តុលាការកំពូលនៅតែមិនឲ្យមន្ត្រីសិទ្ធិមនុស្សនិងគ.ជ.បនៅក្រៅឃុំ
តុលាការកំពូលនៅព្រឹកថ្ងៃពុធនេះ បានតម្កល់សាលដីការបស់សាលាឧទ្ធរណ៍ទុកជាបានការដដែល គឺនៅតែបន្តឃុំខ្លួនមន្ត្រីសិទ្ធិមនុស្សអាដហុក៤រូប និងមន្ត្រីគ.ជ.ប មួយរូបទៀតនៅក្នុងពន្ធនាគារ។ ការសម្រេចដូច្នេះបានធ្វើឡើងរំលងមួយថ្ងៃប៉ុណ្ណោះ បន្ទាប់ពីសាលាឧទ្ធរណ៍កាលថ្ងៃទី២៨ វិច្ឆិកា បានទាត់ចោលបណ្តឹងមួយផ្សេងទៀតជំទាស់នឹងសេចក្តីសម្រេចពន្យារពេលនៃការឃុំខ្លួនពួកគេទាំងនេះនៅក្នុងពន្ធនាគារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
មេធាវីការពារក្តីឲ្យជនជាប់ចោទទាំងនេះ បានលើកឡើងថា តុលាការលើកពីហេតុផលដដែលៗ ក្នុងការសម្រេចមិនកូនក្តីរបស់ពួកគេបានក្រៅឃុំ។ ហេតុផលទាំងនោះ គឺដើម្បីរក្សាទុកជនត្រូវចោទក្នុងការនាំយកមកសាកសួរតាមនីតិវិធីច្បាប់នេះម្យ៉ាង ហើយម្យ៉ាងទៀតតុលាការអះអាងថា ការស៊ើបអង្កេតមិនទាន់ចប់សព្វគ្រប់ដែលបើអនុញ្ញាតឲ្យពួកគេនៅក្រៅឃុំអាចប៉ះពាល់ដល់ដំណើរស៊ើបអង្កេតជាដើម។ ហេតុផលទាំងនេះ ទាំងមេធាវី ទាំងកូនក្តីសុទ្ធតែមិនអាចទទួលយកបាន ហើយថែមទាំងចាត់ទុកថា ជារឿងអយុត្តិធម៌សម្រាប់ពួកគេដែលជាអ្នកកំពុងជាប់ឃុំ។
សូមបញ្ជាក់ជូនថា ការសម្រេចបន្តឃុំខ្លួនមន្ត្រីសិទ្ធិមនុស្ស និងមន្ត្រីគ.ជ.បពីតុលាការកំពូលនាពេលនេះ គឺជាលទ្ធផលនៃការទាត់ចោលបណ្តឹងសុំនៅក្រៅឃុំជាបន្តបន្ទាប់ពីសំណាក់តុលាការសាលាដំបូងរាជធានីភ្នំពេញ និង សាលាឧទ្ធរណ៍នាពេលកន្លងមក។ នេះ គឺជាដំណាក់ទីមួយនៃការប្តឹងសុំនៅក្រៅឃុំរបស់ក្រុមមេធាវីនៃមន្ត្រីសិទ្ធិមនុស្ស និង មន្ត្រីគ.ជ.បក្នុងពេលដែលពួកគេត្រូវបានតុលាការចាប់ដាក់ពន្ធនាគារភ្លាម។ ដំណាក់កាលទីពីរនៃការប្តឹងសុំនៅក្រៅឃុំ ក៏ត្រូវបានក្រុមមេធាវីចាប់ផ្តើមផងដែរ ប៉ុន្តែត្រូវសាលាដំបូងទាត់ចោលដូចលើកមុនដែរ ហើយកាលថ្ងៃទី១១ វិច្ឆិកាកន្លងទៅនេះ ក៏ត្រូវបានសាលាឧទ្ធរណ៍ទាត់ចោលទៀត។ ក្រុមមេធាវីក៏គ្រោងនឹងប្តឹងសារទុក្ខទៅតុលាការកំពូលទៀតចំពោះការសម្រេចបែបនេះ។
ដោយឡែកកាលពីថ្ងៃទី២៨ វិច្ឆិកាដើមសប្តាហ៍នេះ សាលាឧទ្ធរណ៍បានទាត់ចោលបណ្តឹងទាស់ទៅនឹងសេចក្តីសម្រេចរបស់សាលាដំបូងរាជធានីភ្នំពេញក្នុងការពន្យារពេលឃុំខ្លួនមន្ត្រីសិទ្ធិមនុស្ស និងគ.ជ .ប៦ខែទៀត ដើម្បីបន្តធ្វើការស៊ើបអង្កេត។ ការសម្រេចពន្យារពេលរបស់សាលាដំបូងនេះ បានធ្វើឡើងកាលពីខែតុលា។ នេះ គឺជាបណ្តឹងដាច់ដោយឡែកមួយទៀត បើទោះបីស្ថិតនៅក្នុងសំណុំរឿងតែមួយក៏ដោយ។ ចំពោះការទាត់ចោលរបស់សាលាឧទ្ធរណ៍នេះ ក្រុមមេធាវីក៏គ្រោងនឹងប្តឹងសារទុក្ខទៅតុលាការកំពូលបន្តទៀតដែរ។
សូមរំលឹកឡើងវិញបន្តិចថា មន្ត្រីការពារសិទ្ធិមនុស្សអាដហុកទាំង៤នាក់រួមមានលោក នី សុខា លោក យី សុខសាន្ត លោក ណៃ វ៉ងដា និងលោកស្រី លឹម មុនី ត្រូវបានតុលាការក្រុងភ្នំពេញចោទប្រកាន់ពីបទសូកប៉ាន់សាក្សី។ ឯលោកនី ចរិយាដែលជាអគ្គលេខាធិការរងគណៈកម្មាធិការជាតិរៀបចំការបោះឆ្នោតវិញ ត្រូវបានតុលាការចោទប្រកាន់ពីបទសមគំនិតក្នុងរឿងសូកប៉ាន់សាក្សីនៅក្នុងសំណុំរឿងអាស្រូវស្នេហារវាងលោកកឹម សុខា និងកញ្ញាស្រីមុំ។ គិតមកដល់ពេលនេះ ពួកគេត្រូវបានតុលាការឃុំខ្លួននៅក្នុងពន្ធនាគារអស់រយៈពេលជិត៧ខែមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ