លោកកឹម សុខា ប្រាប់សកម្មជនឲ្យរៀបចំខ្លួនទៅដឹកនាំប្រទេសនៅអាណត្តិក្រោយ
ប្រធានស្តីទីគណបក្សសង្គ្រោះជាតិលោកកឹម សុខា នៅព្រឹកថ្ងៃសៅរ៍នេះ បានចុះទៅជួបសំណេះសំណាលជាមួយថ្នាក់ដឹកនាំមូលដ្ឋាន សកម្មជន ចលនាយុវជន និងចលនាស្ដ្រីគណបក្សនៅក្នុងក្រុងសៀមរាប ខេត្តសៀមរាប។ នៅក្នុងវេទិកាពង្រឹងថ្នាក់មូលដ្ឋាននេះ លោកកឹម សុខា បានប្រាប់សកម្មជនរបស់ខ្លួនឲ្យរៀបចំខ្លួន ដើម្បីទៅដឹកនាំប្រទេសជាតិអាណត្តិក្រោយនេះ។
ចុះផ្សាយនៅថ្ងៃ៖
ស្តាប់ - ០២:០១
នៅចំពោះមុខសកម្មជន និង អ្នកគាំទ្ររបស់ខ្លួនជាច្រើនរយនាក់នៅឯសៀមរាបនៅថ្ងៃសៅរ៍នេះ លោកកឹម សុខា ប្រធានស្តីទីគណបក្សសង្គ្រោះជាតិ បានថ្លែងយ៉ាងដូច្នេះថា នៅក្នុងដំណាក់ការថ្មីនេះ សកម្មជនគណបក្សសង្គ្រោះជាតិ មិនចាំបាច់ទៅឆ្លើយទៅឆ្លងទៅឈ្លោះជាមួយគេទៀតនោះទេ គឺត្រូវយកពេលរៀបចំខ្លួនទៅដឹកនាំប្រទេសនៅក្នុងអាណត្តិក្រោយ។ លោកប្រធានស្តីទីគណបក្សសង្គ្រោះជាតិ បានថ្លែងដូចនេះ ក៏ព្រោះតែលោកយល់ថា ប្រជាពលរដ្ឋជាច្រើនបានងាកមកគាំទ្រគណបក្សប្រឆាំង ហើយលោកថា ប្រជាពលរដ្ឋខ្មែរនាពេលបច្ចប្បន្ននេះ គឺមានការយល់ដឹងខ្លាំងដែលជាហេតុនាំឲ្យគណបក្សសង្គ្រោះជាតិទទួលបានការគាំទ្រច្រើនដូចសព្វថ្ងៃ។ គឺនៅត្រង់ចំណុចនេះហើយ ដែលលោកកឹម សុខា បានបញ្ជាក់ប្រាប់ទៅលោកចន ឃែរី ប្រមុខការទូតអាមេរិកក្នុងអំឡុងពេលបំពេញទស្សនកិច្ចនៅកម្ពុជាថា ប្រជាពលរដ្ឋខ្មែរមិនចាញ់ប្រជាពលរដ្ឋភូមានោះទេ។
ចំណែកលោកសម រង្ស៊ី ប្រធានគណបក្សសង្គ្រោះជាតិតាមរយៈវីឌីអូខុនហ្វើរ៉េនពីក្រៅប្រទេសវិញ ក៏បានថ្លែងប្រាប់សកម្មជន និងអ្នកគាំទ្រគណបក្សប្រឆាំងដែរថា មានតែគណបក្សសង្គ្រោះជាតិទេ ដែលអាចសង្គ្រោះប្រទេសកម្ពុជាបាននោះ។ លោកសង្កត់ធ្ងន់ថា បើការតស៊ូចុងក្រោយនេះមិនសម្រេចគោលដៅទេ នោះជាតិនឹងរលាយ។ ដូច្នេះ គណបក្សសង្គ្រោះជាតិត្រូវតែក្តោបក្តាប់ឱកាសនេះ ដើម្បីកុំមានវិប្បដិសារីទៅថ្ងៃក្រោយ។
សូមបញ្ជាក់ថា ការចុះទៅពង្រឹងថ្នាក់មូលដ្ឋាននៅក្នុងខេត្តសៀមរាបនេះ មិនមែនជាលើកទីមួយទេសម្រាប់គណបក្សសង្គ្រោះជាតិនោះ ពោលគឺចាប់តាំងដើមឆ្នាំ២០១៦នេះមក គណបក្សប្រឆាំងបានបង្កើនសកម្មភាពចុះពង្រឹងថ្នាក់មូលដ្ឋានរបស់ខ្លួនជាបន្តបន្ទាប់គួរឲ្យកត់សម្គាល់។ ការចុះទៅនេះ ក៏មិនមែនជារឿងចៃដន្យនោះដែរ ប៉ុន្តែវាជាយុទ្ធសាស្ត្ររបស់គណបក្សមួយនេះ សម្រាប់ត្រៀមការបោះឆ្នោតជ្រើសរើសក្រុមប្រឹក្សាឃុំ សង្កាត់ក្នុងឆ្នាំ២០១៧ និង ការបោះឆ្នោតជាតិក្នុងឆ្នាំ២០១៨។
ជាការកត់សម្គាល់ រាល់ការថ្លែងទៅកាន់សកម្មជន និង អ្នកគាំទ្ររបស់ខ្លួនម្តងៗ ថ្នាក់ដឹកនាំគណបក្សសង្គ្រោះជាតិតែងតែអះអាងជាមុនថា គណបក្សប្រឆាំងនឹងឈ្នះការបោះឆ្នោត ដូចយ៉ាងនៅក្នុងខេត្តសៀមរាបនៅពេលនេះអ៊ីចឹង។ ក៏ប៉ុន្តែគណបក្សប្រជាជនកម្ពុជា មិនបានចាប់អារម្មណ៍ចំពោះការអះអាងណាមួយរបស់គណបក្សសង្គ្រោះជាតិនោះទេ ព្រោះថាជាការះអះអាងមុនចេញលទ្ធផលបោះឆ្នោតតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ