ថៃប្រតិកម្មផ្នែកការទូតចំពោះទាហានកម្ពុជាបាញ់ឧទ្ធម្ភាគចក្រថៃតាមព្រំដែន
ក្រោយពីទាហានកម្ពុជាបានប្រើកាំភ្លើង AK-47 បាញ់រះជាង១០០គ្រាប់សំដៅលើឧទ្ធម្ភាគចក្រថៃ ដែលប៉ុនប៉ងចុះចតរំលោភចូលទឹកដីកម្ពុជា នៅចំនុច ៣២៩ ក្នុងខេត្តកោះកុង កាលពីថ្ងៃទី១៥ ខែធ្នូរួចមក រដ្ឋាភិបាលថៃ បានចេញកំណត់ទូតមួយមកភាគីកម្ពុជា នៅថ្ងៃសៅរ៍នេះ ដើម្បីតវ៉ាចំពោះការបាញ់ប្រហារ ពីសំណាក់យោធាកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
មេបញ្ជាការកងទ័ពជើងទឹកថៃ លោក សុរ៉ាកស័ក្តរុងរឿង បានថ្លែងប្រាប់សារព័ត៌មានក្នុងស្រុកមួយចេញផ្សាយនៅថ្ងៃសៅរ៍នេះ ថាលោកបានដាក់លិខិតតវ៉ាមួយ ទៅកាន់ក្រសួងការពារជាតិថៃ ដើម្បីបញ្ជូនបន្តទៅក្រសួងការបរទេសកម្ពុជារួចហើយ អំពីយោធាកម្ពុជា ដែលបានបាញ់ប្រហារទៅលើឧទ្ធម្ភាគចក្រដឹកជញ្ចូនស្បៀងរបស់ថៃ កាលពីថ្ងៃទី១៥ ខែធ្នូ។
លោក សុរ៉ាកស័ក្ត ក៏បានដាក់បញ្ជាចំពោះកងកម្លាំងប្រចាំការតំបន់ជម្លោះ ឲ្យមានការប្រុងប្រយ័ត្នខ្ពស់ ដោយបំពាក់អាវុធលើឧទ្ធម្ភាគចក្រខ្លះដើម្បីការពារសុវត្ថិភាព និងការពារខ្លួន។ ចំពោះករណីដែលអាចឈានទៅដល់ការបិទច្រកព្រំដែនថៃកម្ពុជា គឺអាស្រ័យទៅលើ ទាហានព្រំដែនប្រចាំខេត្តចាន់បុរីនិងខេត្តត្រាត ជាប់ព្រំដែនខេត្តកោះកុងជាអ្នកពិចារណា។
លោក សេក សាម៉ន អនុប្រធានការិយាល័យទំនាក់ទំនងព្រំដែនកម្ពុជាថៃ បានប្រាប់វិទ្យុបារំាងថា--អគ្គកុងស៊ុលកម្ពុជាប្រចាំក្រុងបាងកក បានទទួលលិខិតតវ៉ាមួយ-ពី ក្រសួងការបរទេសថៃរួចហើយ នៅព្រឹកថ្ងៃសៅរ៍នេះ។
លោកមិនបានដឹងថាលិខិតតវ៉ានោះ ភាគីថៃទាមទារអ្វីខ្លះពីកម្ពុជានោះទេ?តែថាវាគ្រាន់តែជាលិខិតតវ៉ា«បែបការទូតធម្មតាប៉ុណ្ណោះ»។បើតាមមន្រ្តីទំនាក់ទំនងព្រំដែន កម្ពុជាថៃស្ថានភាពព្រំដែនប្រទេសទាំង២នៅមានសភាពប្រក្រតី ប្រជាជនឆ្លងចេញចូលព្រំដែនដូចសព្វមួយដង
ភាគីទាំង ២នៅមិនទាន់មានជំនួបចរចាណាមួយនៅឡើយទេ ដើម្បីដោះស្រាយបញ្ហាវិវាទថ្មីនេះ។តែបើតាមប្រភពពីមន្រ្តីយោធាកម្ពុជា ភាគីទាំង២មានគម្រោងជួបប្រជុំគ្នាមួយ នៅថ្ងៃអាទិត្យ ក្នុងខេត្តត្រាត ប្រទេសថៃ ។កិច្ចប្រជុំនោះអាចនឹងត្រូវពិភាក្សា ចំពោះសំណើទាមទាររបស់ថៃ ដែលឲ្យកម្ពុជា-ចេញលិខិតសុំទោស ចំពោះករណីបាញ់ឧទ្ធម្ភាគចក្រថៃ និងការទាមទារឲ្យកម្ពុជាដកកងទ័ពចេញពីចំនុច៣២៩ដែលថៃចាត់ទុកថាតំបន់នោះស្ថិតក្រោមអធិបតេយ្យថៃ។
រដ្ឋមន្រ្តីក្រសួងការពារជាតិកម្ពុជា លោក ទៀ បាញ់ -ត្រូវបានវេបសាយក្នុងស្រុកមួយស្រង់សំដីថាការបាញ់នោះគ្រាន់តែជាការកំញើញខណៈឧទ្ធម្ភាគចក្រថៃ នៅតែចចេសចុះចតនិងរំលោភទឹកដីកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ