ថៃ មិនទាន់យល់ព្រមឲ្យអ្នកសង្កេតការណ៍ចុះមកកាន់តំបន់ព្រំដែនជម្លោះ
នាយករដ្ឋមន្ត្រីថៃ លោក អាប់ភិស៊ីត វេចាជីវ៉ា បានប្រកាសថា ថៃ មិនអនុញ្ញាតឲ្យអ្នកសង្កេតការណ៍ឥណ្ឌូណេស៊ី ចូលទៅកាន់តំបន់ព្រំដែនជម្លោះ ជិតប្រាសាទព្រះវិហារឡើយ។ តំបន់ជម្លោះនៅព្រំដែនកម្ពុជា-ថៃ ដែលថៃ ហៅថា តំបន់ ៤,៦ គីឡូម៉ែត្រក្រឡា។ ក៏ប៉ុន្តែប្រមុខការទូតកម្ពុជា លោក ហោ ណាំហុង បានប្រកាសតបវិញថា កម្ពុជាសុខចិត្ត ធ្វើសម្បទានបន្ត ដើម្បីធ្វើយ៉ាងណា ឲ្យតែអ្នកសង្កេតការណ៍ឥណ្ឌូណេស៊ី បានមកឈរជើង នៅតំបន់ព្រំដែន ដើម្បីត្រួតពិនិត្យបទឈប់បាញ់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
កាសែតថៃ បានស្រង់សម្តីនាយករដ្ឋមន្ត្រីថៃ អាប់ភិស៊ីត មកចុះផ្សាយនៅថ្ងៃនេះថា ក្រសួងការបរទេស និងក្រុមឧត្តមសេនីយ៍យោធាថៃ មិនមានជំហរផ្ទុយគ្នាទេ លើការបដិសេធ មិនអនុញ្ញាតអោយអ្នកសង្កេតការណ៍យោធាឥណ្ឌូណេស៊ី ចូលក្នុងតំបន់ជម្លោះព្រំដែនកម្ពុជា-ថៃ ជិតប្រាសាទព្រះវិហារឡើយ។
ដោយអះអាងថា តំបន់ដែលថៃហៅថា ៤,៦ គីឡូម៉ែត្រក្រឡា ជារបស់ថៃ លោកនាយករដ្ឋមន្ត្រី អាប់ភិស៊ីត បានលើកឡើងថា ថៃនឹងមិនអនុញ្ញាតអោយអ្នកសង្កេតការណ៍ឥណ្ឌូណេស៊ី ចូលឈរជើងក្នុងតំបន់ជម្លោះ ៤,៦ គីឡូម៉ែត្រក្រឡា នៅជុំវិញប្រាសាទព្រះវិហារបានទេ។ ផ្ទុយទៅវិញ បើអនុញ្ញាតអោយអ្នកសង្កេតការណ៍ចូលតំបន់ជម្លោះនោះ វានឹងធ្វើអោយសភាពការណ៍ព្រំដែនកម្ពុជា-ថៃ កាន់តែអាក្រក់ឡើង។
លោក អាប់ភិស៊ីត បានបន្តថា អ្នកសង្កេតការណ៍ មិនមានអាវុធ អាចបញ្ជូនមកបាន តែត្រូវមានការពិភាក្សាថែមទៀត អំពីទីកន្លែងឈរជើង។
ប្រមុខការទូតកម្ពុជា-ថៃ បានយល់ព្រម ទទួលយកអ្នកសង្កេតការណ៍ឥណ្ឌូណេស៊ី ១៥ នាក់ម្ខាង ដាក់នៅតំបន់ព្រំដែនផ្ទុះអាវុធ កាលពីដើមខែកុម្ភៈ ដើម្បីត្រួតពិនិត្យបទឈប់បាញ់ជាអចិន្ត្រៃយ៍ ស្របតាមសេចក្តីសម្រេចរបស់អាស៊ាន និងក្រុមប្រឹក្សាសន្តិសុខអង្គការសហប្រជាជាតិ។
កម្ពុជា បានយល់ព្រមភ្លាមៗ ដើម្បីទទួលអ្នកសង្កេតការណ៍ទាំងនោះ។ ប៉ុន្តែថៃ រារែក និងមិនចង់បានអ្នកសង្កេតការណ៍ឡើយ។
ការដាក់លក្ខខណ្ឌរបស់ថៃ ចំពោះអ្នកសង្កេតការណ៍ឥណ្ឌូណេស៊ី មិនឲ្យកាន់អាវុធ មិនពាក់ឯកសណ្ឋានយោធា ជាអ្នកការទូត និងមិនឲ្យអ្នកសង្កេតការណ៍ទាំងនោះ ចូលក្នុងតំបន់ដី ដែលថៃហៅថា ៤,៦ គីឡូម៉ែត្រក្រឡា ត្រូវបានលោក ហោ ណាំហុង លើកឡើងថា កម្ពុជាត្រៀមធ្វើសម្បទានបន្ត ដើម្បីឈានទៅដល់ការដាក់អ្នកសង្កេតការណ៍ឥណ្ឌូណេស៊ី ឲ្យបាននៅតំបន់ព្រំដែន ជៀសវាងជម្លោះប្រដាប់អាវុធទៅមុខទៀត។
យ៉ាងណាក៏ដោយ នៅក្រៅកិច្ចប្រជុំអាស៊ានជប៉ុន កាលពីថ្ងៃ៩មេសា រដ្ឋមន្ត្រីការបរទេស កម្ពុជា-ថៃ និងឥណ្ឌូណេស៊ី បានជួបគ្នាមួយភ្លែត។ រដ្ឋមន្ត្រីការបរទេសឥណ្ឌូណេស៊ី ក្នុងនាមប្រធានអាស៊ាន បានជំរុញឲ្យភាគីថៃ ធ្វើការសម្រេចពីការដាក់ពង្រាយអ្នកសង្កេតការណ៍ គ្មានអាវុធ ឲ្យបានឆាប់។ តែរដ្ឋមន្ត្រីការបរទេសថៃ បានអង្គុយស្ងៀម ហើយងក់ក្បាល តែមិននិយាយអ្វីសូម្បីតែមួយម៉ាត់។ នេះបើតាមការបញ្ជាក់របស់លោក ហោ ណាំហុង នៅពេលវិលត្រឡប់ពីកិច្ចប្រជុំក្នុងប្រទេសឥណ្ឌូណេស៊ី កាលពីល្ងាចថ្ងៃអាទិត្យម្សិលមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ