ២ថ្ងៃរបស់ខ្លួនហើយនៅល្ងាចថ្ងៃអង្គារទី២០ធ្នូនេះ។ ក្រុមលេខាបានរៀបចំរបៀបវារៈសំខាន់២សម្រាប់កិច្ចប្រជុំធំថ្នាក់រដ្ឋមន្ត្រីការពារជាតិនៅព្រឹកថ្ងៃទី២១ធ្នូ។ នោះគឺកិច្ចសហប្រតិបត្តិការពង្រឹងសន្តិសុខព្រំដែននិងទី២គឺការកែដកកងទ័ពចេញពីតំបន់គ្មានព្រំដែនបណ្តោះអាសន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
មានក្តីសង្ឃឹមច្រើនថាសហប្រធានគណៈកម្មាធិការព្រំដែនទូទៅគឺរដ្ឋមន្ត្រីការពារជាតិទាំង២កម្ពុជាថៃនឹងអាចឈានទៅកំណត់កាលបរិច្ឆេទ និងនីតិវិធីនៃការកែសម្រួលកងទ័ពចេញពីតំបន់ដែលត្រូវគ្មានកងទ័ពបណ្តោះអាសន្ន។ នេះបើយោងតាមការបញ្ជាក់អោយដឹងរបស់អ្នកនាំពាក្យយោធាលោកឧត្តមសេនីយឯកឈុំ សុជាតិ។
លោកឈុំ សុជាតិដែលមានវត្តមាននៅក្នុងកិច្ចប្រជុំក្រុមលេខានៃគណៈកម្មាធិការព្រំដែនទូទៅដែរនោះបានពន្យល់ប្រាប់វិទ្យុបារាំងអន្តរជាតិនៅរសៀលថ្ងៃអង្គារនេះថា ក្រុមលេខាទាំងពីរបានរៀបចំរបៀបវារៈសំខាន់២សម្រាប់កិច្ចប្រជុំគណៈកម្មាធិការព្រំដែនទូទៅនៅព្រឹកថ្ងៃទី២១ធ្នូនេះ។ ទីមួយគឺការសើរើឡើងវិញនូវការងារសហប្រតិបត្តិការផ្នែកយោធានៅតាមព្រំដែនក្នុងរយៈពេលកន្លងមកនិងទី២គឺជាបញ្ហាសំខាន់ដែលប្រជាជាតិទាំងពីរទន្ទឹងចង់ឮនោះគឺការអនុវត្តន៍សាលក្រមតុលាការឡាអេថ្ងៃទី១៨កក្កដា។ ក្នុងចំនុចរសើបចុងក្រោយនេះ បើយោងតាមការបញ្ជាក់របស់មន្ត្រីជាន់ខ្ពស់យោធា គឺរដ្ឋមន្ត្រីការពារជាតិទាំងពីរនឹងបើកកិច្ចប្រជុំចង្អៀតដើម្បីឈានទៅកំណត់កាលបរិច្ឆេទនិងអនុម័តនីតិវិធីនៃការដកកងទ័ពចេញពីតំបន់ដែលត្រូវកងទ័ពបណ្តោះអាសន្ន និងការទទួលយកអ្នកសង្កេតការណ៍ឥណ្ឌូនេស៊ី។
ប្រតិភូជាន់ខ្ពស់នៃគណៈកម្មាធិការព្រំដែនទូទៅភាគីថៃដែលមានសមាជិកជិត១០០នាក់ រួមមានទាំងអ្នកសារព័ត៌មានផងនឹងមកដល់កម្ពុជានៅព្រឹកថ្ងៃពុធទី២១ធ្នូតាមជើងយន្តហោះយោធាពិសេស។ ប្រតិភូនេះដឹកនាំដោយរដ្ឋមន្ត្រីការពារជាតិថៃ លោកឧត្តមសេនីយយុត្ថាសាក់ សាស៊ីប្រាផា។ កិច្ចប្រជុំគណៈកម្មាធិការព្រំដែនទូទៅលើកទី៨ នឹងត្រូវដឹកនាំដោយសហប្រធានដែលជារដ្ឋមន្ត្រីការពារជាតិទាំងពីរកម្ពុជាថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ