សវនាការកាត់ទោសអតីតមេខ្មែរក្រហម នួន ជា និងខៀវ សំផន ចាប់ផ្តើមឡើងវិញ
ដូចការគ្រោងទុក នៅព្រឹកថ្ងៃទី២១ ខែមករានេះ អង្គជំនុំជម្រះសាលាដំបូងរបស់តុលាការខ្មែរក្រហម បានចាប់ផ្តើមបើកសវនាការឡើងវិញ ដើម្បីជំនុំជម្រះលើសំណុំរឿង០០២ វគ្គ២ ដែលមានជនជាប់ចោទ នួន ជា និងខៀវ សំផន។ អតីតមេខ្មែរក្រហមចាស់ជរាទាំងពីររូប បានបង្ហាញមុខក្នុងបន្ទប់សវនាការ។ ប៉ុន្តែនៅថ្ងៃទី២៣មករា អង្គជំនុំជម្រះសាលាដំបូង នឹងបើកសវនាការលើសម្បទារបស់ជនជាប់ចោទ ដើម្បីវាយតម្លៃវេជ្ជសាស្ត្រលើសុខភាពរបស់លោកនួន ជា អាយុ ៨៨ ឆ្នាំ និងលោកខៀវ សំផន អាយុ ៨៣ ឆ្នាំ ថាតើអាចបន្តចូលរួមសវនាការបានតទៅទៀត ដែរឬទេ?
ចុះផ្សាយនៅថ្ងៃ៖
ស្តាប់ - ០១:៥២
បន្ទាប់ពីផ្អាកសវនាការជាបន្តបន្ទាប់ដោយសារតែបញ្ហាសុខភាពរបស់លោកខៀវ សំផន គឺនៅព្រឹកថ្ងៃទី២១មករានេះ សវនាការនៅសាលាក្តីខ្មែរក្រហម បានចាប់ផ្តើមធ្វើឡើងវិញហើយ។ លោកនួន ជា អាយុ ៨៨ ឆ្នាំ និងលោកខៀវ សំផន អាយុ ៨៣ ឆ្នាំ ត្រូវបានគេនាំមកចូលរួមសវនាការ នាព្រឹកនេះ។ ប៉ុន្តែអង្គុយក្នុងបន្ទប់សវនាការប្រហែលជា ១០ នាទី លោកនួន ជា តាមរយៈមេធាវី បានស្នើសុំចៅក្រម ទៅសម្រាកតាមដានសវនាការពីចំងាយតាមរយៈសោតទស្សន៍។ មូលហេតុ មកពីបញ្ហាសុខភាពចាស់ជរារបស់លោកនួន ជា។ ចៅក្រម បានយល់ព្រម។
នៅពេលផ្តើមសវនាការ នៅម៉ោង ៩ ព្រឹកនេះ លោកចៅក្រម និល ណុន ប្រធានអង្គជំនុំជម្រះសាលាដំបូង បានប្រកាសថា នៅថ្ងៃទី២៣មករា អង្គជំនុំជម្រះ នឹងបើកសវនាការវាយតម្លៃវេជ្ជសាស្ត្រលើសម្បទារបស់ជនជាប់ចោទ នួន ជា និងខៀវ សំផន ថាតើអតីតមេខ្មែរក្រហមទាំងពីរ មានសុខភាពគ្រប់គ្រាន់ អាចបន្តចូលរួមសវនាការតទៅទៀតបានដោយពេញលេញ ឬទេ?
ជាការកត់សម្គាល់ លោកខៀវ សំផន អតីតប្រមុខរដ្ឋខ្មែរក្រហម បានឈឺ វិលមុខ និងឡើងសំពាធឈាម ក្នុងពេលបើកសវនាការ កាលពីរសៀលថ្ងៃទី៨មករា ហើយត្រូវបានគេបញ្ជូនទៅកាន់មន្ទីរពេទ្យសង្គ្រោះបន្ទាន់ភ្លាម។ លោកខៀវ សំផន បានវិលទៅកាន់មន្ទីរឃុំឃាំងរបស់សាលាក្តីខ្មែរក្រហមវិញ កាលពីថ្ងៃទី១៥មករា។
សវនាការនៅសាលាក្តីខ្មែរក្រហម នៅព្រឹកថ្ងៃពុធនេះ បានធ្វើឡើង ដោយបន្តស្តាប់សក្ខីកម្មរបស់សាក្សី លោកមាស សុខា ជាអតីតអ្នកទោស នៅគុកក្រាំងតាចាន់ ក្នុងស្រុកត្រាំកក់ ខេត្តតាកែវ។ សាក្សីរូបនេះ បានឆ្លើយតបនឹងសំណួររបស់សហព្រះរាជអាជ្ញា រៀបរាប់ពីស្ថានភាពជាប់ឃុំឃាំង និងការធ្វើទារុណកម្មអ្នកទោស នៅគុកក្រាំងតាចាន់ ក្នុងសម័យខ្មែរក្រហម។ សវនាការ លើសំណុំរឿង០០២ វគ្គ២ នឹងបន្តធ្វើនៅថ្ងៃទី២២មករា ដែលតាមកាលកំណត់ សវនាការ ត្រូវធ្វើឡើងពីរថ្ងៃក្នុងមួយសប្តាហ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ