កម្ពុជាបដិសេធការអភិវឌ្ឍន៍រួមគ្នានៅក្នុងតំបន់ជម្លោះក្បែរប្រាសាទព្រះវិហារ
កម្ពុជាបានច្រានចោលការអះអាងរបស់មេបញ្ជាការជាន់ខ្ពស់កងទ័ពថៃ លោក ថាណាសាក់ ផាធីម៉ាផាកន ដែលនិយាយថា លោកគាំទ្រសំដីលោកថាក់ស៊ីន ស៊ីណាវ៉ាត់ដែលធ្លាប់ស្នើអោយមានការអភិវឌ្ឍន៍រួមគ្នាក្នុងតំបន់ជម្លោះ ៤,៦គមការ៉េ។ អ្នកនាំពាក្យក្រសួងការបរទេសខ្មែរប្រតិកម្មថា កម្ពុជាមិនអាចយកផ្ទះរបស់ខ្លួនអោយអ្នកផ្សេងជួយគ្រប់គ្រងនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
កាលពីពេលថ្មីៗនេះ អតីតនាយករដ្ឋមន្ត្រីថៃ លោកថាក់ស៊ីន ស៊ីណាវ៉ាត់បាននិយាយប្រាប់កាសែតថៃ បាងកកប៉ុស្តិ៍ថា ក្នុងជំនាន់លោកធ្វើជានាយករដ្ឋមន្ត្រីលោកធ្លាប់បានស្នើមកកម្ពុជានូវផែនការអភិវឌ្ឍរួមគ្នាមួយនៅក្នុងតំបន់ដែលថៃទាមទារទំហំ៤,៦គមការ៉េនោះ។ នៅថ្ងៃពុធនេះ កាសែតបាងកកប៉ុស្ត៍បានស្រង់សម្តីរបស់មេបញ្ជាការជាន់ខ្ពស់ថៃ លោក ថាណាសាក់ ផាធីម៉ាផាកនដែលថ្លែងថាលោកគាំទ្រគំនិតលោកថាក់ស៊ីន ស៊ីណាវ៉ាត់។
សេចក្តីថ្លែងការណ៍របស់លោកមេបញ្ជាការជាន់ខ្ពស់ថៃយ៉ាងនេះ បានតម្រូវអោយអ្នកនាំពាក្យក្រសួងការបរទេសកម្ពុជាប្រតិកម្មភ្លាម ប្រាប់វិទ្យុបារាំងអន្តរជាតិនៅរសៀលថ្ងៃពុធនេះ លោកកុយ គួងថ្លែងថា កម្ពុជាមិនបានយល់ព្រម និងមិនចាំបាច់ត្រូវមានការអភិវឌ្ឍន៍ជាមួយថៃនៅក្នុងតំបន់ដែលទាមទារនោះឡើយ។ មន្ត្រីជាន់ខ្ពស់ក្រសួងការបរទេសបន្តថា កម្ពុជាមិនអាចយកផ្ទះរបស់ខ្លួនទៅអោយអ្នកណាជួយគ្រប់គ្រងនោះទេ។
សូមបញ្ជាក់ថា នៅថ្ងៃនេះ កាសែតថៃThe Nation ក៏បានផ្សាយអោយដឹងផងដែរថា លោកស្រីនាយករដ្ឋមន្ត្រីថៃ យីងឡាក់ ស៊ីណាវ៉ាត់បានអនុម័តលើការបង្កើតក្រុមការងារមួយដើម្បីមកជជែកជាមួយកម្ពុជាស្តីពីការអនុវត្តន៍ដីការបស់តុលាការឡាអេដែលបង្គាប់អោយកម្ពុជានិងថៃដកកងទ័ពចេញពីតំបន់គ្មានកងទ័ពបណ្តោះអាសន្ន។
ទាក់ទងនឹងបញ្ហានេះ រដ្ឋមន្ត្រីការពារជាតិកម្ពុជា លោកឧបនាយករដ្ឋមន្ត្រីទៀ បាញ់ បានថ្លែងប្រាប់អ្នកសារព័ត៌មាននៅថ្ងៃនេះដែរថា កម្ពុជានៅតែមិនទាន់ទទួលបានពេលវេលានៃកិច្ចប្រជុំក្រុមការងារចម្រុះពីភាគីថៃដែលជាអ្នករៀបចំកិច្ចប្រជុំនេះនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ