អាជ្ញាធរថៃចាប់ពលរដ្ឋកម្ពុជា១៤៧នាក់នៅផ្សាររុងគ្លឿជិតព្រំដែនប៉ោយប៉ែត
មន្ត្រីការទូតកម្ពុជាបានអះអាងថា កាលពីយប់មិញនេះ យ៉ាងហោចណាស់មានពលរដ្ឋកម្ពុជា ចំនួន ១៤៧ នាក់ ត្រូវបានប៉ូលិសថៃចាប់ឃាត់ខ្លួន នៅផ្សាររុងគ្លឿ ដែលស្ថិតនៅជាប់នឹងច្រកទ្វារព្រំដែនប៉ោយប៉ែត ក្នុងខេត្តបន្ទាយមានជ័យ។ពលរដ្ឋកម្ពុជាដែលត្រូវឃាត់ខ្លួននោះ បានចូលទៅស្នាក់នៅ និងប្រកបរបររកស៊ីនៅក្នុងផ្សាររុងគ្លឿ ក្នុងទឹកដីថៃដោយគ្មានការអនុញ្ញាតត្រឹមត្រូវឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
ប៉ូលិសថៃចាប់ខ្លួនពលរដ្ឋខ្មែរទាំង ១៤៧ នាក់ ដែលមានបុរស ៩៧ នាក់ កាលពីយប់ថ្ងៃទី១៦សីហាឈានចូលថ្ងៃទី១៧សីហា ឆ្នាំ២០១១គឺស្ថិតក្នុងយុទ្ធនាការត្រួតពិនិត្យក្នុងពេល៣ ឬ៤ ខែម្តង ទៅលើពលរដ្ឋខ្មែរ ដែលបានចូលទៅប្រកបរបររកស៊ី និងស្នាក់ក្នុងផ្សារជាប់ព្រំដែនប៉ោយប៉ែត។ ពលរដ្ឋកម្ពុជា ដែលត្រូវប៉ូលិសថៃចាប់ខ្លួនទាំងនោះ ដោយសារតែចូលទៅស្នាក់នៅទឹកដីថៃ មិនបានសុំការអនុញ្ញាត។
លោក កុយ គួង អ្នកនាំពាក្យក្រសួងការបរទេសបានលើកឡើងថា មកដល់រសៀលថ្ងៃទី១៧សីហា ឆ្នាំ២០១១ មន្ត្រីកុងស៊ុលកម្ពុជា ២ នាក់ កំពុងពិនិត្យលើករណីប៉ូលិសថៃ ចាប់ឃាត់ខ្លួនពលរដ្ឋកម្ពុជាទាំងនោះ។
តាមមន្ត្រីការទូត ប៉ូលិសថៃបានប្រមូលទុកពលរដ្ឋខ្មែរ ដែលត្រូវបានចាប់ខ្លួនទាំង ១៤៧ នាក់ ទុកនៅនាយកដ្ឋានប៉ូលិសអន្តោប្រវេសន៍ដើម្បីរង់ចាំថៅកែថៃ នៅផ្សាររុងគ្លឿ មកធានាទទួលយកអ្នកទាំងនោះ ទៅធ្វើការវិញ។ ចំណែកពលរដ្ឋខ្មែរមួយផ្នែកទៀត ក៏ត្រូវប៉ូលិសថៃ សាកសួរ និងរៀបចំបែបបទ ដើម្បីបញ្ជូនត្រឡប់មកកាន់ប្រទេសកម្ពុជាវិញ តាមច្រកព្រំដែនអន្តរជាតិប៉ោយប៉ែត។
មន្ត្រីការទូតកម្ពុជា បញ្ជាក់ថា ពលរដ្ឋខ្មែរទាំង ១៤៧ នាក់ ដែលត្រូវប៉ូលិសថៃចាប់ឃាត់ខ្លួន ដោយសារតែពួកគេចូលទៅស្នាក់នៅទឹកដីថៃ ក្នុងផ្សាររុងគ្លឿ ដោយគ្មានលិខិតអនុញ្ញាត ឬក៏លិខិតឆ្លងដែនទាំងនោះត្រូវហួសកាលកំណត់។
លោក កុយ គួង បន្ថែមថា តាមធម្មតា អាជ្ញាធរថៃ បានអនុញ្ញាតឲ្យពលរដ្ឋខ្មែរឆ្លងដែន ចូលទៅរកស៊ីនៅផ្សាររុងគ្លឿ ចូលទៅពេលព្រឹកនិងត្រូវចេញមកទឹកដីកម្ពុជាវិញនៅពេលព្រលប់ជារៀងរាល់ថ្ងៃ។
ចំណែកអាជ្ញាធរកម្ពុជាប្រចាំច្រកទ្វារព្រំដែនអន្តរជាតិប៉ោយប៉ែត បានឲ្យដឹងថា ពលរដ្ឋខ្មែរ ដែលស្នាក់នៅប្រទេសថៃ ដោយគ្មានលិខិតអនុញ្ញាតទាំងអស់នឹងត្រូវអាជ្ញាធរថៃធ្វើការត្រួតពិនិត្យរាល់ទោសកំហុស។ អ្នកទាំងនោះ ត្រូវប្រឈមនឹងការផាកពិន័យមុននឹងបញ្ជូនមកកម្ពុជាវិញឬក៏បញ្ជូនទៅតុលាការ ដើម្បីកាត់ទោសតាមច្បាប់ប្រទេសថៃ។
យ៉ាងណាក៏ដោយមកដល់ព្រលប់ថ្ងៃទី១៧សីហាឆ្នាំ២០១១ មន្ត្រីការទូតកម្ពុជា មិនទាន់ដឹងថា ប៉ូលិសថៃបានដោះលែង ឬក៏បញ្ជូនអ្នកទាំងនោះ ឲ្យមកស្រុកវិញ ឬក៏ត្រូវបញ្ជូនពលរដ្ឋខ្មែរប៉ុន្មាននាក់ទៅកាន់តុលាការថៃនៅឡើយទេ។
ជាញឹកញាប់ពលរដ្ឋខ្មែរ ដែលចូលទៅធ្វើការនៅប្រទេសថៃ តែងតែត្រូវប៉ូលិសថៃ ចាប់ខ្លួននិងបញ្ជូនមកស្រុកវិញ។ អ្នកខ្លះទៀត ត្រូវបញ្ជូនទៅកាត់ទោសនៅតុលាការ ដោយសារតែពលរដ្ឋខ្មែរទាំងនោះ បានចូលទៅរកការងារធ្វើនៅទឹកដីថៃ ដោយគ្មានលិខិតស្នាមត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ