យោធាកម្ពុជាបដិសេធសំណើព្រះសង្ឃ មន្ត្រី និងប្រជាជនថៃអាវលឿងចូលតំបន់ភ្នំទ្រព្យ
នៅព្រឹកថ្ងៃ៩មករានេះ ព្រះសង្ឃ មន្ត្រីរាជការនិងពលរដ្ឋថៃមួយក្រុម មានសមាជិកប្រមាណ១០០នាក់មានបំណងឆ្លងចូលមកតំបន់ភ្នំទ្រព្យខាងលិចប្រាសាទព្រះវិហារដើម្បីដុតធូបបន់ស្រន់ព្រះដែលពួកគេអះអាងធ្លាប់បានយកមកដាក់នៅទីនោះ។ ប៉ុន្តែបំណង ត្រូវបានរារាំងដោយកងទ័ពកម្ពុជាក្នុងសមរភូមិជួរមុខ។ដល់ល្ងាចថ្ងៃចន្ទនេះព្រះសង្ឃនិងប្រជាជនថៃអាវលឿងបានចាកចេញពីតំបន់នោះហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
ប្រជាពលរដ្ឋថៃអាវលឿងប្រមាណ ១០០នាក់ ដែលក្នុងចំណោមនោះមានព្រះសង្ឃប្រហែល៣០អង្គផង បានចាកចេញពីតំបន់ប្រឈមនឹងភ្នំទ្រព្យក្នុងតំបន់ព្រំដែនប្រាសាទព្រះវិហារវិញហើយកាលពីរសៀលម៉ោង៤ថ្ងៃចន្ទនេះ។ នេះបើតាមការអះអាងរបស់លោកឧត្តមសេនីយឯក ស្រី ឌឹកមេបញ្ជាការកងពលធំអន្តរាគមន៍លេខ៣ប្រចាំទិសប្រាសាទព្រះវិហារ។
លោកឧត្តមសេនីយស្រី ឌឹកបានប្រាប់វិទ្យុបារាំងអន្តរជាតិតាមទូរស័ព្ទកាលពីរសៀលថ្ងៃចន្ទទី៩មករានេះថា ពួកគេបានចាកចេញបន្ទាប់ពីកងទ័ពកម្ពុជាប្រចាំការក្នុងតំបន់សមរភូមិជួរមុខបដិសេធមិនអោយពួកគេចូលមកដុតធូបនៅទីតាំងមួយនៃតំបន់ភ្នំទ្រព្យក្នុងទឹកដីកម្ពុជា។
តាមពិត ក្រុមប្រជាពលរដ្ឋថៃបានជួបប្រជុំគ្នាដុតធូបសំពះព្រះនៅក្នុងទឹកដីថៃរបស់ពួកគេដែលនៅទល់មុខភ្នំទ្រព្យនោះ។
ហើយពួកគេមានបំណងចូលមកដុតធូបដូចគ្នានៅក្នុងទឹកដីកម្ពុជា។ លោកឧត្តមសេនីយស្រី ឌឹកបានព្រមានថា ប្រជាពលរដ្ឋថៃទាំងនោះអាចធ្វើសកម្មភាពអ្វីក៏បាននៅលើទឹកដីរបស់ពួកគេ។ ប៉ុន្តែពួកគេមិនអាចឈានជើងចូលក្នុងទឹកដីកម្ពុជាដោយគ្មានការអនុញ្ញាតឡើយ។
ទោះយ៉ាងណាក៏ដោយ បើតាមការអះអាងរបស់មេបញ្ជាការរូបនេះ វាមិនបានមានភាពតានតឹងអ្វីនៅព្រំដែននោះឡើយកាលពីព្រឹកថ្ងៃចន្ទនេះ។
គួររម្លឹកថា ការមកដល់នៃអ្នកសាសនារបស់ថៃចូលក្នុងតំបន់ព្រំដែនប្រាសាទព្រះវិហារធ្លាប់ជាបទពិសោធន៍អាក្រក់សម្រាប់កម្ពុជា។ ព្រោះតែអ្នកសាសនានេះហើយ ដែលកងទ័ពថៃបានចូលមកឈរជើងបោះទីតាំងនៅលើទឹកដីកម្ពុជាក្នុងតំបន់ជុំវិញប្រាសាទព្រះវិហារតាំងពីថ្ងៃទី១៥កក្កដាឆ្នាំ២០០៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ