ប៉ូលីសតាមប្រម៉ាញ់លោកកឹម សុខា ដែលមិនចូលខ្លួនបំភ្លឺតាមដីការកោះហៅរបស់តុលាការ
សមត្ថកិច្ចប៉ូលីសក្រសួងមហាផ្ទៃ ដែលប្រដាប់ដោយអាវុធ បានទៅឡោមព័ទ្ធទីស្នាក់ការកណ្តាលគណបក្សសង្គ្រោះជាតិនៅរាជធានីភ្នំពេញ នារសៀលថ្ងៃទី២៦ឧសភានេះ ដើម្បីនាំខ្លួនលោក កឹម សុខា ក៏ប៉ុន្តែត្រូវបានដកទៅវិញដោយមិនដឹងពីមូលហេតុ។ ភ្លាមៗនោះ គណបក្សសង្គ្រោះជាតិ បានចេញសេចក្តីប្រកាសព័ត៌មានមួយ ដោយបានជំរាបជូនសាធារណជន អ្នកសារព័ត៌មានជាតិ-អន្តរជាតិ និងអង្គទូតទាំងអស់ ពីការឃាត់រថយន្តរបស់លោក កឹម សុខានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
នៅមុនការឡោមព័ទ្ធទីស្នាក់ការគណបក្សសង្គ្រោះជាតិ នៅរសៀលថ្ងៃទី២៦ឧសភានោះ សមត្ថកិច្ចក្រសួងមហាផ្ទៃដែលប្រដាប់ដោយអាវុធគ្រប់ដៃ បានឃាត់រថយន្តភរិយារបស់លោក កឹម សុខា ដែលកំពុងធ្វើដំណើរតាមបណ្តោយមហាវិថីព្រះនរោត្តម។ ក៏ប៉ុន្តែនៅក្នុងរថយន្តនោះ ពុំមានវត្តមានរបស់លោក កឹម សុខា ប្រធានស្តីទីគណបក្សសង្គ្រោះជាតិនោះទេ ពោលគឺ មានតែភរិយានិងអង្គរក្សពីរបីនាក់របស់លោក កឹម សុខា តែប៉ុណ្ណោះ។
បន្តិចក្រោយមក សមត្ថកិច្ចប្រមាណជា៤រថយន្ត ដែលអមដោយម៉ូតូប្រដេញជាច្រើនគ្រឿងទៀត ក៏បានធ្វើដំណើរទៅដល់ទីស្នាក់ការកណ្តាលរបស់គណបក្សសង្គ្រោះជាតិ ដែលស្ថិតនៅសង្កាត់ចាក់អង្រែលើ រាជធានីភ្នំពេញ។ តែមិនបានប៉ុន្មាននាទីស្រួលបួលផង សមត្ថកិច្ចដែលស្ថិតនៅក្នុងសម្លៀកបំពាក់ប្រយុទ្ធទាំងនោះ ក៏បានដកចេញទៅវិញ ដោយមិនដឹងពីមូលហេតុនោះទេ តែគេបានដឹងត្រឹមតែថា មានការសួរនាំពីមន្ត្រីជាន់ខ្ពស់គណបក្សសង្គ្រោះជាតិ ជុំវិញដីការនាំខ្លួនលោក កឹម សុខា។
យ៉ាងណាក៏ដោយ រហូតដល់ម៉ោង៧យប់ ថ្ងៃទី២៦ ឧសភានេះ លោក កឹម សុខា នៅមិនទាន់ត្រូវបានចាប់ខ្លួនៅឡើយទេ ហើយសំណួរត្រូវបានចោទឡើងថា តើពេលនេះ លោក កឹម សុខា កំពុងស្ថិតនៅទីណា? មានពាក្យចរចាមអារាមខ្លះថា លោក កឹម សុខា គឺកំពុងស្ថិតនៅក្នុងទីស្នាក់ការរបស់គណបក្សសង្គ្រោះជាតិនោះឯង ព្រោះថា នៅមុនពេលមានការឆ្អើលឆោឡោពីការឃាត់រថយន្តនឹងការឡោមព័ទ្ធទីស្នាក់ការគណបក្សប្រឆាំងនេះ លោក កឹម សុខា ត្រូវបានគេដឹងថា កំពុងដឹកនាំកិច្ចប្រជុំជាមួយថ្នាក់ដឹកនាំគណបក្សសង្គ្រោះជាតិ។ ចំណែកលោក យឹម សុវណ្ណ អ្នកនាំពាក្យគណបក្សសង្គ្រោះជាតិ ក៏មិនបានបញ្ជាក់ថា តើលោក កឹម សុខា ពេលនេះ កំពុងស្ថិតនៅទីណានោះទេ ពោលគឺលោកបានតែត្រឹមបញ្ជាក់ថា បច្ចុប្បន្នលោក កឹម សុខា កំពុងស្ថិតនៅក្នុងប្រទេសនិងស្ថិតនៅទីកន្លែងដែលមានសុវត្ថិភាពមួយ។
គួរបញ្ជាក់ថា លោក កឹម សុខា នៅថ្ងៃទី២៦ឧសភានេះ បានបដិសេធមិនចូលខ្លួនទៅឆ្លើយបំភ្លឺនៅក្នុងតុលាការក្រុងភ្នំពេញ តាមដីការកោះហៅរបស់ព្រះរាជអាជ្ញារងលោក សៀង សុខ នោះទេដោយអះអាងថា លោកគឺជាអ្នកតំណាងរាស្ត្រដែលមានអភ័យឯកសិទ្ធិ។
យ៉ាងណាក៏ដោយ ជុំវិញចំណាត់ការរបស់សមត្ថកិច្ចកម្ពុជានៅថ្ងៃនេះ ត្រូវបាន លោក ខៀវ សុភ័ក្រ អ្នកនាំពាក្យក្រសួងមហាផ្ទៃអះអាងថា គឺដោយសារលោក កឹម សុខា មិនព្រមចូលខ្លួនទៅបំភ្លឺតាមដីការកោះហៅរបស់ស្ថាប័នតុលាការចំនួន៣ដង។ ហើយការខកខាននេះ ត្រូវបានចាត់ទុកថា គឺជាបទល្មើសជាក់ស្តែង។ បើតាមលោក ខៀវ សុភ័ក្រ លោក កឹម សុខា នឹងត្រូវប្រឈមការជាប់ពន្ធនាគារ ពី១ខែទៅ៦ខែ នោះបើផ្អែកទៅលើក្រមព្រហ្មទណ្ឌកម្ពុជាត្រង់មាត្រា៥៣។
សូមបញ្ជាក់ថា គិតមកត្រឹមម៉ោង៧យប់ថ្ងៃទី២៦ឧសភា អ្នកគាំទ្រគណបក្សសង្គ្រោះជាតិ បានបន្តប្រមូលផ្តុំគ្នានៅមុខទីស្នាក់ការកណ្តាលគណបក្សសង្គ្រោះជាតិ ក្រោមការឃ្លាំមើលពីក្រុមអង្គការសង្គមស៊ីវិល និងអ្នកសារព័ត៌មានជាតិនិងអន្តរជាតិជាច្រើនរូប។ ហើយបើ មន្ត្រីគណបក្សសង្គ្រោះជាតិបានឲ្យដឹងថា សកម្មជនរបស់ខ្លួននៅតាមបណ្តាខេត្តបានត្រៀមខ្លួនធ្វើដំណើរមកកាន់ទីក្រុងភ្នំពេញដើម្បីគាំទ្រដល់លោក កឹម សុខា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ