ទស្សនកិច្ចលោកហ៊ុន សែននៅឥណ្ឌា៖ភាគីទាំងពីររំពឹងថា ទំនាក់ទំនងនឹងកាន់តែល្អថែមទៀត
នៅព្រឹកនេះ នាយករដ្ឋមន្ត្រីកម្ពុជាបានដឹកនាំប្រតិភូមួយក្រុមចេញទៅបំពេញទស្សនកិច្ចផ្លូវការនៅក្នុងប្រទេសឥណ្ឌារយៈពេលបីថ្ងៃចាប់ពីថ្ងៃទី២៥ ដល់ថ្ងៃទី២៧ មករា។ ទស្សនកិច្ចនេះក្នុងទិសដៅចូលរួមកិច្ចប្រជុំពិសេសរំលឹកខួបអនុស្សាវរីយ៍អាស៊ាន-ឥណ្ឌា និងពិធីអបអរទិវាសាធារដ្ឋលើកទី៦៩នៅទីក្រុងញូវ ដេល្លី។ ក្នុងទំនាក់ទំនងទ្វេភាគី លោកនាយករដ្ឋមន្ត្រីហ៊ុន សែន នឹងជួបសន្ទនាដាច់ដោយឡែកជាមួយនាយករដ្ឋមន្ត្រីឥណ្ឌា លោកណារិនដ្រា ម៉ូឌី ហើយមេដឹកនាំទាំងពីរនឹងធ្វើជាអធិបតីក្នុងការចុះហត្ថលេខាលើឯកសារមួយចំនួន ព្រមទាំងធ្វើសន្និសីទកាសែតរួមគ្នាក្រោយជំនួបនោះថែមទៀត។
ចុះផ្សាយនៅថ្ងៃ៖
ស្តាប់ - ០៣:០៤
កម្ពុជា និងឥណ្ឌា មានទំនាក់ទំនងនឹងគ្នាតាំងតែពីអំឡុងទសវត្សទី៥០មកម្ល៉េះ។ ទំនាក់ទំនងកាលណោះ ផ្សារភ្ជាប់គ្នារវាងសម្តេចព្រះនរោត្តមសីហនុ ព្រះមុខរដ្ឋក្នុងសម័យសង្គមរាស្ត្រនិយម និងនាយករដ្ឋមន្ត្រីឥណ្ឌាជំនាន់នោះ គឺលោកលោកចាវ៉ាហាឡា នេរុ (Jawaharlal Nehru) ។ ទំនាក់ទំនងរវាងប្រមុខដឹកនាំទាំងពីរនេះ មានលក្ខណៈស្និទ្ធស្នាល និងស្អិតល្មួតមែនទែនរហូតដល់សម្តេចព្រះនរោត្តមសីហនុបានទុកលោកចាវ៉ាហាឡា នេរុ ជាមិត្តភក្តិដ៏ល្អបំផុត និងជាបងប្រុសម្នាក់ដែលព្រះអង្គបានរៀនសូត្រយ៉ាងច្រើនពីគាត់។ ក្នុងអំឡុងពេលនោះ មេដឹកនាំទាំងពីរបានផ្លាស់ប្តូរដំណើរទស្សនកិច្ចគ្នាទៅវិញទៅមក គឺលោកចាវ៉ាហាឡា នេរុ បានមកបំពេញទស្សនកិច្ចផ្លូវរដ្ឋដំបូងនៅកម្ពុជានៅក្នុង១៩៥៤ ពោល គឺមុនសន្និសីទនៃប្រទេសមិនចូលបក្សសម្ព័ន្ធ ដែលធ្វើឡើងនៅក្នុងទីក្រុងបានឌុង ប្រទេសឥណ្ឌូនេស៊ី។ ចំណែកសម្តេចព្រះនរោត្តមសីហនុវិញ ក៏បានយាងទៅបំពេញទស្សនកិច្ចនៅឥណ្ឌាពីរលើកដែរ គឺនៅក្នុងឆ្នាំ១៩៥៦មួយលើក និងមួយលើកទៀតក្នុងឆ្នាំ១៩៦។
យ៉ាងណាមិញ ទំនាក់ទំនងទ្វេភាគីរវាងកម្ពុជានិងឥណ្ឌាត្រូវបានផ្អាកទាំងស្រុងនៅក្នុងសម័យខ្មែរក្រហមនាឆ្នាំ១៩៧។ លុះផុតរបបខ្មែរក្រហម គឺនៅក្នុងឆ្នាំ១៩៨១ ឥណ្ឌាបានទទួលស្គាល់នូវរបបរដ្ឋកម្ពុជាដែលជារបបថ្មីដឹកនាំដោយលោកហេង សំរិន។ គឺនៅពេលនោះហើយដែលរដ្ឋាភិបាលឥណ្ឌាបានសម្រេចបើកស្ថានទូតរបស់ខ្លួននៅក្នុងទីក្រុងភ្នំពេញឡើងវិញ។ បន្តបន្ទាប់មក ឥណ្ឌាបានចូលរួមនៅក្នុងដំណើរការរៀបចំកិច្ចព្រមព្រៀងសន្តិភាពទីក្រុងបារីសឆ្នាំ១៩៩១ និងបានចូលរួមជាមួយអង្គការសហប្រជាជាតិដើម្បីរៀបចំបោះឆ្នោតនៅកម្ពុជាក្នុងឆ្នាំ១៩៩៣ ផងដែរ។
នៅក្នុងទំនាក់ទំនងជាថ្មីនេះ ថ្នាក់ដឹកនាំនៃប្រទេសទាំងពីរក៏បានផ្លាស់ប្តូរដំណើរទស្សនកិច្ចរវាងគ្នានិងគ្នាជាហូរហែរ ដូចជានៅក្នុងឆ្នាំ២០០២ គ្រាដែលកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន នាយករដ្ឋមន្ត្រីឥណ្ឌាជំនាន់នោះ លោក Atal Bihari Vajpayee បានមកកម្ពុជាពីរលើកទាំងក្នុងដំណើរទស្សនកិច្ចផ្លូវរដ្ឋ និងដំណើរមកចូលរួមកិច្ចប្រជុំកំពូលអាស៊ាន-ឥណ្ឌា។ នៅក្នុងឆ្នាំ២០១០ ប្រធានាធិបតីឥណ្ឌា គឺលោកស្រី Pratibha Devi Singh Patil ក៏ធ្លាប់មកទស្សនកិច្ចនៅកម្ពុជាម្តងដែរ។ ចំណែកនៅក្នុងឆ្នាំ២០១២ ឆ្នាំដែលកម្ពុជាធ្វើជាម្ចាស់ផ្ទះនៃកិច្ចប្រជុំកំពូលអាស៊ានជាថ្មីនោះ នាយករដ្ឋមន្ត្រីឥណ្ឌាពេលនោះ គឺ Manmohan Singh ក៏បានមកទស្សនកិច្ចនៅកម្ពុជា ហើយនៅឆ្នាំ២០១៥អនុប្រធានាធិបតីឥណ្ឌា ក៏បានមកទស្សនកិច្ចនៅកម្ពុជាថែមទៀត។
ដោយឡែកសម្រាប់ថ្នាក់ដឹកនាំកម្ពុជាវិញ លោកនាយករដ្ឋមន្ត្រីហ៊ុន សែន ធ្លាប់បានទៅទស្សនកិច្ចនៅ ឥណ្ឌាចំនួនពីរដងដែរ គឺម្តងនៅក្នុងឆ្នាំ២០០៧ និងម្តងទៀតនៅចុងឆ្នាំ២០១។ សម្រាប់ដំណើរទៅកាន់ឥណ្ឌាក្នុងជំនាន់លោកនាយករដ្ឋមន្ត្រីណារិនដ្រា ម៉ូឌី នាពេលនេះ គឺជាដំណើរទស្សនកិច្ចជាលើកទីបីហើយរបស់លោកក្នុងនាមជាប្រមុខរដ្ឋាភិបាលកម្ពុជា។ ដំណើរទស្សនកិច្ចលើកនេះ ភាគីទាំងពីរបានវាយតម្លៃថា នឹងលើកកម្ពស់បន្ថែមទៀតនូវទំនាក់ទំនងមិត្តភាព និងកិច្ចសហប្រតិបត្តិការដ៏ល្អប្រសើររវាងកម្ពុជា និងឥណ្ឌា។
និយាយពីវិស័យពាណិជ្ជកម្មវិញ គឺថាទំនាក់ទំនងពាណិជ្ជកម្មរវាងកម្ពុជា និងឥណ្ឌាបានកើនឡើងជាលំដាប់ក្នុងរយៈពេលប៉ុន្មានឆ្នាំចុងក្រោយនេះ។ កាលពីឆ្នាំ២០១៥ ទំហំពាណិជ្ជកម្មរវាងកម្ពុជា និងឥណ្ឌា បានឈានដល់ទៅ១៨៧,៣៦លានដុល្លារអាមេរិក។ ការនាំចេញរបស់ឥណ្ឌាមកកម្ពុជាមានទំហំទឹកប្រាក់១៤៥.៥៧លានដុល្លារ។ រីឯការនាំចេញពីកម្ពុជាទៅកាន់ឥណ្ឌាវិញមានទំហំតែ៤២,៣៦លានដុល្លារអាមេរិកតែប៉ុណ្ណោះ។ នេះបើយោងតាមរបាយការណ៍របស់ស្ថានទូតឥណ្ឌាប្រចាំនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ