ប្រមុខការទូតចិនជំរុញឲ្យកម្ពុជាដោះស្រាយបញ្ហានយោបាយដោយសន្តិវិធី
លោក វ៉ាង យី រដ្ឋមន្ត្រីការបរទេសចិនដែលកំពុងបំពេញទស្សនកិច្ចនៅភ្នំពេញបានជំរុញឲ្យកម្ពុជាដោះស្រាយបញ្ហាបោះឆ្នោតដោយសន្តិវិធីតាមរយៈកិច្ចពិភាក្សាគ្នា។ ការជំរុញបែបនេះបានធ្វើឡើងខណៈដែលកម្ពុជាកំពុងជួបភាពតានតឹងខាងនយោបាយដោះស្រាយមិនចេញរវាងគណបក្សជាប់ឆ្នោតទាំងពីរ។ ប៉ុន្តែ ប្រមុខការទូតទីក្រុងប៉េកាំងបានគាំទ្រយ៉ាងចំហដល់គណបក្សប្រជាជនកម្ពុជាក្នុងឋានៈជាគណបក្សឈ្នះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ថ្លែងក្នុងសន្និសីទកាសែតរួមគ្នាមួយនៅថ្ងៃពុធនេះនៅសណ្ឋាគារអាំងទែកុងទីណង់តាល់ លោក វ៉ាង យី រដ្ឋមន្ត្រីការបរទេសចិន បានសម្តែងការគាំទ្រយ៉ាងម៉ឺងម៉ាត់ដល់រដ្ឋាភិបាលរបស់លោកនាយករដ្ឋមន្ត្រី ហ៊ុន សែន ជាពិសេសគណបក្សប្រជាជនកម្ពុជាដែលបានឈ្នះឆ្នោតភាគច្រើននៅក្នុងរដ្ឋសភា។ ជាការឆ្លើយតប លោក ហោ ណាំហុង រដ្ឋមន្ត្រីការបរទេសកម្ពុជាបានថ្លែងអំណរគុណចំពោះចិនដែលបានគាំទ្រលទ្ធផលបោះឆ្នោតនៅពេលនេះ។
យ៉ាងណាក៏ដោយ ប្រមុខការទូតទីក្រុងប៉េកាំងបានជំរុញឲ្យភាគីជម្លោះនយោបាយនៅកម្ពុជាដោះស្រាយបញ្ហាដោយសន្តិវិធីតាមរយៈការចរចាគ្នាដើម្បីឈានទៅបង្កើតរដ្ឋសភា និងរដ្ឋាភិបាលថ្មីនៅពេលខាងមុខ។ ក្នុងជំនួបជាមួយលោកនាយករដ្ឋមន្ត្រី ហ៊ុន សែន នៅឯវិមានសន្តិភាពនាព្រឹកថ្ងៃពុធទី ២១ សីហានេះ រដ្ឋមន្ត្រីការបរទេសចិនក៏បានជំរុញបញ្ហានេះដូចគ្នាដែរ។
នៅក្នុងជំនួបជាង ២ ម៉ោងនោះ ប្រមុខការទូតចិនបានសាទរចំពោះការបោះឆ្នោតជ្រើសរើសតំណាងរាស្ត្រអាណត្តិទី៥នៅកម្ពុជាកាលពីថ្ងៃទី ២៨ កក្កដា ដែលគណបក្សប្រជាជនកម្ពុជាបានឈ្នះកៅអីភាគច្រើននៅក្នុងរដ្ឋសភា។ រដ្ឋមន្ត្រីការបរទេសចិន លោក វ៉ាង យី ក៏បានសង្កេតឃើញដែរថា ការបោះឆ្នោតនៅកម្ពុជាមានលក្ខណៈកាន់តែល្អប្រសើរ។
លោក នាយករដ្ឋមន្ត្រី ហ៊ុន សែន ក៏បានបញ្ជាក់ប្រាប់រដ្ឋមន្ត្រីការបរទេសចិនថា គណបក្សប្រជាជនកម្ពុជានៅតែរក្សាជំហរដដែលដោយមិនផ្លាស់ប្តូរទេ នោះគឺកិច្ចប្រជុំរដ្ឋសភាលើកដំបូងក្រោយការបោះឆ្នោតយ៉ាងយូរ ៦០ថ្ងៃ និងការបង្កើតរដ្ឋាភិបាលថ្មីចេញពីការបោះឆ្នោតនឹងប្រព្រឹត្តទៅដូចការគ្រោងទុកដោយគ្មានឧបសគ្គបណ្តាលមកពីការជាប់គាំងនយោបាយនោះឡើយ។
ដំណើរទស្សនៈកិច្ចរបស់រដ្ឋមន្ត្រីការបរទេសចិននៅកម្ពុជានាពេលនេះ មានគោលដៅពង្រឹងចំណងមិត្តភាពនិងកិច្ចសហប្រតិបត្តិការរវាងប្រទេសទាំងពីរជាពិសេសដើម្បីប្រារព្ធខួបទី ៥៥ឆ្នាំ នៃចំណងការទូតរវាងប្រទេសទាំងពីរ។ លោក វ៉ាង យី បានវាយតម្លៃខ្ពស់ចំពោះទំនាក់ទំនងរវាងទីក្រុងភ្នំពេញ និងប៉េកាំង និងអះអាងថា នៅតែបន្តគាំទ្រកម្ពុជា និងពង្រឹងចំណងទាក់ទងនេះជានិច្ច។
គួរកត់សម្គាល់ថា ដំណើរទស្សនកិច្ចរបស់ប្រមុខការទូតចិនបានធ្វើឡើងចំពេលដែលកម្ពុជាកំពុងជួបប្រទះបញ្ហានយោបាយតានតឹងក្រោយការបោះឆ្នោត។ តាមរយៈទស្សនកិច្ចនេះមហាយក្សចិនក៏បានបង្ហាញការគាំទ្រដោយត្រង់ៗដល់រដ្ឋាភិបាលរបស់លោកនាយករដ្ឋមន្ត្រី ហ៊ុន សែន ក្នុងឋានៈជាបក្សឈ្នះឆ្នោត បើទោះបីជាគណបក្សប្រឆាំងកំពុងតវ៉ាជំទាស់លទ្ធផលនៃការបោះឆ្នោតក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ