ទូរទស្សន៍របស់ក្រុមអាវលឿងថៃ បើកដៃឲ្យខ្មែរម្នាក់វាយប្រហាររដ្ឋាភិបាលកម្ពុជា
ជាលើកទី១ហើយ ដែលទូរទស្សន៍ ASTV របស់ក្រុមអាវលឿងថៃ គាំទ្ររដ្ឋាភិបាលក្រុងបាងកក បានបើកដៃឲ្យពលរដ្ឋខ្មែរម្នាក់ ថ្លែងការណ៍វាយប្រហាររដ្ឋាភិបាលកម្ពុជា។ តាមសម្តីរបស់បុរសឈ្មោះ សួន សេរីរដ្ឋា ដែលតាំងខ្លួនថា ជាប្រធានចលនាអំណាចប្រជាពលរដ្ឋខ្មែរ គឺសង្គ្រាមរវាងកម្ពុជា និងថៃសព្វថ្ងៃ មិនមែនថៃជាអ្នកបង្កើតឡើងទេ តែថារដ្ឋាភិបាលកម្ពុជា ជាអ្នកបង្កឡើងទៅវិញ។ ជាការលើកឡើង ដែលមន្ត្រីរដ្ឋាភិបាលចាត់ទុកថា ខុសពីការពិត។ ការពិត ដែលថៃជាអ្នកឈ្លានពាន បង្កសង្គ្រាមលើកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
កាលពីយប់មិញ អ្នកនៅភ្នំពេញ អាចមើលឃើញរូបភាពរបស់ពលរដ្ឋខ្មែរម្នាក់ តាមរយៈកញ្ចក់ទូរទស្សន៍ ASTV របស់ក្រុមអាវលឿងថៃ។ រូបភាព និងសំឡេងជាភាសាខ្មែរ អង់គ្លេស និងបកប្រែជាភាសាថៃ រយៈពេល ៣០ នាទី និង២១ វិនាទីនោះ ក៏ត្រូវបានបង្ហោះព្រោងព្រាត តាមវេបសាយជាច្រើនផ្សេងទៀត។
តាមខ្សែអាត់វីដេអូនោះ ពលរដ្ឋខ្មែរម្នាក់ គឺលោក សួន សេរីរដ្ឋា ដែលអះអាងថា ជាប្រធានចលនាអំណាចប្រជាពលរដ្ឋខ្មែរ មានមូលដ្ឋាននៅសហរដ្ឋអាមេរិក បានចាត់ទុកថា ការបង្កើតសង្គ្រាមនៅព្រំដែនកម្ពុជា-ថៃ ចាប់តាំងពីឆ្នាំ២០០៨ គឺរដ្ឋាភិបាលរបស់លោកនាយករដ្ឋមន្ត្រី ហ៊ុន សែន ជាអ្នកបង្កឡើង មិនមែនផ្តើមចេញពីការឈ្លានពានរបស់ថៃ មកលើកម្ពុជាទេ។
លោក សួន សេរីរដ្ឋា ក៏បានលើកឡើងថា ការបង្កើតសង្គ្រាមជាយដែនរវាងកម្ពុជា និងថៃ គឺជាការពង្រឹងអំណាចរបស់គណបក្សប្រជាជនកម្ពុជា និងដើម្បីប្រមូលផ្តុំអំណាចលើលោកនាយករដ្ឋមន្ត្រី ហ៊ុន សែន។ សង្គ្រាមនោះ ក៏មានផលប្រយោជន៍ដល់ក្រុមគ្រួសារ អ្នកមានអំណាចក្នុងគណបក្សប្រជាជនកម្ពុជា ជាពិសេសក្រុមគ្រួសារលោកនាយករដ្ឋមន្ត្រី។
ក្នុងវេទិកាក្រុមអាវលឿង ដែលពុំធ្លាប់មានពីមុនមកនោះ លោក សួន សេរីរដ្ឋា បានហៅរបបគ្រប់គ្រងក្រុងភ្នំពេញ របស់លោកនាយករដ្ឋមន្ត្រី ហ៊ុន សែន ថាជាឈ្មួញ និងល្មោភសង្គ្រាម។ លោក សួន សេរីរដ្ឋា ក៏បានប្រើប្រាស់វេទិកាក្រុមអាវលឿងនៅប្រទេសថៃ អំពាវនាវឲ្យមានចលនាបដិវត្តប្រជាជន ដើម្បីផ្តួលរំលំរដ្ឋាភិបាលក្រុងភ្នំពេញ ដោយយកប្រទេសថៃ ធ្វើជាមូលដ្ឋានតស៊ូ។
ក៏ប៉ុន្តែមន្ត្រីរដ្ឋាភិបាល លោក ទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័ស របស់ទីស្តីការគណៈរដ្ឋមន្ត្រី បានចាត់ទុកថា ជនម្នាក់នោះ ខ្វះលក្ខណៈជាពលរដ្ឋខ្មែរ និងបានលើកឡើងនូវរឿងប្រឌិត ខុសការពិត។ តាមមន្ត្រីរដ្ឋាភិបាល សង្គ្រាមនៅព្រំដែនកម្ពុជា-ថៃ កើតឡើងដោយសារថៃជាអ្នកឈ្លានពានលើកម្ពុជា។
លោក ទិត សុធា បានបញ្ជាក់ថា ការប្រើប្រាស់វេទិការបស់ក្រុមអាវលឿងថៃ ដែលរដ្ឋាភិបាលកម្ពុជាចាត់ទុកថា ជាចលនាប្រឆាំង គឺជាការដើរផ្លូវខុសរបស់ពលរដ្ឋខ្មែរម្នាក់ និងជាការរួមចំណែក ដូចហុចដងដាវ ឲ្យសត្រូវ ដើម្បីបំផ្លាញសន្តិភាព នៅកម្ពុជា។
យ៉ាងណាក៏ដោយ រដ្ឋាភិបាលកម្ពុជា មិនទាន់មានវិធានការបែបណា ប្រឆាំងនឹងការប្រើប្រាស់វេទិការបស់ក្រុមអាវលឿងថៃ ដែលពលរដ្ឋខ្មែរម្នាក់ បានបើកការវាយប្រហារលើរដ្ឋាភិបាលកម្ពុជានោះឡើយ។ ប៉ុន្តែលោក ទិត សុធា អះអាងថា បុគ្គលនោះ នឹងត្រូវពលរដ្ឋខ្មែរ ដែលកំពុងរួមដៃប្រឆាំងការឈ្លានពានរបស់ថៃ ធ្វើការថ្កោលទោសជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ